ಕಲಬುರಗಿಯಲ್ಲಿ ನಿಗೂಢ ಸದ್ದಿಗೆ ಬೆಚ್ಚಿಬಿದ್ದ ಜನ!

ಅಫಜಲಪುರ ಹಾಗೂ ಜೇವರ್ಗಿ ತಾಲೂಕಿನ ಹಲವು ಗ್ರಾಮಗಳಲ್ಲಿ ಇಂದು ಬೆಳಗ್ಗೆ 10:45ರ ಸುಮಾರಿಗೆ ಬಾಂಬ್ ಸ್ಫೋಟವಾದಾಗ ಬರುವ ಸದ್ದಿನ ಮಾದರಿಯಲ್ಲಿ ಭಾರಿ ಸದ್ದು ಕೇಳಿಬಂದಿದೆ ಎನ್ನಲಾಗಿದ್ದು, ಶಬ್ದದ ಮೂಲಕ್ಕಾಗಿ ಗ್ರಾಮಸ್ಥರು ಹುಡುಕಾಟ ನಡೆಸಿದ್ದಾರೆ. ಘಟನೆಯಿಂದ ಜನರಲ್ಲಿ ಆತಂಕ ಮನೆಮಾಡಿದೆ.

ಕಲಬುರಗಿ: ಭೂಮಿಯಿಂದ ನಿಗೂಢ ಶಬ್ದವೊಂದು ಕೇಳಿಬಂದು ಜನ ಆತಂಕಗೊಂಡ ಘಟನೆ ಅಫಜಲಪುರ ಹಾಗೂ ಜೇವರ್ಗಿ ತಾಲೂಕಿನ ಹಲವು ಗ್ರಾಮಗಳಲ್ಲಿ ನಡೆದಿದೆ.

ಇಂದು ಬೆಳಗ್ಗೆ 10:45ರ ಸುಮಾರಿಗೆ ಬಾಂಬ್ ಸ್ಫೋಟವಾದಾಗ ಬರುವ ಸದ್ದಿನ ಮಾದರಿಯಲ್ಲಿ ಭಾರಿ ಸದ್ದು ಕೇಳಿಬಂದಿದೆ ಎನ್ನಲಾಗುತ್ತಿದೆ. ಶಬ್ದದಿಂದ ಭಯಭೀತರಾದ ಜನರು ಮನೆಗಳಿಂದ ಹೊರಗೆ ಓಡಿ ಬಂದಿದ್ದಾರೆ.

ಶಬ್ದದ ಮೂಲಕ್ಕಾಗಿ ಜನರ ಹುಡುಕಾಟ

ಇನ್ನು ತಾಲೂಕಿನಾಂದ್ಯಂತ ಸುದ್ದಿ ತಿಳಿದ ಜನರು ಊರಿನ ಹೊರಗಡೆ ಏನೋ ಬಿದ್ದಿದೆ ಅಂತಾ ಬೈಕ್​​ಗಳ ಮೇಲೆ ಊರಿನ ಹೊರವಲಯ ಮತ್ತು ಹೊಲಗಳಿಗೆ ಹೋಗಿ ಶಬ್ದದ ಮೂಲಕ್ಕಾಗಿ ಹುಡುಕಾಡಿದ್ದಾರೆ. ಆದರೆ ಇದುವರೆಗೂ ಸುಳಿವು ಸಿಕ್ಕಿಲ್ಲ.

ಒಂದು ರೀತಿಯ ಭೂಕಂಪದ ಅನುಭವ ಹಾಗೂ ನಿಗೂಢ ಸದ್ದಿನಿಂದ ಜನರು ಆತಂಕಕ್ಕೆ ಒಳಗಾಗಿದ್ದಾರೆ. ಆದ್ರೆ ಯಾವುದೇ ರೀತಿಯ ಭೂಕಂಪನದ ಬಗ್ಗೆ ರೆಕಾರ್ಡ್ ಆಗಿಲ್ಲ. ಜನರು ಹೆದರುವ ಅಗತ್ಯವಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ‌. ಒಟ್ಟಾರೆ ನಿಗೂಢ ಸದ್ದಿನಿಂದ ಜನರು ಮಾತ್ರ ಕಂಗಾಲಾಗಿದ್ದಾರೆ.