ಕೊಡಗು: ಕೊಡಗು ಪುಟ್ಟ ಜಿಲ್ಲೆ ಆಗಿದ್ದರೂ ಜೀವ ವೈವಿಧ್ಯತೆಯಲ್ಲಿ ಸಾಕಷ್ಟು ಶ್ರೀಮಂತಿಕೆಯಿಂದ ಕೂಡಿದೆ. ಋತುಮಾನಗಳ ಕಾಲ ಘಟ್ಟಕ್ಕೆ ಪ್ರಕೃತಿಯಲ್ಲಿ ವಿಭಿನ್ನವಾದ ಚಿತ್ತಾರಗಳನ್ನು ಕಾಣಬಹುದು. ಇದುವರೆಗೂ ಎಲ್ಲೆಲ್ಲೂ ಕಾಫಿ ಹೂಗಳ ಘಮಲು ಹಾಗೂ ಹೊಳಪು ಮೇಳೈಸಿದ ಜಿಲ್ಲೆಯಲ್ಲಿ ಅಣಬೆಗಳ ಚಿತ್ತಾರ ಮೂಡುತ್ತಿದೆ.
ಜಿಲ್ಲೆಯಲ್ಲಿ ಕಳೆದೊಂದು ವಾರದಿಂದ ಸುರಿಯುತ್ತಿರುವ ಮುಂಗಾರು ಮಳೆಯಿಂದ ಹದವಾದ ಮರಗಳಲ್ಲಿ ಮರ ಅಣಬೆಗಳು ರಂಗು ಬೀರುತ್ತಿವೆ. ಮಳೆಗಾಲದಲ್ಲಿ ಅರಳುವ ಹಲವು ವಿಧದ ಅಣಬೆಗಳು ಮೂಡುತ್ತಿವೆ. ಮಳೆಗಾಲ ಪ್ರಾರಂಭಕ್ಕೂ ಮೊದಲು ತೇವದ ನೆಲದಿಂದ ಅಪರೂಪದ ಅಣಬೆಗಳು ಮೂಡಿದರೆ, ಮಳೆಗಾಲದಲ್ಲಿ ಕಾಡುಗಳಲ್ಲಿ ಓಡಾಡಿದವರಿಗೆಲ್ಲ ಮತ್ತಷ್ಟು ಚಿತ್ರ ವಿಚಿತ್ರವಾದ ಅಣಬೆಗಳು ಕಾಣಸಿಗುತ್ತಿವೆ.
ದಟ್ಟ ಹಸಿರಿನ ಗಿಡಮರಗಳ ನಡುವೆ, ಒಣಗಿದ ಮರಗಳ ಕಾಂಡಗಳ ಮೇಲೆ ಬಿಳಿ, ಹಳದಿ, ಕಂದು ಬಣ್ಣದ ಅಣಬೆಗಳು ಅರಳಿ ತಮ್ಮ ಬೆಡಗು, ಬಿನ್ನಾಣ ಪ್ರದರ್ಶಿಸುತ್ತಿವೆ. ಕಾಫಿಯ ತೋಟಗಳಲ್ಲಿ ಕಾಣಸಿಗುವ ಅಣಬೆಗಳ ಚಿತ್ತಾರ ಕಣ್ಮನ ಸೆಳೆಯುತ್ತಿವೆ. ಮಳೆಗಾಲದ ಅಣಬೆಗಳಿಗೆ ಹಲವು ಬಣ್ಣ ಆಕಾರ ಹಾಗೂ ರೂಪಗಳಿವೆ. ತೇವದ ಮಣ್ಣಿನಲ್ಲಿ ಅಲ್ಲಲ್ಲಿ ಅಪರೂಪದ ಅಣಬೆಗಳು ಕಾಣ ಸಿಗುತ್ತಿವೆ. ಕೆಲವು ತರಕಾರಿಯಾಗಿ ಬಳಕೆಯಾದರೆ ಮತ್ತೆ ಕೆಲವು ಆಕರ್ಷಣೆಯಿಂದ ಕೂಡಿವೆ.
ನೆಲದ ಮೇಲಿನ ಅಣಬೆಗಳಿಗಿಂತ ಹೆಚ್ಚು ಆಕರ್ಷಕವಾಗಿರುವುದು ಮರ ಅಣಬೆಗಳು. ಮುರಿದು ಬಿದ್ದ ಮರ, ನೆನೆದ ಕಟ್ಟಿಗೆ ತುಂಡು, ಮರದ ಬಡ್ಡೆಗಳ ಮೇಲೆ ಈ ಮರ ಅಣಬೆಗಳ ವಿಸ್ಮಯಲೋಕ ಅನಾವರಣಗೊಂಡಿದೆ. ನಾಪೋಕ್ಲು ವ್ಯಾಪ್ತಿಯಲ್ಲಿ ಮಳೆ ಸುರಿದ ಸಂದರ್ಭದಲ್ಲಿ ಜೀವಕಳೆ ತರುವ ಹಲವು ಅಣಬೆಗಳು ಮನಸೂರೆಗೊಂಡವು. ಮಳೆಗಾಲದ ಅಣಬೆಗಳು ಕೊಳೆತು ನಾರುವ ವಸ್ತುಗಳ ಮೇಲೆ, ಮರಗಳ ಕಾಂಡಗಳ ಮೇಲೆ, ಸೆಗಣಿಯ ಮೇಲೆ, ಕೊಳೆತ ಎಲೆಗಳ ಮೇಲೆ ಹೀಗೆ ಹತ್ತು ಹಲವು ಸ್ಥಳಗಳಲ್ಲಿ ದಿಢೀರನೆ ಪ್ರತ್ಯಕ್ಷವಾಗುತ್ತವೆ.
