ಕುಷ್ಟಗಿ(ಕೊಪ್ಪಳ): ರುದ್ರಭೂಮಿಗೆ ಶವ ಸಾಗಿಸಲು ಮುಕ್ತಿ ವಾಹನದ ವ್ಯವಸ್ಥೆಯನ್ನ ಮಾಡುವುದು ಮಠಮಾನ್ಯಗಳ ಕೆಲಸ. ಆದರೆ, ಕುಷ್ಟಗಿಯ ವೀರಶೈವ ಲಿಂಗಾಯತ ಸೇವಾ ಟ್ರಸ್ಟ್ಮುಕ್ತಿ ವಾಹನದ ವ್ಯವಸ್ಥೆ ಮಾಡಿರುವುದು ಸಮಾಜ ಮೆಚ್ಚುವ ಕೆಲಸ ಎಂದು ಕುಷ್ಟಗಿ ಮದ್ದಾನೇಶ್ವರ ಮಠದ ಶ್ರೀ ಕರಿಬಸವ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.
ಇಲ್ಲಿನ ಶ್ರೀ ಬುತ್ತಿ ಬಸವೇಶ್ವರ ದೇವಸ್ಥಾನದಲ್ಲಿ ವೀರಶೈವ ಲಿಂಗಾಯತ ಸೇವಾ ಟ್ರಸ್ಟ್ನ ನೂತನ ಮುಕ್ತಿ ವಾಹನದ ಪೂಜೆ ನೆರವೇರಿಸಿ ಮಾತನಾಡಿದ ಅವರು, ವೀರಶೈವ ಲಿಂಗಾಯತ ಸೇವಾ ಟ್ರಸ್ಟ್ನ ಸ್ತುತ್ಯಾರ್ಹ ಸೇವೆ ಸುವರ್ಣಾಕ್ಷರದಿಂದ ಬರೆದಿಡುವಂತದ್ದಾಗಿದೆ. ಬಹು ದಿನಗಳ ಕನಸು ಇದೀಗ ಈಡೇರಿದೆ. ಕುಟುಂಬದಲ್ಲಿ ತಂದೆ ಸತ್ತರೂ, ಮಕ್ಕಳು ತಂದೆ ಶವ ಮುಟ್ಟುವುದಿಲ್ಲ, ಸಮಾಜದವರೇ ಮುಂದಾಗುತ್ತಿರುವ ಸಂಪ್ರದಾಯದಲ್ಲಿದ್ದೇವೆ. ವೀರಶೈವ ಧರ್ಮ ಎಲ್ಲಾ ಧರ್ಮಗಳನ್ನು ಅಪ್ಪಿಕೊಳ್ಳುವ ಧರ್ಮವಾಗಿದೆ ಎಂದರು.
ಮಾಜಿ ಶಾಸಕ ಕೆ.ಶರಣಪ್ಪ, ಅಮರೇಶ್ವರ ಶೆಟ್ಟರ್, ದೊಡ್ಡಬಸವ ಬಯ್ಯಾಪೂರ, ದೇವೇಂದ್ರಪ್ಪ ಬಳೂಟಗಿ, ವೀರಶೈವ ಸೇವಾ ಟ್ರಸ್ಟ್ ಗೌರವಾಧ್ಯಕ್ಷ ರವಿಕುಮಾರ ಹಿರೇಮಠ, ಅಧ್ಯಕ್ಷ ಮಲ್ಲಿಕಾರ್ಜುನ ಮಸೂತಿ ಸೇರಿ ಸರ್ವ ಸಮಾಜದ ಅಧ್ಯಕ್ಷರು ಪಾಲ್ಗೊಂಡಿದ್ದರು.
