ರಾಯಚೂರು: ಅತ್ಕೂರು ಗ್ರಾಮ ಪಂಚಾಯತ್​ ಚುನಾವಣಾ ಅಧಿಸೂಚನೆ ರದ್ದು

ರಾಯಚೂರಿನ ಅತ್ಕೂರು ಗ್ರಾಮ ಪಂಚಾಯತ್ ಮೀಸಲಾತಿ ಹಾಗೂ ಚುನಾವಣೆ ವೇಳಾಪಟ್ಟಿ ಅಧಿಸೂಚನೆ ಹಿಂಪಡೆಯಲಾಗಿದೆ.

ರಾಯಚೂರು: ಕಲಬುರಗಿ ಹೈಕೋರ್ಟ್ ಪೀಠ ತಡೆಯಾಜ್ಞೆ ನೀಡಿದ ಹಿನ್ನೆಲೆ ರಾಯಚೂರು ತಾಲೂಕು ಅತ್ಕೂರು ಗ್ರಾಮ ಪಂಚಾಯತ್​ ಚುನಾವಣೆಯ ಅಧಿಸೂಚನೆ ಹಿಂಪಡೆಯಲಾಗಿದೆ ಎಂದು ಜಿಲ್ಲಾ ಚುನಾವಣಾಧಿಕಾರಿ ಆರ್.ವೆಂಕಟೇಶ್ ಕುಮಾರ್ ತಿಳಿಸಿದ್ದಾರೆ.

ಜಿಲ್ಲೆಯ ಒಟ್ಟು 176 ಗ್ರಾಮ ಪಂಚಾಯತ್​ಗಳಿಗೆ ಎರಡು ಹಂತಗಳಲ್ಲಿ ಚುನಾವಣೆ ನಡೆಸಲು ಆಯಾ ಗ್ರಾಪಂ​ಗಳಿಗೆ ಮೀಸಲಾತಿ ಹಾಗೂ ವೇಳಾಪಟ್ಟಿ ಅಧಿಸೂಚನೆ ಹೊರಡಿಸಲಾಗಿತ್ತು. ಆದರೆ ಅತ್ಕೂರು ಗ್ರಾಪಂನ ಕೆಲ ವಾರ್ಡ್​ಗಳ ಮೀಸಲಾತಿ ಪ್ರಶ್ನಿಸಿ ಕಲಬುರಗಿ ಹೈಕೋಟ್​ ಪೀಠದಲ್ಲಿ ಅರ್ಜಿ ಸಲ್ಲಿಸಲಾಗಿತ್ತು. ಅರ್ಜಿ ವಿಚಾರಣೆ ನಡೆಸಿದ ಹೈಕೋರ್ಟ್ ಪೀಠ, ಸೆ. 11ರಂದು ಹೊರಡಿಸಿದ್ದ ಅತ್ಕೂರು ಗ್ರಾಮ ಪಂಚಾಯತ್​ ಮೀಸಲಾತಿ ಆದೇಶಕ್ಕೆ ತಡೆಯಾಜ್ಞೆ ನೀಡಿ ಆದೇಶಿಸಿದೆ.

ಹೀಗಾಗಿ ಅತ್ಕೂರು ಗ್ರಾಮ ಪಂಚಾಯತ್​ಗೆ ಹೊರಡಿಸಲಾಗಿದ್ದ ಮೀಸಲಾತಿ ಹಾಗೂ ಚುನಾವಣಾ ವೇಳಾಪಟ್ಟಿ ಅಧಿಸೂಚನೆ ಹಿಂಪಡೆಯಲಾಗಿದೆ ಎಂದು ಜಿಲ್ಲಾ ಚುನಾವಣಾಧಿಕಾರಿ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.