ಮೈಸೂರು: ಕೊರೊನಾ ಪಿಡುಗಿನ ಹಿನ್ನೆಲೆ ರಾಜ್ಯದ ಪ್ರವಾಸಿ ತಾಣಗಳು ಪ್ರವಾಸಿಗರಿಲ್ಲದೆ ಸೊರಗಿವೆ. ಇನ್ನು ಪ್ರವಾಸಿ ಸ್ಥಳಗಳಿಗೆ ಭೇಟಿ ನೀಡಲು ಪ್ರವಾಸಿಗರು ಹಿಂದೇಟು ಹಾಕುತ್ತಿದ್ದಾರೆ. ಈ ಮಧ್ಯೆ ಮೈಸೂರಿನಲ್ಲಿ ಆರಂಭಿಸಲಾಗಿರುವ ಪಾರಂಪರಿಕ ರೈಲ್ವೆ ಮ್ಯೂಸಿಯಂಅನ್ನು ಪ್ರವಾಸಿಗರ ಅನುಕೂಲಕ್ಕಾಗಿ ಆನ್ಲೈನ್ನಲ್ಲೂ ವೀಕ್ಷಿಸುವ ವ್ಯವಸ್ಥೆ ಕಲ್ಪಿಸಲಾಗಿದೆ.
ದೇಶದ ಪಾರಂಪರಿಕ ರೈಲ್ವೆ ನಿಲ್ದಾಣದಲ್ಲಿ ಒಂದಾದ ಸಾಂಸ್ಕೃತಿಕ ನಗರಿಯ ರೈಲ್ವೆ ನಿಲ್ದಾಣ ಬೆಳೆದು ಬಂದ ಇತಿಹಾಸ ಕುರಿತ ದೊಡ್ಡ ಸಂಗ್ರಹಾಲಯವೇ ಈ ಮ್ಯೂಸಿಯಂನಲ್ಲಿದೆ. ಇಲ್ಲಿ ಕೋಚ್ ಕೆಫೆ, ಆಡಿಯೋ ವಿಡಿಯೋ ದೃಶ್ಯ ಕೇಂದ್ರ ರೈಲ್ವೆ ಇತಿಹಾಸದಿಂದ ಇಲ್ಲಿಯವರೆಗಿನ ವಿವಿಧ ಬಗೆಯ ಉಗಿಬಂಡಿಗಳು, ಡ್ರ್ಯಾಗನ್ ಹಾಗೂ ದೂರ ಸಂಪರ್ಕದ ಹಳೆಯ ಉಪಕರಣಗಳು ಈ ಮ್ಯೂಸಿಯಂನಲ್ಲಿ ಇಡಲಾಗಿದೆ. ಮೈಸೂರಿನ ರಾಜ ಕುಟುಂಬದ ಪ್ರಾಚೀನ ವಸತಿ ಕೊಠಡಿಗಳು ಹಾಗೂ ಅಪರೂಪದ ಚಿತ್ರಗಳು ಇಲ್ಲಿ ಕಾಣಸಿಗುತ್ತದೆ.
ಕೇಂದ್ರ ಸಚಿವರಿಂದ ಉದ್ಘಾಟನೆಗೆ ಚಿಂತನೆ:
ಈ ವೇಳೆ ಮಾತನಾಡಿದ ಸಂಸದ ಪ್ರತಾಪ್ ಸಿಂಹ, ಮೈಸೂರಿನ ಈ ರೈಲ್ವೆ ಮ್ಯೂಸಿಯಂ ಅನ್ನು ಉದ್ಘಾಟನೆ ಮಾಡಲು ಕೇಂದ್ರ ಸಚಿವರಾದ ಸುರೇಶ್ ಅಂಗಡಿ ಮತ್ತು ಸಿಟಿ ರವಿ ಅವರ ಸಮಯವನ್ನು ಕೇಳಲಾಗಿದ್ದು, ಅವರು ಸಮಯ ಕೊಟ್ಟ ನಂತರ ಉದ್ಘಾಟನೆ ಮಾಡಿಸಲಾಗುವುದು ಎಂದರು.
ಮೈಸೂರನ್ನು ನೋಡಲು ಬರುವ ಪ್ರವಾಸಿಗರು ಅರಮನೆ, ಚಾಮುಂಡಿ ಬೆಟ್ಟ, ಮೃಗಾಲಯ ಜೊತೆಗೆ ಇನ್ನು ಮುಂದೆ ರೈಲ್ವೆ ಮ್ಯೂಸಿಯಂ ಅನ್ನು ನೋಡಬಹುದು. ಅಲ್ಲದೆ ಮ್ಯೂಸಿಯಂ ಅನ್ನು ಚೆನ್ನಾಗಿ ಅಭಿವೃದ್ಧಿ ಪಡಿಸಿರುವ ನೈರುತ್ಯ ರೈಲ್ವೆ ಮೈಸೂರು ವಿಭಾಗಿಯ ವ್ಯವಸ್ಥಾಪಕಿ ಅಪರ್ಣಾ ಗರ್ಗ್ ಅವರಿಗೆ ಧನ್ಯವಾದ ತಿಳಿಸಿದರು.
