ರಾಣೆಬೆನ್ನೂರಲ್ಲಿ ಶಿವಾಜಿ ಮಹಾರಾಜರ ಪೋಷಾಕಿನಲ್ಲಿ ಗಮನ ಸೆಳೆದ ಗಣಪ

ಮಹಾರಾಷ್ಟ್ರ ರಾಜ್ಯದ ರಾಯಗಡ ಕೋಟೆ ಮಾದರಿಯಲ್ಲಿ ನಿರ್ಮಾಣವಾಗಿರುವ ವೇದಿಕೆ ಜನರನ್ನು ಆಕರ್ಷಿಸುತ್ತಿದ್ದು, ಶಿವಾಜಿ ಮಹಾರಾಜರ ಆಳ್ವಿಕೆಯನ್ನು ಬಿಂಬಿಸುತ್ತಿದೆ. ಕೋಟೆಯ ಜತೆಗೆ ಸೈನಿಕರು, ಅಶ್ವದಳ, ಗಜದಳ ನೋಡುಗರಿಗೆ ಇತಿಹಾಸದ ನೆನಪು ತಂದುಕೊಡುತ್ತಿದೆ.

ರಾಣೆಬೆನ್ನೂರು: ಛತ್ರಪತಿ ಶಿವಾಜಿ ಮಹಾರಾಜರನ್ನು ಹೋಲುವಂತೆ ಇಪ್ಪತ್ತೊಂದು ಅಡಿ ಎತ್ತರದಲ್ಲಿ ರೂಪಿತಗೊಂಡ ರಾಣೆಬೆನ್ನೂರು ನಗರದ ಗಣೇಶ ಮೂರ್ತಿ ಎಲ್ಲರ ಆಕರ್ಷಣೆಗೆ ಕಾರಣವಾಗಿದೆ.

ನಗರಸಭಾ ಮೈದಾನದಲ್ಲಿ ಸ್ಥಳೀಯ ವಂದೇ ಮಾತರಂ ಸ್ವಯಂ ಸೇವಾ ಸಂಘ 11ನೇ ವರ್ಷದ ಗಣೇಶೋತ್ಸವದ ಅಂಗವಾಗಿ ಈ ಮೂರ್ತಿಯನ್ನು ಪ್ರತಿಷ್ಠಾಪಿಸಿದ್ದು, ಗಣೇಶ ಮೂರ್ತಿ ಹಾಗೂ ಕೋಟೆಯ ಥರದ ವೇದಿಕೆಗೆ ಸುಮಾರು ಮೂವತ್ತು ಲಕ್ಷ ಖರ್ಚು ಮಾಡಲಾಗಿದೆ. ಮಹಾರಾಷ್ಟ್ರ ರಾಜ್ಯದ ರಾಯಗಡ ಕೋಟೆ ಮಾದರಿಯಲ್ಲಿ ನಿರ್ಮಾಣವಾಗಿರುವ ವೇದಿಕೆ ಜನರನ್ನು ಆಕರ್ಷಿಸುತ್ತಿದ್ದು, ಶಿವಾಜಿ ಮಹಾರಾಜರ ಆಳ್ವಿಕೆಯನ್ನು ಬಿಂಬಿಸುತ್ತಿದೆ. ಕೋಟೆಯ ಜತೆಗೆ ಸೈನಿಕರು, ಅಶ್ವದಳ, ಗಜದಳ ನೋಡುಗರಿಗೆ ಇತಿಹಾಸ ನೆನಪು ತಂದುಕೊಡುತ್ತಿದೆ.

ವಂದೇ ಮಾತರಂ ಸ್ವಯಂ ಸೇವಾ ಸಂಘದ ಅಧ್ಯಕ್ಷ ಪ್ರಕಾಶ ಬುರಡಿಕಟ್ಟಿ ಮಾತನಾಡಿ, ಹಿಂದೂ ಸಾಮ್ರಾಜ್ಯದ ರೂವಾರಿ ಛತ್ರಪತಿ ಶಿವಾಜಿ ಮಹಾರಾಜರ ಜೀವನ ಚರಿತ್ರೆ ಹಾಗೂ ಅವರ ಸಾಧನೆಯನ್ನು ಬಿಂಬಿಸಬೇಕು ಎಂಬ ಕನಸಿತ್ತು. ಗಣೇಶ ಹಬ್ಬದ ಸಂದರ್ಭದಲ್ಲಿ ಶಿವಾಜಿ ಮಹಾರಾಜರ ಸಾಮ್ರಾಜ್ಯದ ಕೋಟೆ, ಸೈನಿಕರು, ಅಶ್ವದಳ, ಗಜದಳಗಳನ್ನು ಮಾಡುವ ಮೂಲಕ ನಮ್ಮ ಕನಸನ್ನು ಈಡೇರಿಸಿಕೊಂಡಿದ್ದೇವೆ ಎಂದರು.

ಸ್ಥಳೀಯರಾದ ಸಂಗೀತ ದೊಡ್ಡಮನಿ ಮಾತನಾಡಿ, ರಾಣೆಬೆನ್ನೂರ ಕಾ ರಾಜಾ ಗಣಪನನ್ನು ನೋಡಲು ಬಂದಿದ್ದೀವಿ. ಇಲ್ಲಿ ಶಿವಾಜಿ ಮಹಾರಾಜರ ಕೋಟೆ, ಸೈನಿಕರು, ಆಶ್ವದಳಗಳನ್ನು ತುಂಬಾ ಚೆನ್ನಾಗಿ ಮಾಡಿದ್ದಾರೆ. ಹಿಂದಿನ ಕಾಲದ ಇತಿಹಾಸ ತಿಳಿದುಕೊಳ್ಳಲು ಸಹಕಾರಿಯಾಗಿದೆ ಎಂದರು.