ರಾಯಚೂರು : ನೂತನ ರಾಯಚೂರು ವಿಶ್ವವಿದ್ಯಾಲಯ ಯುಜಿಸಿಯ ಮಾನ್ಯತೆ ಪಡೆದ ದೇಶದ ವಿವಿಧ ವಿಶ್ವವಿದ್ಯಾಲಯಗಳ ಪಟ್ಟಿಯಲ್ಲಿ ಅಧಿಕೃತವಾಗಿ ಸೇರ್ಪಡೆಗೊಂಡಿದೆ.
2021ರ ಜುಲೈ 9ರಂದು ಯುಜಿಸಿಯ ಅಧೀನ ಕಾರ್ಯದರ್ಶಿ ಡಾ.ನರೇಶ್ ಕುಮಾರ್ ಶರ್ಮಾ ಆದೇಶ ಹೊರಡಿಸಿದ್ದಾರೆ. ಈ ಬಗ್ಗೆ ರಾಯಚೂರು ವಿಶ್ವವಿದ್ಯಾಲಯದ ಕುಲಸಚಿವರಿಗೆ ಪತ್ರ ಬರೆದಿದ್ದಾರೆ.
ಯುಜಿಸಿ ಕಾಯ್ದೆ 1956ರ ಭಾಗ 22 ಹಾಗೂ 2(ಎಫ್) ನಿಯಮದಂತೆ ರಾಯಚೂರು ವಿವಿ ಸ್ಥಾಪನೆಯಾಗಿದೆ. ಈಗ ಯುಜಿಸಿಯ ವೆಬ್ಸೈಟ್ನಲ್ಲಿ ರಾಯಚೂರು ವಿವಿಗೆ ಸ್ಥಾನ ಸಿಗುವ ಮೂಲಕ ಅಭಿವೃದ್ಧಿಗೆ ಮತ್ತಷ್ಟು ಬಲ ಸಿಕ್ಕಂತಾಗಿದೆ.
ಈ ಕುರಿತು ಕುಲಪತಿ ಪ್ರೊ.ಹರೀಶ್‌ ರಾಮಸ್ವಾಮಿ ಹರ್ಷ ವ್ಯಕ್ತಪಡಿಸಿದ್ದಾರೆ. ಯುಜಿಸಿ ಶೈಕ್ಷಣಿಕ ಹಾಗೂ ಆರ್ಥಿಕ ಸಹಾಯ ಪಡೆದು ನೂತನ ವಿವಿಯನ್ನ ಅಭ್ಯುದಯದೆಡೆಗೆ ಮುನ್ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.
ಓದಿ: ಮಂಗಳೂರಿನಲ್ಲಿ ರೈಲ್ವೆ ಹಳಿ ಮೇಲೆ ಗುಡ್ಡ ಕುಸಿತ: ಕೊಂಕಣ ಮಾರ್ಗ ತಾತ್ಕಾಲಿಕ ಬಂದ್!
ರಾಜ್ಯ ಸರ್ಕಾರ 2020 ಜುಲೈ 27ರಂದು ರಾಯಚೂರು ವಿವಿಗೆ ಅಧಿಸೂಚನೆ ಹೊರಡಿಸಿದೆ. ಕೋವಿಡ್-19 ಕಾರಣಾಂತರಗಳಿಂದ ತಡವಾಗಿದ್ದರೂ ರಾಯಚೂರು ವಿವಿ ವರ್ಷದಲ್ಲೇ ಯುಜಿಸಿ ಮಾನ್ಯತೆ ಸಿಕ್ಕಿದ್ದನ್ನು ಸ್ಮರಿಸಬಹುದಾಗಿದೆ.
