ಗಂಗಾವತಿ: ಪೌರ ನೌಕರರ ದಿನಾಚರಣೆ ಅಂಗವಾಗಿ ಯುವ ವಕೀಲ ಹೆಚ್.ಎಂ. ಮಂಜುನಾಥ ಎಂಬುವರು ಸಾಮಾಜಿಕ ಜಾಲತಾಣದಲ್ಲಿ ಒಂದು ಫೋಟೊವನ್ನು ಹರಿಬಿಡುವ ಮೂಲಕ ಕಾರ್ಮಿಕರ ಕುರಿತು ಜಾಗೃತಿ ಮೂಡಿಸಿದ್ದಾರೆ.
ಸಾರ್ವಜನಿಕ ಸ್ಥಳಗಳಲ್ಲಿ ಉಗುಳಿರುವುದನ್ನು ಪೌರ ಕಾರ್ಮಿಕ ಮಹಿಳೆ ಸ್ವಚ್ಛಗೊಳಿಸುತ್ತಿರುವ ಈ ಫೋಟೊವನ್ನು ಫೇಸ್ಬುಕ್, ವಾಟ್ಸ್ಯಾಪ್ ಮೂಲಕ ಪೋಸ್ಟ್ ಮಾಡಿದ್ದು, ಈಗ ಅದು ಸಖತ್ ಸದ್ದು ಮಾಡುತ್ತಿದೆ.
ಸಾರ್ವಜನಿಕ ಸ್ಥಳಗಳ ಬಗ್ಗೆ ಸಾಮಾಜಿಕ ಕಳಕಳಿ ಹೊಂದಿರುವ ಈ ಫೋಟೊ, ಪೌರ ಕಾರ್ಮಿಕರ ಬಗೆಗೆ ಗೌರವ ಮೂಡುವಂತೆ ಮಾಡಿದೆ. ನಿತ್ಯವೂ ಸ್ವಚ್ಛಗೊಳಿಸುವ ಕಾಯಕದಲ್ಲಿರುವ ಪೌರ ನೌಕರರ ಬಗ್ಗೆ ಸ್ವಲ್ಪ ಕಾಳಜಿ ಇರಲಿ ಎಂಬುದು ಇಲ್ಲಿನ ಆಶಯವಾಗಿದೆ.
ಎಲೆ, ಅಡಿಕೆ, ತಂಬಾಕು, ಗುಟ್ಕಾ ಹೀಗೆ ಇನ್ನಿತರ ವಸ್ತುಗಳನ್ನು ತಿಂದು, ಸಾರ್ವಜನಿಕ ಸ್ಥಳಗಳಲ್ಲಿ ಉಗುಳುವುದನ್ನು ನಿಲ್ಲಿಸಲು ಈ ಜಾಗೃತಿ ಮೂಡಿಸಲಾಗಿದೆ.
ನಿಮ್ಮ ತಾಯಿಯಿಂದ ಈ ಕೆಲಸ ಮಾಡಿಸಲು ಇಷ್ಟಪಡದ ನೀವು, ಬೇರೆ ತಾಯಂದಿರು ಏಕೆ ನೀವು ಉಗುಳಿದ್ದನ್ನು ಒರೆಸಬೇಕು ಎಂದು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಿರುವ ಫೋಟೊ ಕೆಳಗೆ ವಕೀಲ ಮಂಜುನಾಥ್ ಬರೆದಿದ್ದರು. ನೋಡುಗರಲ್ಲಿ ಇದು ತುಂಬ ಪರಿಣಾಮ ಸಹ ಬೀರುವಂತಿದೆ.
