ಮಂಡ್ಯ: ಮದ್ದೂರು ಕ್ಷೇತ್ರದ ಸಚಿವ ಡಿ.ಸಿ. ತಮ್ಮಣ್ಣ ಸಚಿವರಾಗಲು ಅಂಬರೀಶ್ ಕಾರಣವಂತೆ. ಈಗ ಅನ್ನ ಉಂಡ ಮನೆಗೆ ಏನು ಮಾಡುತ್ತಿದ್ದಾರೆ ಅನ್ನೋದು ಗೊತ್ತಿದೆ ಎಂದು ಸಚಿವ ತಮ್ಮಣ್ಣಗೆ ಸುಮಲತಾ ಅಂಬರೀಶ್ ಟಾಂಗ್ ನೀಡಿದರು.
ನಗರಕೆರೆಯಲ್ಲಿ ಪ್ರಚಾರದ ವೇಳೆ ಸಚಿವ ಡಿ.ಸಿ. ತಮ್ಮಣ್ಣ ವಿರುದ್ಧ ಸುಮಲತಾ ವಾಗ್ದಾಳಿ ನಡೆಸಿದ ಅವರು, ಅಂಬರೀಶ್ ಏನು ಮಾಡಿಲ್ಲ ಅಂತಾರೆ. ಏನು ಮಾಡಿದ್ದಾರೆ ಅಂತಾ ಅವ್ರ ಆತ್ಮಸಾಕ್ಷಿ ಕೇಳಿ‌ಕೊಳ್ಳಲಿ. ಇವತ್ತು ಸಚಿವರಾಗಿ ಅಧಿಕಾರ ನಡೆಸ್ತಿರೋದಕ್ಕೇ ಯಾರು ಕಾರಣ ಅಂತಾ ಕೇಳಿ. ಅವತ್ತು ಅಂಬಿ ಮನೆಯಲ್ಲಿ ಕುಳಿತು ಸಚಿವ ಸ್ಥಾನ ಸಿಗಲಿಲ್ಲ ಅಂತಾ ಚಪಡಿಸುತ್ತಿದ್ದಾಗ, ಅಂಬಿ ಯಾರಿಗೆ ಫೋನ್ ಮಾಡಿ ಇವರನ್ನು ಸಚಿವರನ್ನಾಗಿ ಮಾಡಿದರು ಅಂತಾ ನೆನಪಿಸಿಕೊಳ್ಳಲಿ ಎಂದು ಗುಡುಗಿದರು.
ಸಚಿವರನ್ನು ಚಿಕ್ಕವಯಸ್ಸಿನಲ್ಲಿ ಓದಿಸಿ ಬೆಳೆಸಿದ್ದು ನಮ್ಮ ಮಾವ ಹುಚ್ಚೇಗೌಡರು. ಅನ್ನ ಹಾಕಿ, ಓದಿಸಿ, ಬೆಳೆಸಿದ ಮನೆಗೆ ಈಗ ಇವರು ಏನೆಲ್ಲಾ ಮಾಡುತ್ತಿದ್ದಾರೆ. ಸ್ವಲ್ಪವೂ ಕೃತಜ್ಞತೆ ಇಲ್ಲದ ಮನುಷ್ಯ. ಇಷ್ಟೆಲ್ಲ ವಯಸ್ಸಾಗಿ ಅನುಭವ ಪಡೆದಿದ್ದರೂ ಹೆಣ್ಮಕ್ಕಳ ಬಗ್ಗೆ ಹೀಗೆ ಹಗುರವಾಗಿ ಮಾತನಾಡ್ತಾರೆ. ಇವತ್ತು ಅಧಿಕಾರಕ್ಕಾಗಿ ಸಂಬಂಧಗಳನ್ನು ಕಳೆದುಕೊಂಡಿದ್ದಾರೆ. ಸಂಬಂಧದಲ್ಲಿ ಅಂಬರೀಶ್ ಅಣ್ಣನಾಗಬೇಕಿದ್ದು, ಈಗ ಅದೆಲ್ಲವನ್ನು ಮರೆತಿದ್ದಾರೆ ಎಂದು ಸಾರಿಗೆ ಸಚಿವರ ಹೀಯಾಳಿಕೆ ಮಾತಿಗೆ ಸುಮಲತಾ ತಿರುಗೇಟು ಕೊಟ್ಟರು.
