ಕಲಬುರಗಿ: ಕೆಲಸ ಇಲ್ಲದೆ ಜನ ಗೂಳೆ ಹೋಗಬಾರದು ಅನ್ನೋ ಕಾರಣಕ್ಕೆ ಸರ್ಕಾರ ಮಹಾತ್ಮಾಗಾಂಧಿ ಉದ್ಯೋಗ ಖಾತ್ರಿ ಯೋಜನೆ ಜಾರಿಗೆ ತಂದಿದೆ. ಆದ್ರೆ ಯೋಜನೆ ವರವಾಗುವ ಬದಲು ಗ್ರಾಮದ ರಾಜಕೀಯ ಮುಖಂಡರ ನಡುವಿನ ವೈಯಕ್ತಿಕ ತಿಕ್ಕಾಟದಿಂದಾಗಿ ಕೆಲಸ ಸಿಗದೆ ಜನ ವಂಚಿತರಾಗುತ್ತಿದ್ದಾರೆ.
ಚಿತ್ತಾಪುರ ತಾಲೂಕಿನ ಲಾಡ್ಲಾಪುರ ಗ್ರಾಮ ಪಂಚಾಯತ್ನಿಂದ ಸಮರ್ಪಕವಾಗಿ ಕಾರ್ಮಿಕರಿಗೆ ಉದ್ಯೋಗ ಸಿಗುತ್ತಿಲ್ಲ, ಗ್ರಾ.ಪಂ ಅಧಿಕಾರಿಗಳು ಎನ್ಎಂಆರ್ ತೆಗೆಯದೆ ತೊಂದರೆ ನೀಡುತ್ತಿದ್ದಾರೆ ಅಂತ ಕಾರ್ಮಿಕರು ಆರೋಪಿಸಿದ್ದಾರೆ.
ಊರಿನ ರಾಜಕೀಯ ಮುಖಂಡರ ಒತ್ತಡದಿಂದ ಅಧಿಕಾರಿಗಳು ಕೆಲವರ ಎನ್ಎಂಆರ್ ತೆಗೆದರೆ, ಇನ್ನೂ ಹಲವರು ಎನ್ಎಂಆರ್ ತೆಗೆಯುತ್ತಿಲ್ಲ, ಒಬ್ಬರು ಕೆಲಸಕ್ಕೆ ಹೋಗಿ ಎಂದು ಆದೇಶ ನೀಡುತ್ತಿದ್ದಾರೆ. ಇನ್ನೂ ಕೆಲವರು ಅವರಿಗೆ ಕೆಲಸ ಹೇಗೆ ಕೊಟ್ಟಿರಿ ಎಂದು ತಗಾದೆ ತೆಗೆಯುತ್ತಿದ್ದಾರೆ. ಕೆಲವರಿಗೆ ಕೆಲಸ ಕೊಟ್ಟು ಇನ್ನೂ ಹಲವರಿಗೆ ಕೆಲಸದಿಂದ ಹೊರಗಿಡುವ ಅಧಿಕಾರಿಗಳ ಕ್ರಮವೂ ಕೂಡ ಕಾರ್ಮಿಕರ ಆಕ್ರೋಶಕ್ಕೆ ಕಾರಣವಾಗಿದೆ.
ಗ್ರಾಮದ ಮುಖಂಡರ ಕ್ಯಾತೆಯಿಂದಾಗಿ ಲಾಡ್ಲಾಪುರದಿಂದ 3 ಕಿ.ಮೀ. ದೂರದ ಹಳ್ಳದ ಪ್ರದೇಶಕ್ಕೆ ಶನಿವಾರ ಕೆಲಸಕ್ಕೆಂದು ಹೋಗಿದ್ದ ಸುಮಾರು 400 ಕಾರ್ಮಿಕರು ಕೆಲಸ ಅರ್ಧಕ್ಕೆ ನಿಲ್ಲಿಸಿ ಮರಳುವಂತಾಗಿದೆ ಎಂದು ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮರಳಿ ಮನೆಗೆ ಬರುವಾಗ ಬಿಸಿಲಿನ ತಾಪ ತಾಳಲಾರದೆ ಮಹಿಳೆಯೊಬ್ಬರು ಕುಸಿದು ಬಿದ್ದು ನರಳಾಡಿದ ಪ್ರಸಂಗವೂ ಕೂಡಾ ನಡೆದಿದೆ.
ಮೇಲಾಧಿಕಾರಿಗಳು ಅಧಿಕಾರಿಗಳಿಗೆ ಸೂಕ್ತ ನಿರ್ದೇಶನ ನೀಡಿ ಉದ್ಯೋಗ ಖಾತ್ರಿಯಲ್ಲಿ ನಡೆಯುತ್ತಿರುವ ರಾಜಕೀಯ ಹಸ್ತಕ್ಷೇಪ ತಪ್ಪಿಸಬೇಕು. ಕೆಲಸ ಕೇಳಿ ಬರುವ ಎಲ್ಲ ಕಾರ್ಮಿಕರ ಎನ್ಎಂಆರ್ ತೆಗೆದು ಕೆಲಸ ನೀಡಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.
ಜಾಹಿರಾತು : ನಿಮ್ಮ ಸೂಕ್ತ ಸಂಗಾತಿ ಹುಡುಕುತ್ತಿರುವಿರಾ? ಕನ್ನಡ ಮ್ಯಾಟ್ರಿಮೋನಿಯಲ್ಲಿ ನೋಂದಣಿ ಉಚಿತ
