ಸೇಡಂ ಶಾಸಕರ ಕ್ಷೇತ್ರದಲ್ಲಿ ಬಿಜೆಪಿಗೆ ಮುಖಭಂಗ.. ಕಾಂಗ್ರೆಸ್​ಗೆ ಗೆಲುವು

ನಿರಂತರ ಮೂರು ಬಾರಿ ಬಿಜೆಪಿ ಅಭ್ಯರ್ಥಿಯನ್ನೇ ಗೆಲ್ಲಿಸಿದ್ದ ವೆಂಕಟೇಶ್ವರ ನಗರ ಬಡಾವಣೆಯ ಜನ ಈ ಬಾರಿ ಅಧಿಕ ಮತಗಳ ಅಂತರದಿಂದ ಕಾಂಗ್ರೆಸ್​ಅಭ್ಯರ್ಥಿಯನ್ನ ಗೆಲ್ಲಿಸಿದ್ದಾರೆ.

ಸೇಡಂ(ಕಲಬುರಗಿ): ಪುರಸಭೆಯ ಉಪ ಚುನಾವಣೆಯ ಫಲಿತಾಂಶ ಮುಂದಿನ ವಿಧಾನಸಭಾ ಚುನಾವಣೆಯ ದಿಕ್ಸೂಚಿಯಾಗಿದೆ. ಇದು ಎರಡು ಪಕ್ಷಗಳ ಮಧ್ಯದ ಚುನಾವಣೆಯಾಗಿತ್ತು. ಬಿಜೆಪಿ ಭ್ರಷ್ಟ ಆಡಳಿತದಿಂದ ಬೇಸತ್ತ ಮತದಾರ ತೀರ್ಪು ನೀಡಿದ್ದಾನೆ ಎಂದು ಕೆಪಿಸಿಸಿ ವಕ್ತಾರ ಹಾಗೂ ಮಾಜಿ ಸಚಿವ ಡಾ. ಶರಣಪ್ರಕಾಶ ಪಾಟೀಲ್​ ತಿಳಿಸಿದ್ದಾರೆ.

ಆಡಳಿತಾರೂಢ ಬಿಜೆಪಿ ಭದ್ರಕೋಟೆ ಎಂದೆನಿಸಿಕೊಂಡಿದ್ದ ವಾರ್ಡ್​ ನಂ. 13 ಕಾಂಗ್ರೆಸ್ ಪಾಲಾಗಿದೆ. ಡಿಸೆಂಬರ್ 27 ರಂದು ನಡೆದ ಪುರಸಭೆಯ ವಾರ್ಡ್​ ನಂ. 13 ವೆಂಕಟೇಶ್ವರ ನಗರ ಉಪ ಚುನಾವಣೆಯ ಫಲಿತಾಂಶ ಹೊರಬಿದ್ದಿದ್ದು, ಬಿಜೆಪಿ ಭಾರಿ ಮುಖಭಂಗ ಅನುಭವಿಸಿದೆ.

ನಿರಂತರ ಮೂರು ಬಾರಿ ಬಿಜೆಪಿ ಅಭ್ಯರ್ಥಿಯನ್ನೇ ಗೆಲ್ಲಿಸಿದ್ದ ವೆಂಕಟೇಶ್ವರ ನಗರ ಬಡಾವಣೆಯ ಜನ ಈ ಬಾರಿ ಅಧಿಕ ಮತಗಳ ಅಂತರದಿಂದ ಕಾಂಗ್ರೆಸ್​ಗೆ ಮತ ನೀಡಿದ್ದಾರೆ. ಇದು ಮುಂದಿನ ವಿಧಾನಸಭಾ ಚುನಾವಣೆಯ ದಿಕ್ಸೂಚಿ ಎನ್ನಲಾಗುತ್ತಿದ್ದು, ಒಟ್ಟು 778 ಮತಗಳು ಪಡೆಯುವ ಮೂಲಕ ಆಡಳಿತಾರೂಢ ಬಿಜೆಪಿ ಎದುರು 425 ಮತಗಳ ಭಾರಿ ಅಂತರದಿಂದ ಕಾಂಗ್ರೆಸ್ ಅಭ್ಯರ್ಥಿ ದೇವು ತಿಪ್ಪಣ್ಣ ದೊರೆ ಅಭೂತಪೂರ್ವ ಗೆಲುವು ತಮ್ಮದಾಗಿಸಿಕೊಂಡಿದ್ದಾರೆ.

ಪ್ರತಿಸ್ಪರ್ಧಿ ಬಿಜೆಪಿಯ ಸಂದೀಪ್​ ಕುಮಾರ್​, ಬಸವರಾಜ ಪ್ಯಾಟಿ ಕೇವಲ 353 ಮತ ಪಡೆದು ಸೋಲುಂಡಿದ್ದಾರೆ. ಜೆಡಿಎಸ್ ಅಭ್ಯರ್ಥಿ ದಿನೇಶ ನಾಯಕೋಡಿ 152 ಮತ ಪಡೆದಿದ್ದಾರೆ. ಚುನಾವಣೆಯಲ್ಲಿ 1663 ಮತದಾರರ ಪೈಕಿ 1294 ಮತದಾನವಾಗಿತ್ತು. ಇದರಲ್ಲಿ 11 ನೋಟಾ ಚಲಾವಣೆಯಾಗಿದ್ದವು.

ಓದಿ: BIG BREAKING... ನಾಳೆ ಕರ್ನಾಟಕ ಬಂದ್​ ಇಲ್ಲ: ಸಿಎಂ ಸಂಧಾನ ಸಭೆ ಸಕ್ಸಸ್​