ಕೊಪ್ಪಳ: ಸಾಲಸೂಲ ಮಾಡಿ ಟೊಮೇಟೊ ಬೆಳೆದಿದ್ದ ಜಿಲ್ಲೆಯ ರೈತರು ಈಗ ಸಂಕಷ್ಟಕ್ಕೆ ಈಡಾಗಿದ್ದಾರೆ. ಮಾರ್ಕೆಟ್ನಲ್ಲಿ ಟೊಮೇಟೊ ದರ ಪಾತಾಳಕ್ಕೆ ಕುಸಿದ ಪರಿಣಾಮ ರೈತರು ಟೊಮೇಟೊ ಹಣ್ಣನ್ನು ಕಟಾವು ಮಾಡದೇ ಹಾಗೆ ಜಮೀನಿನಲ್ಲಿಯೇ ಬಿಟ್ಟಿದ್ದಾರೆ. ಹೀಗಾಗಿ ಜಿಲ್ಲೆಯ ನೂರಾರು ಎಕರೆಯಲ್ಲಿ ಬೆಳೆದ ಟೊಮೇಟೊ ಹಣ್ಣು ನೆಲವನ್ನು ಕೆಂಪಾಗಿಸಿದೆ.
ಹೌದು, ಮಾರುಕಟ್ಟೆಯಲ್ಲಿ ರೈತರಿಂದ ಖರೀದಿಯಾಗುವ ಟೊಮೇಟೊ ಬೆಲೆ ಪಾತಾಳಕ್ಕೆ ಕುಸಿದಿದೆ. ಸುಮಾರು 7 ರಿಂದ 8 ಕೆಜಿಯ ಟೊಮೇಟೊ ಹಣ್ಣಿರುವ ಒಂದು ಬುಟ್ಟಿಗೆ ಮಾರುಕಟ್ಟೆಯಲ್ಲಿ ಕೇವಲ 20 ರಿಂದ 25 ರೂಪಾಯಿ ದರದಲ್ಲಿ ಖರೀದಿಸಲಾಗುತ್ತದೆ. ಟೊಮೇಟೊ ಬೆಲೆ ಕುಸಿತ ಕಂಡಿರುವುದು ಟೊಮೇಟೊ ಬೆಳೆದ ರೈತರ ಕಣ್ಣೀರಿಗೆ ಕಾರಣವಾಗಿದೆ. ಒಂದು ವೇಳೆ ಕಟಾವು ಮಾಡಿಸಿದರೆ ಕಟಾವು ಮಾಡಿದ ಕಾರ್ಮಿಕರಿಗೆ ಕೂಲಿ ನೀಡಲು ಸಹ ಹಣ ಬರುತ್ತಿಲ್ಲ. ಇದರಿಂದಾಗಿ ಟೊಮೇಟೊ ಹಣ್ಣನ್ನು ಕಟಾವು ಮಾಡದೆ ರೈತರು ಜಮೀನಿನಲ್ಲಿ ಹಾಗೆಯೇ ಬಿಟ್ಟಿದ್ದಾರೆ.
ಕೃಷಿ ಇಲಾಖೆಯ ಅಧಿಕಾರಿಗಳು ನೀಡಿದ ಅಧಿಕೃತ ಮಾಹಿತಿ ಪ್ರಕಾರ, ಜಿಲ್ಲೆಯಲ್ಲಿ ಸುಮಾರು 600 ಹೆಕ್ಟೇರ್ಗೂ ಅಧಿಕ ಪ್ರದೇಶದಲ್ಲಿ ಟೊಮೇಟೊ ಬೆಳೆಯಲಾಗಿದೆ. ಈ 600 ಕ್ಕೂ ಹೆಚ್ಚು ಹೆಕ್ಟೇರ್ ಪ್ರದೇಶದಲ್ಲಿ ಟೊಮೇಟೊ ಫಸಲು ಬಂದಿದೆ. ಅಲ್ಲದೆ ರೈತರು ಸಸಿ ನಾಟಿ ಮಾಡಿದ್ದಾರೆ. ಈಗ ಟೊಮೇಟೊ ಬೆಲೆ ಕುಸಿತ ಕಂಡಿರೋದು ರೈತರಲ್ಲಿ ನಿರಾಸೆ ಮೂಡಿಸಿದೆ. ಹೀಗಾಗಿ ಜಿಲ್ಲೆಯ ನೂರಾರು ಹೆಕ್ಟೇರ್ ಪ್ರದೇಶದಲ್ಲಿ ಟೊಮೇಟೊ ಕಟಾವು ಆಗದೆ ಹಾಗೆ ಬಿಟ್ಟಿದ್ದಾರೆ.
ಸಾಲ ಮಾಡಿ ಟೊಮೇಟೊ ಬೆಳೆದಿದ್ದೇವೆ. ಬೀಜ, ಗೊಬ್ಬರ, ಬೆಳೆ ನಿರ್ವಹಣೆ ಸೇರಿ ಎಕರೆಗೆ ಏನಿಲ್ಲವೆಂದರೂ 20 ಸಾವಿರ ರೂಪಾಯಿ ಖರ್ಚು ಬರುತ್ತದೆ. ಆದರೆ, ರೈತರ ಈ ಶ್ರಮಕ್ಕೆ ಬೆಲೆ ಇಲ್ಲದಂತಾಗಿದೆ. ಮಾರ್ಕೆಟ್ನಲ್ಲಿ ಟೊಮೇಟೊಗೆ ಧಾರಣೆ ಸರಿ ಇಲ್ಲ. ಟೊಮೇಟೊ ಹರಿಯದೇ ಹಾಗೆ ಬಿಟ್ಟಿದ್ದೇವೆ. ಕೆಲ ರೈತರು ಊರಲ್ಲಿನ ದೇವರ ಜಾತ್ರೆಯ ದಾಸೋಹಕ್ಕಾದರೂ ಉಪಯೋಗವಾಗಲಿ ಎಂದು ಟೊಮೇಟೊ ಹರಿದು ಕೊಡುತ್ತಿದ್ದಾರೆ. ಬಹುತೇಕರು ಜಮೀನಿನಲ್ಲಿ ಹಾಗೆಯೇ ಬಿಟ್ಟಿದ್ದಾರೆ ಎನ್ನುತ್ತಾರೆ ಟೊಮೇಟೊ ಬೆಳೆದ ಬಹದ್ದೂರಬಂಡಿ ಗ್ರಾಮದ ರೈತ ಪೀರಸಾಬ ಸಣ್ಣಮಸೂತಿ ಅವರು.
ರೈತರು ಬೆಳೆದ ಬೆಳೆಗಳಿಗೆ ಸರಿಯಾಗಿ ಬೆಲೆ ಸಿಗದೆ ತೊಂದರೆಗೊಳಗಾಗುತ್ತಿದ್ದಾರೆ. ಬೆಲೆ ಕುಸಿತ ಕಂಡಾಗ ರೈತರ ಎಲ್ಲ ಉತ್ಪನ್ನಗಳನ್ನು ಸರ್ಕಾರ ಬೆಂಬಲ ಬೆಲೆಯಲ್ಲಿ ಖರೀದಿಸಬೇಕು. ಈ ಮೂಲಕ ರೈತರ ನೆರವಿಗೆ ಸರ್ಕಾರ ಬರಬೇಕು. ಕಳೆದ ವರ್ಷದಿಂದ ರೈತರು ನಿರಂತರವಾಗಿ ತೊಂದರೆ ಅನುಭವಿಸುತ್ತಿದ್ದಾರೆ. ಹೀಗಾಗಿ ಸರ್ಕಾರ ರೈತರ ನೆರವಿಗೆ ಧಾವಿಸಬೇಕು ಎಂದು ಆಗ್ರಹಿಸುತ್ತಾರೆ ಬಹದ್ದೂರಬಂಡಿ ಗ್ರಾಮ ಪಂಚಾಯತ್ ಸದಸ್ಯ ಯೋಗಾನಂದ ಲೇಬಗೇರಿ.
ಒಟ್ಟಿನಲ್ಲಿ ಉತ್ತಮ ಬೆಲೆ ನಿರೀಕ್ಷೆಯಲ್ಲಿದ್ದ ಟೊಮೇಟೊ ಬೆಳೆದ ರೈತರು ಬೆಲೆ ಕುಸಿತದ ಕಾರಣದಿಂದಾಗಿ ಕೈಗೆ ಬಂದ ತುತ್ತು ಬಾಯಿಗೆ ಬಾರದಂತಹ ಪರಿಸ್ಥಿತಿಯನ್ನು ಎದುರಿಸುವಂತಾಗಿದೆ.
