ಕುಷ್ಟಗಿ(ಕೊಪ್ಪಳ): ಪಟ್ಟಣದ ಹೊರವಲಯದಲ್ಲಿರುವ ಚತುಷ್ಪಥ ರಾಷ್ಟ್ರೀಯ ಹೆದ್ದಾರಿ - 50ರ ಕೃಷ್ಣಗಿರಿ ಕಾಲೋನಿ ಬಳಿ ಅಂಡರ್ಪಾಸ್ ಪಾದಚಾರಿ ಮಾರ್ಗದಲ್ಲಿ ಕಾಟಾಚಾರಕ್ಕೆ ಎಂದು ಪ್ಲಾಸ್ಟಿಕ್ ಶೀಟ್(ಮೇಲ್ಚಾವಣಿ) ಅಳವಡಿಸಲಾಗುತ್ತಿದೆ ಎಂದು ಸ್ಥಳೀಯರು ಆಕ್ರೋಶ ವ್ಯಕ್ತಪಡಿಸಿತ್ತಿದ್ದಾರೆ.
ಅಂಡರ್ಪಾಸ್ ಪಾದಚಾರಿ ಮಾರ್ಗಕ್ಕೆ ಛಾವಣಿ ಇಲ್ಲದೇ ಮಳೆ ನೀರು ನಿಂತು ಉಂಟಾದ ಸಮಸ್ಯೆಯನ್ನು ಸ್ಥಳೀಯರು ಸಂಸದ ಕರಡಿ ಸಂಗಣ್ಣ ಅವರ ಗಮನ ಸೆಳೆದಿದ್ದರು. ಅವರು ಖುದ್ದಾಗಿ ಅಲ್ಲಿಗೆ ಭೇಟಿ ನೀಡಿದ ಬಳಿಕ, ಗುತ್ತಿಗೆ ವಹಿಸಿಕೊಂಡಿರುವ ಒಎಸ್ಇ ಕಂಪನಿ ಎಚ್ಚೆತ್ತುಕೊಂಡು ಇದೀಗ ಪ್ಲಾಸ್ಟಿಕ್ ಛಾವಣಿ ಹೊದಿಕೆಯ ಕೆಲಸ ಕೈಗೆತ್ತಿಕೊಂಡಿದ್ದು, ಸ್ಥಳೀಯರಿಂದ ಅಸಮಾಧಾನ ವ್ಯಕ್ತವಾಗಿದೆ.
ಸಂಬಂಧಿಸಿದ ಒಎಸ್ಇ ಕಂಪನಿ ಸಂಸದರ ಮುಂದೆ ಜಿಐ ಶೀಟ್ (ತಗಡಿನ ಶೀಟ್) ಹಾಕುವುದಾಗಿ ಒಪ್ಪಿಕೊಂಡಿತ್ತು, ಆದರೀಗ ಪ್ಲಾಸ್ಟಿಕ್ ಶೀಟ್ ಅಳವಡಿಸಲಾಗುತ್ತಿದೆ. ಪ್ಲಾಸ್ಟಿಕ್ ಶೀಟ್ ಸುಡು ಬಿಸಿಲನ್ನು ತಡೆದುಕೊಳ್ಳುವ ಸಾಮರ್ಥ್ಯ ಕಡಿಮೆ ಎನ್ನುತ್ತಾರೆ ಕೃಷ್ಣಗಿರಿ ನಿವಾಸಿ - ಸಿವಿಲ್ ಇಂಜಿನಿಯರ್ ವೀರೇಶ ಬಂಗಾರ ಶೆಟ್ಟರ್.
ಪ್ಲಾಸ್ಟಿಕ್ ಶೀಟ್ ಅಳವಡಿಸಿ ಎರಡೇ ವರ್ಷಕ್ಕೆ ಹರಿದು ಹೋಗುವ ಸಾಧ್ಯತೆಗಳಿವೆ. ಸದ್ಯ ಪ್ಲಾಸ್ಟಿಕ್ ಶೀಟ್ ಹೊದಿಕೆಯ ಕಾರ್ಯ ಕಾಟಾಚಾರದ್ದಾಗಿದೆ. ಬಿದ್ದ ಮಳೆ ನೀರು ಹೊರ ಹೋಗದೇ ಅಂಡರ್ಪಾಸ್ನಲ್ಲಿ ಇಳಿಯುವ ಸಾಧ್ಯತೆ ಇದೆ. ಒಎಸ್ಇ ಕಂಪನಿಯು ಜಿಐ ಶೀಟ್ ಅಳವಡಿಸಿಕೊಡುವುದಾಗಿ ಸಂಸದರ ಮುಂದೆ ಒಪ್ಪಿಕೊಂಡು, ಇದೀಗ ಪ್ಲಾಸ್ಟಿಕ್ ಶೀಟ್ ಹಾಕಲು ಮುಂದಾಗಿರುವುದಕ್ಕೆ ಸ್ಥಳೀಯರಿಂದ ವಿರೋಧ ವ್ಯಕ್ತವಾಗಿದೆ.
