3.5 ಕೋಟಿ ರೂ. ಮೊತ್ತದ ಕಾಮಗಾರಿ ಮೂರೇ ತಿಂಗಳಲ್ಲಿ ಜಲಹೋಮ

ತುಂಗಭದ್ರಾ ಎಡದಂಡೆ ಕಾಲುವೆ ವ್ಯಾಪ್ತಿಯ ಗುಂಡೂರು-ಹುಳ್ಕಿಹಾಳ ಮಧ್ಯದ ಉಪ ಕಾಲುವೆಯಲ್ಲಿ ಕಳೆದ ಮೂರು ತಿಂಗಳ ಹಿಂದಷ್ಟೆ ನೀರಾವರಿ ಇಲಾಖೆಯಿಂದ ಕೈಗೊಂಡಿದ್ದ 3.5 ಕೋಟಿ ರೂ. ಮೊತ್ತದ ಕಾಂಕ್ರೀಟ್​ ಕಾಮಗಾರಿ ಕಿತ್ತು ಹೋಗಿ ನೀರುಪಾಲಾಗಿದೆ. ಪರಿಣಾಮ ಸಾಕಷ್ಟು ನೀರು ಹೊಲಕ್ಕೆ ನುಗ್ಗಿ ಭತ್ತದ ಬೆಳೆಗಳು ಸಂಪೂರ್ಣ ಜಲಾವೃತವಾಗಿವೆ.

ಗಂಗಾವತಿ: ಕಳೆದ ಮೂರು ತಿಂಗಳ ಹಿಂದಷ್ಟೆ ನೀರಾವರಿ ಇಲಾಖೆ ತುಂಗಭದ್ರಾ ಎಡದಂಡೆ ಕಾಲುವೆ ವ್ಯಾಪ್ತಿಯಲ್ಲಿ ಕೈಗೊಂಡಿದ್ದ ಸುಮಾರು 3.5 ಕೋಟಿ ರೂ. ಮೊತ್ತದ ಕಾಂಕ್ರೀಟ್​ ಕಾಮಗಾರಿ ನೀರುಪಾಲಾಗಿದೆ.

ಹೀಗಾಗಿ ಸಾಕಷ್ಟು ನೀರು ಹೊಲಕ್ಕೆ ನುಗ್ಗಿ ಭತ್ತ ಬೆಳೆ ಸಂಪೂರ್ಣ ಜಲಾವೃತವಾಗಿದೆ. ಅಲ್ಲದೆ ಗುಂಡೂರು ಮತ್ತು ಹುಳ್ಕಿಹಾಳ ಗ್ರಾಮದ ಸುಮಾರು ಮೂರು ಸಾವಿರ ಹೆಕ್ಟೇರ್​ ಪ್ರದೇಶದ ಭತ್ತದ ಬೆಳೆಯೂ ಹಾಳಾಗಿದೆ.

ಕಳೆದ ಮೂರು ತಿಂಗಳ ಹಿಂದಷ್ಟೆ ಈ ಕಾಮಗಾರಿ ಕೈಗೊಳ್ಳಲಾಗಿತ್ತು. ಕಳಪೆ ಕಾಮಗಾರಿ ಮತ್ತು ಇಲಾಖೆ ಅಧಿಕಾರಿಗಳ ಬೇಜವಾಬ್ದಾರಿಯಿಂದ ಹೀಗಾಗಿದೆ ಎಂದು ಸ್ಥಳೀಯರು ಆರೋಪಿಸಿದ್ದಾರೆ. ಕಳೆದ ನಾಲ್ಕು ದಶಕಗಳಿಂದ ರೈತರೇ ಈ ಭಾಗದಲ್ಲಿ ಹಲವು ಕಾಮಗಾರಿ ಮಾಡಿಕೊಂಡಿದ್ದರು. ಆ ಕಾಮಗಾರಿ ಎಂದೂ ಈ ರೀತಿಯಾಗಿರಲಿಲ್ಲ ಎಂದು ರೈತ ಈರಪ್ಪ ಸತ್ಯನಾರಾಯಣ ಹೇಳಿದ್ದಾರೆ.

ಕಾಲುವೆಯ ಸಹಾಯಕ ಎಂಜಿನಿಯರ್ ಸೂಗಪ್ಪ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಕಿತ್ತು ಹೋಗಿರುವ ಕಾಲುವೆಯ ಸ್ಥಳಕ್ಕೆ ಕಪ್ಪು ಮಣ್ಣು ಹಾಕಿ, ನೀರು ಹೊಲಕ್ಕೆ ನುಗ್ಗದಂತೆ ಕ್ರಮ ಕೈಗೊಂಡಿದ್ದಾರೆ.