ಕೋಲಾರ: ಬಾರ್ನಲ್ಲಿ ಎಣ್ಣೆ ಖರೀದಿ ಮಾಡಲು ಬಂದ ಇಬ್ಬರು ವ್ಯಕ್ತಿಗಳು ಪೂರ್ತಿ ಹಣ ಕೊಡದೆ ಕ್ಯಾಶಿಯರ್ ಜೊತೆಗೆ ಜಗಳ ಮಾಡಿ ಡ್ರಾಗರ್ನಿಂದ ಇರಿದು ಕೊಲೆ ಮಾಡಿರುವ ಘಟನೆ ನಗರದಲ್ಲಿ ನಡೆದಿದೆ. ಕೊಲೆ ಮಾಡಿರುವ ದೃಶ್ಯ ಸಿಸಿಟಿವಿ ಕ್ಯಾಮರಾದಲ್ಲಿ ಸೆರೆಯಾಗಿವೆ.
ಮಂಗಳವಾರ ರಾತ್ರಿ 11 ಗಂಟೆ ಸುಮಾರಿಗೆ ಕೋಲಾರ ನಗರದ ಟೇಕಲ್ ಸರ್ಕಲ್ನಲ್ಲಿರುವ ಚಾಲುಕ್ಯ ಬಾರ್ಗೆ ನವಾಜ್ ಹಾಗೂ ಆರೀಫ್ ಬಂದು ಬಿಯರ್ ಖರೀದಿಸಿದ್ದಾರೆ. ನೀಡಿರುವ ಬಿಲ್ಗಿಂತ 10 ರೂಪಾಯಿ ಕಡಿಮೆ ಕೊಟ್ಟಿದ್ದಕ್ಕೆ ಕ್ಯಾಶಿಯರ್ ಪ್ರಶ್ನಿಸಿದ್ದಾರೆ. ಅಲ್ಲದೆ, ಪೂರ್ತಿ ಹಣ ಕೊಡುವಂತೆ ಹೇಳಿದ್ದಾರೆ.
ಈ ಸಂದರ್ಭ ನವಾಜ್ ಹಾಗೂ ಆರೀಫ್ ಉರ್ದುವಿನಲ್ಲಿ ಅವಾಚ್ಯವಾಗಿ ಬೈದಿದ್ದಾರೆ. ಅಲ್ಲೇ ಇದ್ದ ಪೈರೋಜ್ ಎಂಬಾತ ಯಾಕೆ ಬೈಯ್ತಾ ಇದ್ದೀರಾ ಎಂದು ಕೇಳಿದ್ದಕ್ಕೆ, ಪೈರೋಜ್ ಹಾಗೂ ನವಾಜ್ ಪಾಷಾ, ಆರೀಫ್ ನಡುವೆ ಜಗಳ ಶುರುವಾಗಿದೆ. ಈ ಮೂವರ ಗಲಾಟೆ ಬಿಡಿಸಲು ಬಂದ ಕ್ಯಾಶಿಯರ್ ಮೋಹನ್ ಮೇಲೆ ಡ್ರಾಗರ್ನಿಂದ ಇರಿದು ಹಲ್ಲೆ ಮಾಡಿದ್ದಾರೆ. ಆಗ ಮೋಹನ್ ಸ್ಥಳದಲ್ಲೇ ಕುಸಿದು ಬಿದ್ದು ಸಾವನ್ನಪ್ಪಿದ್ದಾರೆ.
ಕೋಲಾರದ ಷಹೀದ್ ನಗರದ ನಿವಾಸಿಗಳಾದ ನವಾಜ್ ಹಾಗೂ ಆರೀಫ್ ಇಬ್ಬರ ಮೇಲೆ ಈಗಾಗಲೇ ಹಲವಾರು ಕ್ರಿಮಿನಲ್ ಪ್ರಕರಣಗಳಿವೆ. ವಿಷಯ ತಿಳಿದ ತಕ್ಷಣ ಸ್ಥಳಕ್ಕೆ ಬಂದ ನಗರ ಠಾಣೆ ಪೊಲೀಸರು ಸಿಸಿಟಿವಿ ಕ್ಯಾಮರಾ ಮಾಹಿತಿ ಆಧರಿಸಿ ಇಬ್ಬರನ್ನು ಬಂಧಿಸಿದ್ದಾರೆ.
ಇದನ್ನೂ ಓದಿ: ಸರ್ಕಾರಿ ಕಾನೂನು ಕಾಲೇಜ್ನಲ್ಲಿ ಕೆಎಸ್ಯು-ಎಸ್ಎಫ್ಐ ನಡುವೆ ಫೈಟ್.. ಮಹಿಳಾ ಮುಖಂಡೆ ಮೇಲೆ ಹಲ್ಲೆ..
