ಮುಸ್ಲಿಂ ಮುಖಂಡನಿಂದ ಹಿಂದೂ ಪದ್ಧತಿಯಂತೆ ಸಾಮೂಹಿಕ ವಿವಾಹ ಆಯೋಜನೆ.. ಹಸೆಮಣೆ ಏರಿದ 30 ಜೋಡಿಗಳು

ಮುಸ್ಲಿಂ‌ ಸಮುದಾಯದ ಮುಖಂಡ ವಜೀರ್​ ಅಲಿ ಬಿ. ಗೋನಾಳ ಎಂಬವರ ನೇತೃತ್ವದಲ್ಲಿ ನಡೆದ ಸಾಮೂಹಿಕ ವಿವಾಹ ಕಾರ್ಯಕ್ರಮದಲ್ಲಿ ವಿವಿಧ ಸಮುದಾಯದ 30 ಜೋಡಿಗಳು ಹಸೆಮಣೆ ಏರಿದರು.

ಕುಷ್ಟಗಿ (ಕೊಪ್ಪಳ) : ಮುಸ್ಲಿಂ‌ ಸಮುದಾಯದ ಮುಖಂಡರೋರ್ವರು ಪ್ರತಿ ವರ್ಷದಂತೆ ಈ ವರ್ಷವೂ ಕುಷ್ಟಗಿಯ ಬನ್ನಿ ಮಹಾಂಕಾಳಿ ದೇವಸ್ಥಾನದಲ್ಲಿ ಹಿಂದೂ ಸಂಪ್ರದಾಯದಂತೆ ವಿವಿಧ ಸಮುದಾಯದವರ ವಿವಾಹ ನೆರವೇರಿಸಿದ್ದಾರೆ. ವಜೀರ್​ ಅಲಿ ಬಿ. ಗೋನಾಳ ಎಂಬವರ ನೇತೃತ್ವದಲ್ಲಿ ನಡೆದ ಕಾರ್ಯಕ್ರಮದಲ್ಲಿ ವಿವಿಧ ಸಮುದಾಯದ 30 ಜೋಡಿಗಳು ಹಸೆಮಣೆ ಏರಿದರು.

ಇಲ್ಲಿನ ಬನ್ನಿಕಟ್ಟೆ ಸಂತೆ‌ ಮೈದಾನದಲ್ಲಿರುವ ಬನ್ನಿ ಮಹಾಂಕಾಳಿ ದೇವತೆಗೆ ಕಾರ್ತಿಕ ಮಹೋತ್ಸವದ ಅಂಗವಾಗಿ ಅಭಿಷೇಕ, ವಿಶೇಷ ಪೂಜೆ, ಹೋಮ ಹವನ, ಪೂರ್ಣಾಹುತಿ ಹೋಮ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳು ಜರುಗಿದವು. ಈ ಕಾರ್ಯಕ್ರಮದಲ್ಲಿ ಮದ್ದಾನಿಮಠದ ಕರಿಬಸವ ಶಿವಾಚಾರ್ಯ ಸ್ವಾಮೀಜಿ, ಮುರಡಿ ಮಠದ ಬಸವಲಿಂಗ ಸ್ವಾಮೀಜಿ, ಕುಕನೂರು ಮಹಾದೇವ ಸ್ವಾಮೀಜಿ, ಜೀಗೇರಿ ಸ್ವಾಮೀಜಿ ಹಾಗೂ ಹಜರತ್ ಸಯ್ಯದ ಅಬ್ದುಲ್ ಖಾದ್ರಿ ಫೈಸಲ್ ಪಾಷಾ ಸಾನಿಧ್ಯ ವಹಿಸಿದ್ದರು. ಭಗತ್ ಸಿಂಗ್ ಸಾಂಸ್ಕೃತಿಕ ಕ್ರೀಡಾ ಸಂಸ್ಥೆ, ಬನ್ನಿ ಮಹಾಂಕಾಳಿ ಸೇವಾ ಸಮಿತಿ ಅಧ್ಯಕ್ಷ ವಜೀರ್​ ಅಲಿ ಗೋನಾಳ ಕಾರ್ಯಕ್ರಮದ ನೇತೃತ್ವ ವಹಿಸಿದ್ದರು.

ಮುಸ್ಲಿಂ ಮುಖಂಡನಿಂದ ಹಿಂದೂ ಪದ್ಧತಿಯಂತೆ ಸಾಮೂಹಿಕ ವಿವಾಹ

ಬಳಿಕ ವಿಷ್ಣುತೀರ್ಥ ನಗರದಲ್ಲಿ ನಡೆದ ಸಮಾರಂಭದಲ್ಲಿ ಹೆಚ್ಚುವರಿ ಪೊಲೀಸ್ ಮಹಾ ನಿರ್ದೇಶಕ ಕೆ.ರಾಮಚಂದ್ರರಾವ್, ಅಮರೇಗೌಡ ಪಾಟೀಲ್ ಬಯ್ಯಾಪೂರ, ಮಾಜಿ ಶಾಸಕ ದೊಡ್ಡನಗೌಡ ಪಾಟೀಲ, ಡಾ.ವೃಷಬ್, ಬೆಂಗಳೂರಿನ ಉದ್ಯಮಿ ಜಗನ್ಮೋಹ ರಡ್ಡಿ, ಪುರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ರಾಜೇಶ ಪತ್ತಾರ, ಹಾಲುಮತ ಸಮಾಜದ ಅಧ್ಯಕ್ಷ ಮಲ್ಲಣ್ಣ ಪಲ್ಲೇದ, ಪಕ್ಕೀರಪ್ಪ ಹೊಸಕಲ್, ಅಮರಚಂದ್ ಜೈನ್, ನವ ಕರ್ನಾಟಕ ವೇದಿಕೆ ಅಧ್ಯಕ್ಷ ಸುಬ್ರಹ್ಮಣ್ಯ, ಉದ್ಯಮಿ ರಾಜಕುಮಾರ ಕಾಟ್ವ, ಗಾಯಕಿ ರುಬಿನಾ, ಇನ್ನರ್​​ ವ್ಹೀಲ್ ಕ್ಲಬ್ ಅಧ್ಯಕ್ಷೆ ಸುಮಾ ಬ್ಯಾಳಿ ಮತ್ತಿತರರು ಉಪಸ್ಥಿತರಿದ್ದರು.

ಇದನ್ನೂ ಓದಿ : ಹಿಂದೂ ಮತ್ತು ಮುಸ್ಲಿಂ ಬಾಂಧವ್ಯಕ್ಕೆ ಸಾಕ್ಷಿಯಾದ ವಿಭಜನೆಯ ದುರಂತದ ಸ್ಮರಣೆಯ ದಿನ