ಕಲಬುರಗಿ: ಸಿಬ್ಬಂದಿ ವೇತನ ದೋಚಿ ಪರಾರಿಯಾಗಿದ್ದ ಆರೋಪಿಯನ್ನು ವಾಡಿ ಠಾಣೆಯ ಪೊಲೀಸರು ಹೈದರಾಬಾದ್ನಲ್ಲಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಸಂತೋಷ್ ಕುಮಾರ್ ಕಟ್ಟೆ ಬಂಧಿತ ಆರೋಪಿ. ವಾಡಿ ಸಮುದಾಯ ಆರೋಗ್ಯ ಕೇಂದ್ರದ ದ್ವಿತೀಯ ದರ್ಜೆ ಸಹಾಯಕನಾಗಿದ್ದ ಈತ, ಸಿಬ್ಬಂದಿ ವೇತನ ಮತ್ತು ಎಸ್ಆರ್ ಬುಕ್ ಬರೆಯುತ್ತಿದ್ದ. ಆದರೆ, ಕಳೆದ ಜನವರಿ ತಿಂಗಳಿನಲ್ಲಿ ಆಡಳಿತಾಧಿಕಾರಿಗಳ ನಕಲಿ ಸಹಿ ಮತ್ತು ಸೀಲ್ ಮಾಡಿ, 38 ಸಿಬ್ಬಂದಿಯ 5.5 ಲಕ್ಷ ರೂ. ವೇತನವನ್ನು ತನ್ನ ಖಾತೆಗೆ ಜಮಾಮಾಡಿಕೊಂಡಿದ್ದ ಎನ್ನಲಾಗಿದೆ.
ಈ 38 ಸಿಬ್ಬಂದಿ ತಮ್ಮ ಖಾತೆಗೆ ವೇತನ ಜಮಾ ಆಗದಿದ್ದಾಗ ವೈದ್ಯಾಧಿಕಾರಿಗಳ ಗಮನಕ್ಕೆ ತಂದಿದ್ದಾರೆ. ನಂತರ ವಾಡಿ ಸಮುದಾಯ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ. ರೀಜಿವುಲ್ಲಾ ಖಾದ್ರಿ, ಸಂತೋಷ್ ಕುಮಾರ್ನನ್ನು ಕರೆಸಿ ವಿಚಾರಿಸಿದ್ದಾರೆ. ಈ ವೇಳೆ ಚೆಕ್ ಕಳೆದು ಹೋಗಿದೆ. ಮೇಲಧಿಕಾರಿಗಳ ಗಮನಕ್ಕೆ ತಂದು ಸಮಸ್ಯೆ ಬಗೆಹರಿಸುವುದಾಗಿ ಸಂತೋಷ್ ಕಟ್ಟುಕತೆ ಹೇಳಿದ್ದಾನೆ. ಅನುಮಾನಗೊಂಡ ವೈದ್ಯಾಧಿಕಾರಿ, ಚಿತ್ತಾಪುರ ಎಸ್‌ಟಿಒ ಕಚೇರಿಗೆ ಹೋಗಿ ವಿಚಾರಿಸಿದಾಗ ಈತನ ಅಸಲಿಯತ್ತು ಬಯಲಾಗಿದೆ.
ಓದಿ:13 ವರ್ಷದ ಬಾಲಕಿ ಮೇಲೆ ರೇಪ್; ಕಲ್ಲುಗಳ ಮಧ್ಯೆ ಜೀವಂತ ಸಮಾಧಿ ಯತ್ನ!
ಈ ಬಗ್ಗೆ ವೈದ್ಯಾಧಿಕಾರಿ ಡಾ. ರೀಜಿವುಲ್ಲಾ ಖಾದ್ರಿ ಕಳೆದ ಫೆಬ್ರವರಿ ತಿಂಗಳಲ್ಲಿ ವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದರು. ಈ ವಿಷಯ ತಿಳಿದು ತಲೆ ಮರೆಸಿಕೊಂಡಿದ್ದ ಆರೋಪಿ ಸಂತೋಷ್, ಹೈದರಾಬಾದ್ನಲ್ಲಿ ಬಲೂನ್ ಮಾರಾಟ ಮಾಡಿ ಜೀವನ ನಡೆಸುತ್ತಿದ್ದ. ಈ ಬಗ್ಗೆ ತಿಳಿದ ವಾಡಿ ಠಾಣೆ ಪಿಎಸ್ಐ ವಿಜಯಕುಮಾರ ಆತನನ್ನು ಬಂಧಿಸಿ ಕಲಬುರಗಿಗೆ ಕರೆ ತಂದಿದ್ದು, ವಿಚಾರಣೆ ವೇಳೆ ತಪ್ಪೊಪ್ಪಿಕೊಂಡಿದ್ದಾನೆ.
