ಮೈಸೂರು: ದಿನದಿಂದ ದಿನಕ್ಕೆ ಪೆಟ್ರೋಲ್ ಮತ್ತು ಡೀಸೆಲ್ ಬೆಲೆ ಏರುತ್ತಲೇ ಇದ್ದು, ವಾಹನ ಸವಾರರು ಹಿಡಿಶಾಪ ಹಾಕುವಂತಾಗಿದೆ. ಹೀಗಾಗಿ ಜನತೆ ಸಹ ಎಲೆಕ್ಟ್ರಿಕ್ ವಾಹನಗಳ ಕಡೆ ಇತ್ತೀಚಿಗೆ ಗಮನ ಹರಿಸುತ್ತಿದ್ದು, ಮಾರುಕಟ್ಟೆ ಸಹ ಬೆಳೆಯುತ್ತಿದೆ. ಇದರ ನಡುವೆ ಇಂಜಿನಿಯರಿಂಗ್ ವಿದ್ಯಾರ್ಥಿಗಳ ತಂಡ ಹಳೆಯ ಕಾರುಗಳನ್ನು ಪರಿಸರ ಸ್ನೇಹಿ ಎಲೆಕ್ಟ್ರಿಕ್ ಕಾರುಗಳಾಗಿ ಪರಿವರ್ತಿಸಿ ಹೊಸ ಪ್ರಯೋಗದಲ್ಲಿ ಯಶಸ್ವಿಯಾಗಿದ್ದಾರೆ.
10 ವರ್ಷ ಹಳೆಯದಾದ ಟಾಟಾ ನ್ಯಾನೋ ಕಾರು ಬಳಸಿಕೊಂಡು ಇದಕ್ಕೆ ವಿದ್ಯುತ್ ಮೋಟಾರ್ ನಿಯಂತ್ರಕ ಬ್ಯಾಟರಿ ಅಳವಡಿಸಿ ಕೇವಲ 96,659 ವೆಚ್ಚದಲ್ಲಿ ಇಂಧನ ಕಾರನ್ನು ಎಲೆಕ್ಟ್ರಿಕ್ ಕಾರನ್ನಾಗಿ ಬದಲಾವಣೆ ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ. ನಗರದ ವಿದ್ಯಾವರ್ಧಕ ಇಂಜಿನಿಯರಿಂಗ್ ಕಾಲೇಜಿನ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ವಿದ್ಯಾರ್ಥಿಗಳು ಈ ಕಾರ್ಯ ಮಾಡಿ ತೋರಿಸಿದ್ದಾರೆ.
ನಗರದ ಪ್ರಮುಖ ಇಂಜಿನಿಯರಿಂಗ್ ಕಾಲೇಜುಗಳಲ್ಲಿ ಒಂದಾದ ವಿದ್ಯಾವರ್ಧಕ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಅಂತಿಮ ವರ್ಷದ ಮೆಕ್ಯಾನಿಕಲ್ ಇಂಜಿನಿಯರಿಂಗ್ ವಿಭಾಗದ ವಿಧ್ಯಾರ್ಥಿಗಳ ತಂಡವು ಹಳೆಯ ಐಸಿಎಂಜಿನ್ ಅಂದರೆ ಪೆಟ್ರೋಲ್ ಅಥವಾ ಡೀಸೆಲ್ ಕಾರನ್ನು ಎಲೆಕ್ಟ್ರಿಕ್ ಕಾರನ್ನಾಗಿ ಪರಿವರ್ತಿಸಿದ್ದಾರೆ.
ಅಂತಿಮ ವರ್ಷದ ಮೆಕಾನಿಕಲ್ ಇಂಜಿನಿಯರಿಂಗ್ ವಿದ್ಯಾರ್ಥಿಗಳಿಗೆ ಇದೊಂದು ಅಧ್ಯಯನ ಪ್ರಾಜೆಕ್ಟ್ ಆಗಿರುವ ಕಾರಣ ವಿದ್ಯಾರ್ಥಿಗಳು 10 ವರ್ಷ ಹಳೆಯ ನ್ಯಾನೊ ಕಾರನ್ನು 41,500 ರೂ.ಗೆ ಖರೀದಿ ಮಾಡಿ ಅದರ ಇಂಜಿನ್ ತೆಗೆದು ಅದಕ್ಕೆ 96,659 ರೂ. ವೆಚ್ಚ ಮಾಡಿ ಎಲೆಕ್ಟ್ರಿಕ್ ಬ್ಯಾಟರಿ ಮತ್ತು ಮೋಟರ್ ಅನ್ನು ಅಳವಡಿಸಿ ಪರಿಸರ ಸ್ನೇಹಿ ಕಾರನ್ನಾಗಿ ಪರಿವರ್ತಿಸಿದ್ದಾರೆ.
ಈ ಎಲೆಕ್ಟ್ರಿಕ್ ಕಾರು ಸಂಪೂರ್ಣ ಚಾರ್ಜ್ ಆಗಲು 8 ಗಂಟೆ ಸಮಯವನ್ನು ತೆಗೆದುಕೊಳ್ಳುತ್ತದೆ, ಒಮ್ಮೆ ಸಂಪೂರ್ಣ ಚಾರ್ಜ್ ಆದರೆ 40ಕೀ.ಮಿ ವರೆಗೂ ಓಡಿಸಬಹುದಾಗಿದೆ ಎಂದು ವಿವಿಸಿಇ ಕಾಲೇಜಿನ ಮೆಕಾನಿಕಲ್ ಇಂಜಿನಿಯರ್ ವಿಭಾಗದ ಸಹಾಯಕ ಪ್ರಾಧ್ಯಾಪಕರಾದ ಡಿ.ಎಸ್ ರಕ್ಷಿತ್ ಗೌಡ ಅವರು ವಿವರಿಸಿದ್ದಾರೆ.
ಅನುಕೂಲವೇನು?
ಈ ರೀತಿ ಹಳೆಯ ಪೆಟ್ರೋಲ್ ಮತ್ತು ಡೀಸೆಲ್ ವಾಹನಗಳಿಗೆ ಹೆಚ್ಚಿನ ಶಕ್ತಿಯ ಬ್ಯಾಟರಿ ಹಾಗೂ ಮೋಟಾರ್ ಅಳವಡಿಸಿದರೆ ದೊಡ್ದ ವಾಹನಗಳನ್ನು ಇ - ವಾಹನವಾಗಿ ಪರಿವರ್ತಿಸಬಹುದಾಗಿದ್ದು, ಅದರಿಂದ ನಾವು ಅನುಸರಿಸಿದ ಈ ತಂತ್ರಜ್ಞಾನದ ಪೇಟೆಂಟ್ಗಾಗಿ ಅರ್ಜಿ ಹಾಕಿದ್ದಾರಂತೆ. ದೇಶದಲ್ಲಿ 15 ವರ್ಷ ಹಳೆಯ ಪೆಟ್ರೋಲ್ ಮತ್ತು ಡೀಸೆಲ್ ವಾಹನಗಳನ್ನು ನಿಷೇಧಿಸುವ ಬಗ್ಗೆ ಕೇಂದ್ರ ಸರ್ಕಾರ ಹೊಸ ನೀತಿ ಜಾರಿ ಮಾಡಲು ಮುಂದಾಗಿದೆ.
ಇದರಿಂದ ಲಕ್ಷಾಂತರ ವಾಹನಗಳು ಗುಜರಿ ಸೇರಬೇಕಾಗುತ್ತದೆ ಅಂತಹ ವಾಹನಗಳನ್ನು ಇ - ವಾಹನವಾಗಿ ಪರಿಸರ ಸ್ನೇಹಿಯಾಗಿ ಸಹ ಬಳಸಬಹುದು ಇದಕ್ಕೆ ಕೇಂದ್ರ ಸರ್ಕಾರ ಪ್ರೋತ್ಸಾಹ ನೀಡಿದರೆ ಒಳ್ಳೆಯದು ಎಂದು ವಿದ್ಯಾರ್ಥಿ ರಕ್ಷಿತ್ ಗೌಡ ಅಭಿಪ್ರಾಯಪಟ್ಟಿದ್ದಾರೆ.
