ಕರ್ತವ್ಯ ಲೋಪ ಆರೋಪದಡಿ ಗಾಣಗಾಪುರ ಪಿಎಸ್ಐ ಅಯ್ಯಣ್ಣ ಅಮಾನತು

ಮಾಧ್ಯಮಗಳಲ್ಲಿ ಸುದ್ದಿ ವರದಿಯಾಗಿ ವೈರಲ್​ ಆದ ನಂತರ ಪೊಲೀಸರು ಪುಡಿರೌಡಿ ಮೇಲೆ ಕ್ರಮ ಕೈಗೊಂಡಿದ್ದರು.

ಕಲಬುರಗಿ: ಭಕ್ತರ ಮೇಲೆ ಪುಡಿ ರೌಡಿ ಅಟ್ಟಹಾಸ ಮೆರೆದಿರುವ ವಿಚಾರವಾಗಿ ಪಿಎಸ್ಐ ತಲೆದಂಡವಾಗಿದೆ. ಕಲಬುರಗಿ ಜಿಲ್ಲೆ ದೇವಲ ಗಾಣಗಾಪುರ ಠಾಣೆ ಪಿಎಸ್ಐ ಅಮಾನತು ಮಾಡಿ ಈಶಾನ್ಯ ವಲಯ ಐಜಿಪಿ ಅನುಪಮ್ ಅಗರವಾಲ್ ಆದೇಶ ಹೊರಡಿಸಿದ್ದಾರೆ. ಅಫಜಲಪುರ ತಾಲೂಕಿನ ದೇವಲಗಾಣಗಾಪುರ ದತ್ತಾತ್ರೇಯ ಸಂಗಮ ದೇವಸ್ಥಾನದಲ್ಲಿ ಪುಡಿರೌಡಿ ಯಲ್ಲಪ್ಪ ಕಲ್ಲೂರ ಎಂಬಾತ ಭಕ್ತರ ಮೇಲೆ ಅಟ್ಟಹಾಸ ಮೆರೆದಿದ್ದ. ಹಲ್ಲೆ ಮಾಡಿ ತೆಲೆ ಮೇಲೆ ಕಾಲಿಟ್ಟು ದೌರ್ಜನ್ಯ ಮೆರೆದಿದ್ದ. ಈತ ಮುಂಚೆಯೂ ಹೀಗೆ ವರ್ತಿಸಿದ್ದ ಪ್ರಕರಣ ಕೂಡಾ ದಾಖಲಾಗಿದ್ದವು.

ಆದರೆ ಭಕ್ತರ ಮೇಲೆ ದೌರ್ಜನ್ಯ ಮೆರೆದ ಪುಡಿರೌಡಿ ಮೇಲೆ ಕ್ರಮ ಕೈಗೊಳ್ಳುವಲ್ಲಿ ಕರ್ತವ್ಯ ಲೋಪ ಎಸಗಿದ ಆರೋಪದ ಮೇಲೆ PSI ಅಯ್ಯಣ್ಣ ಅವರನ್ನು‌ ಅಮಾನತು ಮಾಡಲಾಗಿದೆ. ದತ್ತನ ಭಕ್ತರ ತಲೆ ಮೇಲೆ ಕಾಲು ಇಟ್ಟು ಹಲ್ಲೆ ಮಾಡಿದಾಗ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ. ಮೇಲಾಧಿಕಾರಿಗಳ ಗಮನಕ್ಕೂ ತಂದಿರಲಿಲ್ಲ. ಮಾಧ್ಯಮದಲ್ಲಿ ವರದಿ ಬಂದ ಮೇಲೆ ಯಲ್ಲಪ್ಪನನ್ನು ಬಂಧಿಸಲಾಗಿತ್ತು. ಮೇಲಾಧಿಕಾರಿಗಳಿಗೆ ಮಾಹಿತಿಯೂ ನೀಡದೆ ಕರ್ತವ್ಯ ಲೋಪ ಎಸಗಿದ ಹಿನ್ನೆಲೆಯಲ್ಲಿ PSI ಅಯ್ಯಣ್ಣ ಅಮಾನತು ಆಗಿದ್ದಾರೆ.

ಎರಡು ದಿನಗಳ ಹಿಂದೆ ಗಾಣಗಾಪುರ ದತ್ತಾತ್ರೇಯ ದೇವಸ್ಥಾನದಲ್ಲಿ ಭಕ್ತರ ಮೇಲೆ ಪುಡಿರೌಡಿಯೊಬ್ಬ ಅಟ್ಟಹಾಸ ಮೆರೆದ ಘಟನೆ ನಡೆದಿತ್ತು. ಭಕ್ತರ ತಲೆಯ ಮೇಲೆ ಕಾಲು ಇಟ್ಟು ದರ್ಪ ತೋರಿದ್ದನು. ದೇಶದ ಮೂಲೆ ಮೂಲೆಗಳಿಂದ ಭಕ್ತರು ಗಾಣಗಾಪುರ ದೇವಸ್ಥಾನಕ್ಕೆ ಬರುವುದರಿಂದ, ಭಕ್ತರು ದೇವಸ್ಥಾನದಲ್ಲೇ ವಾಸ್ತವ್ಯ ಹೂಡುತ್ತಾರೆ. ಹೀಗೆ ದೇವಸ್ಥಾನದಲ್ಲಿ ರಾತ್ರಿ ವೇಳೆ ಮಲಗಿದ್ದ ಭಕ್ತರ ಮೇಲೆ ಸ್ಥಳೀಯ ನಿವಾಸಿ ಯಲ್ಲಪ್ಪ ಕಲ್ಲೂರ್​ ಎಂಬಾತ ದಬ್ಬಾಳಿಕೆ ನಡೆಸಿದ್ದಾರೆ. ಅಷ್ಟೇ ಅಲ್ಲದೆ ಭಕ್ತರಿಗೆ ಅವಾಚ್ಯ ಪದಗಳಿಂದ ನಿಂದಿಸಿ, ತಲೆ ಮೇಲೆ ಕಾಲಿಟ್ಟು ಹಲ್ಲೆ ಕೂಡ ಮಾಡಿದ್ದಾನೆ.

ಇದಷ್ಟೇ ಅಲ್ಲದೆ, ದೇವಸ್ಥಾನದ ಸಂಗಮ ಸ್ಥಳದಲ್ಲಿರುವ ಔದುಂಬರ ವೃಷ್ದ ಕೆಳಗೆ ದತ್ತ ಚರಿತ್ರೆ ಪಾರಾಯಣ ಮಾಡುತ್ತಿದ್ದ ಭಕ್ತರ ಮೇಲೂ ಅಟ್ಟಹಾಸ ಮೆರೆದಿದ್ದನು. ಈ ಬಗ್ಗೆ ವಿಡಿಯೋಗಳು, ಸುದ್ದಿಗಳು ಎಲ್ಲೆಡೆ ಹರಡಿದ ನಂತರ ಪೊಲೀಸರು ಕ್ರಮ ಕೈಗೊಂಡಿದ್ದರು. ಪುಡಿ ರೌಡಿಯನ್ನು ಬಂಧಿಸಿ, ಕಂಬಿ ಹಿಂದೆ ಕಳುಹಿಸಿದ್ದರು. ಈತ ಅದೇ ಮೊದಲಲ್ಲ ಕಳೆದ ಕೆಲವು ವರ್ಷಗಳಿಂದ ಇದೇ ರೀತಿ ಗಾಣಗಾಪುರ ದೇವಸ್ಥಾನಕ್ಕೆ ಬರುವ ಭಕ್ತರ ಮೇಲೆ ದೌರ್ಜನ್ಯ ಎಸಗುತ್ತಲೇ ಬಂದಿದ್ದಾನೆ. ಆದರೆ ಪೊಲೀಸರು ಮಾತ್ರ ಯಾವುದೇ ಕ್ರಮ ಕೈಗೊಂಡಿರಲಿಲ್ಲ ಎಂದು ಸ್ಥಳೀಯರು ದೂರಿದ್ದರು.

ಮಾಧ್ಯಮಗಳಲ್ಲಿ ಸುದ್ದಿ ಪ್ರಸಾರವಾಗಿ ವೈರಲ್​ ಆಗುತ್ತಿದ್ದಂತೆ ಎಚ್ಚೆತ್ತುಕೊಂಡ ಪೊಲೀಸರು ಆತನ ಮೇಲೆ ಕ್ರಮ ಕೈಗೊಂಡಿದ್ದರು. ಗಾಣಗಾಪುರದಲ್ಲಿ ಅಂಗಡಿ ಇಟ್ಟುಕೊಂಡಿರುವ ಯಲ್ಲಪ್ಪ ಕಲ್ಲೂರ್​ ಗಾಂಜಾ ನಶೆಯಲ್ಲಿ ಹಾಗೆಲ್ಲಾ ಮಾಡಿದ್ದಾನೆ ಎನ್ನುವುದು ತನಿಖೆ ವೇಳೆ ಬಯಲಾಗಿತ್ತು. ಸದ್ಯ ಯಲ್ಲಪ್ಪ ಬಂಧನದಲ್ಲಿದ್ದರೂ, ಪಿಎಸ್​ಐ ಅಯ್ಯಣ್ಣ ಅವರು ಪುಡಿರೌಡಿಯ ದುಷ್ಕೃತ್ಯದ ಬಗ್ಗೆ ಮಾಹಿತಿ ಇದ್ದರೂ ಯಾವುದೇ ಕ್ರಮ ಕೈಗೊಳ್ಳದೇ ಇದ್ದದ್ದನ್ನು ಗಮನಿಸಿರುವ ಮೇಲಾಧಿಕಾರಿಗಳು ಇದೀಗ ಅಯ್ಯಣ್ಣ ಅವರನ್ನು ಅಮಾನತು ಮಾಡಿ ಆದೇಶ ಹೊರಡಿಸಿದ್ದಾರೆ.

ಇದನ್ನೂ ಓದಿ: ಭಕ್ತರ ತಲೆ ಮೇಲೆ ಕಾಲಿಟ್ಟು ಪುಡಿ ರೌಡಿಯ ದೌರ್ಜನ್ಯ!