ರಾಯಚೂರು: ಸಿದ್ದರಾಮಯ್ಯ ಅಂಡ್ ಟೀಮ್ ಚಂಬಲ್ ಕಣಿವೆ ಸಂಸ್ಕೃತಿಯಿಂದ ಬಂದವರು ಎಂದು ಮಾಜಿ ಮುಖ್ಯಮಂತ್ರಿ ಹೆಚ್.ಡಿ.ಕುಮಾರಸ್ವಾಮಿ ಅವರು ಸಿದ್ದರಾಮಯ್ಯ ವಿರುದ್ಧ ವಾಗ್ದಾಳಿ ನಡೆಸಿದರು. ರಾಯಚೂರು ಜಿಲ್ಲೆಯಲ್ಲಿ ನಡೆಯುತ್ತಿರುವ ಪಂಚರತ್ನ ಯಾತ್ರೆ ಎರಡನೇ ದಿನವಾದ ಬುಧವಾರ, ಜಿಲ್ಲೆಯ ದೇವದುರ್ಗ ಹಾಗೂ ಜಾಲಹಳ್ಳಿಯಲ್ಲಿ ಯಾತ್ರೆ ಮಾಡುತ್ತಿರುವ ಹೆಚ್ಡಿ ಕುಮಾರಸ್ವಾಮಿ ಮಾಧ್ಯಮದವರೊಂದಿಗೆ ಮಾತನಾಡಿದರು. ಸಿಎಂ ಬೊಮ್ಮಾಯಿ ಅವರದ್ದು ಆಲಿಬಾಬ ಮತ್ತು 40 ಕಳ್ಳರ ತಂಡ ಎನ್ನುವ ವಿಚಾರಕ್ಕೆ ಪ್ರತಿಕ್ರಿಯಿಸಿ ಬಿಜೆಪಿಯದ್ದು ಆಲಿಬಾಬು ಗ್ಯಾಂಗ್ ನಿಜ, ಸಿದ್ದರಾಮಯ್ಯ ಅವರದ್ದು ಯಾವ ಗ್ಯಾಂಗ್, ಸಿದ್ದರಾಮಯ್ಯ ಅವರು ಕೂಡ ಹೇಳಬೇಕಲ್ಲ ಎಂದು ಪ್ರಶ್ನಿಸಿದರು.
ಸಿದ್ದರಾಮಯ್ಯ ಅವರಿಗೆ ತಿಂದ ಅನ್ನ ಅರಗಲ್ವಾ?: ಸಿದ್ದರಾಮಯ್ಯ ಅವರಿಗೆ ತಿಂದ ಅನ್ನ ಅರಗಲ್ವಾ?, ಜೆಡಿಎಸ್ ಬಗ್ಗೆ ಮಾತನಾಡದಿದ್ದರೆ. ಒಂದು ಕಡೆ ಮಾಜಿ ಸಚಿವ ರಾಮಲಿಂಗ ರೆಡ್ಡಿ ಹೇಳುತ್ತಾರೆ, ಬೆಳೆದ ಬಂದ ಪಕ್ಷದ ಬಗ್ಗೆ ಟೀಕೆ ಮಾಡಬಾರದು ಅಂತ, ಈ ಮನುಷ್ಯ ಬೆಳೆದು ಬಂದದ್ದು ಯಾವ ಪಕ್ಷದಿಂದ, ನನ್ನ ಪಕ್ಷ ದರೋಡೆ ಕೆಲಸ ಮಾಡಿಲ್ಲ. ರಿಡೋ ಹಗರಣ ಮಾಡಿ, ಡಿನೋಟಿಫೇಷನ್ 600- 700ಕೋಟಿ ಹಣ ಸಂಗ್ರಹಿದರು, ನಂತರ ಕೆಂಪಯ್ಯ ಆಯೋಗ ಅಂತ ರಚನೆ ಮಾಡಿ ಪ್ರಕರಣ ಮುಚ್ಚಿಹಾಕಿಕೊಂಡರು ಎಂದು ಆರೋಪಿಸಿದರು.
ನೀವೂ ಮತ್ತು ಬಿಜೆಪಿಯವರು ಆಲಿಬಾಬ ಮತ್ತು 40 ಮಂದಿ ಕಳ್ಳರು ಅಂದರೆ ನಾನು ಒಪ್ಪಿಕೊಳ್ಳುತ್ತೇನೆ: ನಂತರ ಮಾತನಾಡಿ ನಿಮ್ಮಂತ ಕೆಲಸ ನಾನು ಮಾಡಿಲ್ಲ, ನೀವೂ ಮತ್ತು ಬಿಜೆಪಿಯವರು ಅಲಿಬಾಬ ಮತ್ತು 40 ಮಂದಿ ಕಳ್ಳರು ಅಂದರೆ ನಾನು ಒಪ್ಪಿಕೊಳ್ಳುತ್ತೇನೆ. ಹಾಗಾದ್ರೆ ಕಾಂಗ್ರೆಸ್ ಪಕ್ಷ ಚಂಬಲ್ ಕಣಿವೆ ದರೋಡೆಕೋರರಾ?, ನಾನು ಹೇಳುತ್ತೇನೆ ಸಿದ್ದರಾಮಯ್ಯ ಅಂಡ್ ಟೀಂ ಚಂಬಲ್ ಕಣಿವೆ ದರೋಡೆಕೋರರ ಸಂಸ್ಕೃತಿಯಿಂದ ಬಂದವರು, ಮಾತನಾಡಬೇಕಾದರೆ ಎಚ್ಚರಿಕೆಯಿಂದ ಮಾತನಾಡಿ, ನಮಗೂ ಪದಬಳಕೆ ಚೆನ್ನಾಗಿ ಕಲಿತಿದ್ದೇವೆ. ನಾವು ಹಳ್ಳಿ ಮಕ್ಕಳೇ, ಬಳಸಬೇಕು ಅಂದರೆ ಬಳಸುತ್ತೇನೆ. ವಿರೋಧ ಪಕ್ಷದ ನಾಯಕ ಸಿದ್ದರಾಮಯ್ಯಗೆ ಟಾಂಗ್ ನೀಡಿದರು.
ನಮ್ಮದು ಸಣ್ಣ ಪಕ್ಷ ದೊಡ್ಡ ದೊಡ್ಡ ಸಾಹುಕಾರರಿಗೆ ಕಟ್ಟಿಕೊಂಡು ನಾನು ಏನು ಮಾಡಲಿ: ಜೆಡಿಎಸ್ಗೆ ಮಾಜಿ ಸಚಿವ ರಮೇಶ್ ಜಾರಕಿಹೊಳಿ ಬರುತ್ತಾರೆ ಎಂಬ ಪ್ರಶ್ನೆಗೆ ಪ್ರಕ್ರಿಯಿಸಿ, ನನ್ನ ಮುಂದೆ ಯಾವ ಚರ್ಚೆಯೂ ಆಗಿಲ್ಲ. ಅದರ ಅವಶ್ಯಕತೆಯೂ ಇಲ್ಲ. ರಮೇಶ್ ಜಾರಕಿಹೊಳಿ ರಾಷ್ಟ್ರೀಯ ಪಕ್ಷದಲ್ಲಿ ಇದ್ದಾರೆ. ರಾಷ್ಟ್ರೀಯ ಪಕ್ಷ ಬಿಟ್ಟು ಅಂತಹ ಮಹಾನ್ ನಾಯಕರು ಎಲ್ಲಾ ಬರುವುದು ಚೆನ್ನಾಗಿ ಕಾಣಲ್ಲ. ನಮ್ಮದು ಸಣ್ಣ ಪಕ್ಷ ದೊಡ್ಡ ದೊಡ್ಡ ಸಾಹುಕಾರರನ್ನು ಕಟ್ಟಿಕೊಂಡು ನಾನು ಏನು ಮಾಡಲಿ. ಬಡವರು, ಬಡ ಹೆಣ್ಣು ಮಕ್ಕಳು ಇವರೇ ನಮ್ಮ ಆಸ್ತಿ ಎಂದು ಹೇಳಿದರು.
ರಮೇಶ್ ಜಾರಕಿಹೊಳಿ ಸಿಡಿ ಪ್ರಕರಣ ಕುರಿತು ಪ್ರತಿಕ್ರಿಯಿಸಿ, ರಾಜ್ಯ ಮತ್ತು ಕೇಂದ್ರದಲ್ಲಿ ಅವರದ್ದೇ ಸರ್ಕಾರ ಇದೆ. ರಾಜ್ಯದಲ್ಲಿ ಸರ್ಕಾರ ತರಲು ಪಾಪ ಪ್ರಮುಖ ಪಾತ್ರ ವಹಿಸಿದ್ದಾರೆ. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಗೆ ಹೇಳಿ.. ಗೃಹ ಇಲಾಖೆ ಅವರ ಕೈಯಲ್ಲಿ ಇದೆ. ಪಾಪ ತನಿಖೆ ನಡೆಸಿಕೊಳ್ಳಲಿ, ಹೋಗಿ ದೆಹಲಿಯಲ್ಲಿ ಕುಳಿತುಕೊಂಡು. ಯಾವ ಕಾರಣಕ್ಕಾಗಿ ಈ ತರಹ ಸಿಡಿಗಳು ಮಾಡಿಕೊಂಡಿದ್ದಾರೆ. ಸತ್ಯಾಂಶವನ್ನು ಹೊರಗಡೆ ಇಡಲಿ, ಒಳ್ಳೆಯದಿದೆ ಇದರಲ್ಲಿ, ತಪ್ಪೇನು ಇದೆ ಎಂದರು.
ನನಗೆ ರಾಜಕೀಯ ಜನ್ಮ ಕೊಟ್ಟಿದ್ದು ರಾಮನಗರ ಜಿಲ್ಲೆ: ಮಂಡ್ಯ ಮತ್ತು ಚನ್ನಪಟ್ಟಣ ಸ್ಪರ್ಧೆ ಮಾಡುವುದಕ್ಕೆ ಸಂಬಂಧಿಸದಂತೆ ಮಾತನಾಡಿದ ಅವರು, ನನಗೆ ರಾಜಕೀಯ ಜನ್ಮ ಕೊಟ್ಟಿದ್ದು ರಾಮನಗರ ಜಿಲ್ಲೆ. ನಂತರ ರಾಜ್ಯದಲ್ಲಿ ನನ್ನ ಬೆಳವಣಿಗೆಗೆ ಮಂಡ್ಯ ಜನರು ಶಕ್ತಿ ತುಂಬಿದ್ದಾರೆ. ನಾನು ಮಂಡ್ಯ ಜಿಲ್ಲೆಗೆ ಹೊಸದಾಗಿ ಹೋಗಬೇಕಿಲ್ಲ. ಶ್ರೀನಿವಾಸ್ ಅವರು ಯಾವ ಹಿನ್ನೆಲೆಯಲ್ಲಿ ನನಗೆ ಆಹ್ವಾನ ಕೊಟ್ಟಿದ್ದಾರೋ ಗೊತ್ತಿಲ್ಲ. ನನ್ನ ಮೇಲೆ ಇರುವ ಪ್ರೀತಿಯಿಂದ ಹೇಳಿರಬಹುದು. ಮಂಡ್ಯದಲ್ಲಿ ಸಮರ್ಥವಾದ ಅಭ್ಯರ್ಥಿಗಳು ಇದ್ದಾರೆ. ಈ ಬಗ್ಗೆ ಶ್ರೀನಿವಾಸ್ ಅವರ ಜೊತೆ ಚರ್ಚೆ ಮಾಡುತ್ತೇನೆ ಎಂದು ಸ್ಪಷ್ಟನೆ ನೀಡಿದರು.
ಇದನ್ನೂ ಓದಿ:ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಎಲ್ಲಾ ವರ್ಗದ ಜನ ಅಧಿಕಾರಕ್ಕೆ ಬಂದಂತೆ: ಡಿ.ಕೆ.ಶಿವಕುಮಾರ್
