ಅಕ್ರಮವಾಗಿ ಅಂಗನವಾಡಿ ಕೇಂದ್ರದ ಆಹಾರ ಪದಾರ್ಥ ಸಾಗಣೆ... ಸಿಕ್ಕಿಬಿದ್ದ ಸಹಾಯಕಿಗೆ ಜನರಿಂದ ಛೀಮಾರಿ

ಅಂಗನವಾಡಿ ಮಕ್ಕಳಿಗಾಗಿ ಸರ್ಕಾರ ಪೂರೈಸಿದ್ದ ಅಹಾರ ಪದಾರ್ಥಗಳನ್ನು ಸಹಾಯಕಿ ಅಕ್ರಮವಾಗಿ ಸಾಗಿಸುತ್ತಿರುವುದನ್ನು ಗ್ರಾಮಸ್ಥರು ಪತ್ತೆ ಹಚ್ಚಿ ಛೀಮಾರಿ ಹಾಕಿದ ಘಟನೆ ಚಳಗೇರಾದಲ್ಲಿ ನಡೆದಿದೆ.

ಕುಷ್ಟಗಿ (ಕೊಪ್ಪಳ): ಅಂಗನವಾಡಿ ಮಕ್ಕಳ ಆಹಾರ ಪದಾರ್ಥಗಳನ್ನು ಸಹಾಯಕಿ ಅಕ್ರಮವಾಗಿ ಸಾಗಿಸುತ್ತಿದ್ದಾಗ ಗ್ರಾಮಸ್ಥರ ಕೈಗೆ ಸಿಕ್ಕಿಬಿದ್ದಿರುವ ಘಟನೆ ಜಿಲ್ಲೆಯಲ್ಲಿ ನಡೆದಿದೆ.

ಗ್ರಾಮದ ಹೊರವಲಯದ ಕಲಾಲಬಂಡಿ ರಸ್ತೆಯಲ್ಲಿರುವ ಅಂಗನವಾಡಿ ಕೇಂದ್ರ ಸಂಖ್ಯೆ- 4ರಲ್ಲಿ ಆಹಾರ ಪದಾರ್ಥಗಳನ್ನು ಸಹಾಯಕಿ ಅಕ್ರಮವಾಗಿ ಸಾಗಿಸುವ ಸಂದರ್ಭದಲ್ಲಿ ಗ್ರಾಮಸ್ಥರ ಕೈಗೆ ಸಿಕ್ಕಿಬಿದ್ದಿರುವ ಪ್ರಕರಣ ಬೆಳಕಿಗೆ ಬಂದಿದೆ. ಲಾಕ್ ಡೌನ್ ಹಿನ್ನೆಲೆಯಲ್ಲಿ ಅಂಗನವಾಡಿ ಕೇಂದ್ರಗಳು ಬಂದ್ ಆಗಿರುವ ಸಂದರ್ಭ ಯಾರೂ ಇಲ್ಲದ ವೇಳೆ, ಸಹಾಯಕಿ ಗುಂಡಮ್ಮ 2 ಮೂಟೆಯಲ್ಲಿ ತಮ್ಮ ಸಂಬಂಧಿಕನ ಸಹಾಯ ಬಳಸಿಕೊಂಡು ಬೈಕ್ ನಲ್ಲಿ ಸಾಗಿಸುತ್ತಿದ್ದಳು.

ಇದನ್ನು ಗಮನಿಸಿದ ಸಾರ್ವಜನಿಕರು, ತಡೆದು ವಿಚಾರಿಸಿದಾಗ ಈ ಅಕ್ರಮ ಬಯಲಾಗಿದೆ. 8 ಪ್ಯಾಕೇಟ್ ಶೇಂಗಾ, 4 ಖಾದ್ಯ ತೈಲದ ಪ್ಯಾಕೇಟ್​, ಹೆಸರು ಕಾಳು, ಗೋಧಿ ರವಾ, ಸಕ್ಕರೆ, ಬೆಲ್ಲ, ಪೌಷ್ಟಿಕ ಆಹಾರದ ಪ್ಯಾಕೆಟ್​ಗಳಿದ್ದವು. ಅಲ್ಲದೇ ಸಹಾಯಕಿ ಜಾನುವಾರುಗಳಿಗೆ ತೆಗೆದುಕೊಂಡು ಹೋಗುತ್ತಿದ್ದೆ ಎಂದು ಸಮಜಾಯಿಷಿಗೆ ಮುಂದಾಗಿದ್ದಳು. ಆಕೆ ಕ್ಷಮೆ ಕೇಳಿದರೂ ಬಿಡದ ಸಾರ್ವಜನಿಕರು ಅಹಾರ ಪದಾರ್ಥಗಳನ್ನು ಪುನಃ ಅಂಗನವಾಡಿಗೆ ತೆಗೆದುಕೊಂಡು ಹೋಗಲಾಯಿತು.

ಈ ಕುರಿತು ಸಹಾಯಕಿ ವಿರುದ್ಧ ಗ್ರಾಮಸ್ಥರು ಸಿಡಿಪಿಓ ಅವರಿಗೆ ದೂರು ಸಲ್ಲಿಸಿದ್ದಾರೆ.