ಕುಷ್ಟಗಿ(ಕೊಪ್ಪಳ):ದಾಳಿಂಬೆ ರೈತನಿಗೆ ಉತ್ತಮ ಲಾಭ ತರುವ ಬೆಳೆ. ಆದರೆ ಲಕ್ಷಾಂತರ ರೂಪಾಯಿ ಸಾಲ ಮಾಡಿ ಬೆಳೆದ ದಾಳಿಂಬೆಗೆ ದುಂಡಾಣು ಅಂಗಮಾರಿ ರೋಗ ದಾಳಿ ಮಾಡಿತ್ತು. ಹೀಗಾಗಿ ಈ ರೋಗವನ್ನು ಕಾಲ ಕಾಲಕ್ಕೆ ಔಷಧ ಕ್ರಮಗಳಿಂದ ನಿಯಂತ್ರಿಸಿಕೊಂಡು ಈ ಬೆಳೆ ಬೆಳೆಯುವುದು ರೈತರಿಗೆ ಸವಾಲಿನ ಕೆಲಸ. ಆದರೆ ಕುಷ್ಟಗಿಯ ರೈತ ರಮೇಶ ಕೊನಸಾಗರ ಅವರು ದುಂಡಾಣು ಅಂಗಮಾರಿ ನಿಯಂತ್ರಿಸಿಕೊಂಡು ಈ ಬಾರಿ ಭರ್ಜರಿ ದಾಳಿಂಬೆ ಬೆಳೆದಿದ್ದಾರೆ. ತಾಲೂಕಿನ ನಿಡಶೇಸಿ ಸೀಮಾದಲ್ಲಿರುವ ತಮ್ಮ 13 ಎಕರೆ ಜಮೀನಿನಲ್ಲಿ ಒಟ್ಟು 9 ಎಕರೆ ದಾಳಿಂಬೆ ನಾಟಿ ಮಾಡಿದ್ದು, ಸದ್ಯ 4 ಎಕರೆ ಕಟಾವಿನ ಹಂತದಲ್ಲಿದೆ.
ಕಳೆದ 2019 ರ ಜೂನ್ ತಿಂಗಳಿನಲ್ಲಿ ಗುಜರಾತ್ ರಾಜ್ಯದ ಕೇಡಲ್ನಿಂದ ಪ್ರತಿ ಸಸಿಗೆ 37 ರೂ. ನಂತೆ ಖರೀದಿಸಿ 4 ಎಕರೆ ಪ್ರದೇಶದಲ್ಲಿ 1500 ಗಿಡಗಳನ್ನು ನಾಟಿ ಮಾಡಿದ್ದಾರೆ. ಆರಂಭದಿಂದಲೂ ಹಂತ ಹಂತವಾಗಿ ನಿರ್ವಹಣೆ ವೆಚ್ಚ ಸೇರಿ 6ಲಕ್ಷ ರೂ. ಖರ್ಚಾಗಿದೆ.
2020ರಲ್ಲಿ ಮೊದಲ ಪ್ರಾಯೋಗಿಕ ಕಟಾವಿಗೆ 7 ಟನ್ ಇಳುವರಿ ಬಂದಿತ್ತು. ಆಗ ಪ್ರತಿ ಕೆಜಿಗೆ 90 ರಿಂದ 100 ರೂ.ವರೆಗೆ ಮಾರಾಟ ಮಾಡಿ 6 ಲಕ್ಷ ರೂ. ಆದಾಯ ಗಳಿಸಿದ್ರು ರಮೇಶ. ಬೆಂಗಳೂರು ಇತರೆಡೆಗಳಿಂದ ಪ್ರತಿ ಕೆಜಿಗೆ 80 ರೂ. ನಿಂದ 91 ರೂ. ಖರೀದಿಸುವುದಾಗಿ ಡಿಮ್ಯಾಂಡ್ ಬಂದಿದ್ದಾಗಿ ರಮೇಶ ಕೊನಸಾಗರ 'ಈಟಿವಿ ಭಾರತ'ಕ್ಕೆ ತಿಳಿಸಿದರು.
ಈ ಬಾರಿಯೂ ದುಂಡಾಣು ಅಂಗಮಾರಿ ರೋಗ ನಿಯಂತ್ರಣಕ್ಕೆ ತಂದೆ ಹಿನ್ನೆಲೆ ಪ್ರತಿ ಗಿಡ ಹೊರಲಾರದಂತಹ ಇಳುವರಿ ಕಾಣುತ್ತಿದೆ. ಗಿಡಗಳಿಗೆ ಭಾರ ತಡೆಯಲು ಕವಲು ಕಟ್ಟಿಗೆ ಸಹಾಯದಿಂದ ತಂತಿಗೆ ಎಳೆದು ಕಟ್ಟಿದ್ದರೂ, ಸಹ ಗಿಡಗಳು ಹಣ್ಣಿನ ಬಾರಕ್ಕೆ ಜೋತು ಬಿದ್ದಿವೆ.
ಈ ಬೆಳೆ ಬೆಳೆಯಲು ಖರ್ಚು ಮುಖ್ಯವಾಗುವುದಿಲ್ಲ, ಕಾಲಕಾಲಕ್ಕೆ ಔಷಧೋಪಚಾರಗಳಿಂದ ಈ ಬೆಳೆ ಬೆಳೆಯುವುದು ಮುಖ್ಯ. ಹಿರಿಯ ರೈತರಾದ ಜಗನ್ನಾಥ ಗೋತಗಿ, ಕುಂಬಾರ, ಶಂಕರ್ ಮೊದಲಾದವರ ಮಾರ್ಗದರ್ಶನದಲ್ಲಿ ಈ ಬೆಳೆ ಬೆಳೆದಿದ್ದು, ಈ ಬಾರಿ ಸರಾಸರಿ 20 ಟನ್ ಇಳುವರಿ ನಿರೀಕ್ಷೆಯಲ್ಲಿದ್ದಾರೆ ರೈತ ರಮೇಶ್ ಕೊನಸಾಗರ.
