ಹಾವೇರಿ: ಉಕ್ರೇನ್ ಮತ್ತು ರಷ್ಯಾ ನಡುವಿನ ಯುದ್ಧದಲ್ಲಿ ಮೃತಪಟ್ಟ ನವೀನ್ ಅವರ ಪಾರ್ಥಿವ ಶರೀರ ಬರೋದನ್ನು ಎದುರು ನೋಡುತ್ತಿದ್ದಾರೆ ಕುಟುಂಬಸ್ಥರು. ಇತ್ತ ಮೃತ ನವೀನ್ ತಂದೆ, ತಾಯಿ ಮತ್ತು ಅಣ್ಣನ ಆರೋಗ್ಯ ತಪಾಸಣೆ ನಡೆಸಲಾಗಿದೆ.
ಜಿಲ್ಲೆಯ ರಾಣೆಬೆನ್ನೂರು ತಾಲೂಕಿನ ಚಳಗೇರಿ ಗ್ರಾಮದಲ್ಲಿರುವ ನವೀನ್ ಅವರ ನಿವಾಸಕ್ಕೆ ಆರೋಗ್ಯಾಧಿಕಾರಿಗಳು ಭೇಟಿ ಕೊಟ್ಟು, ಕುಟುಂಬಸ್ಥರ ಆರೋಗ್ಯ ತಪಾಸಣೆ ನಡೆಸಿದರು. ಈ ವೇಳೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ನರ್ಸ್ ವಿಜಯಲಕ್ಷ್ಮಿ ಅವರು ನವೀನ್ರನ್ನು ನೆನಪಿಸಿಕೊಂಡು ಕಣ್ಣೀರು ಹಾಕಿದ ಘಟನೆಯೂ ನಡೆಯಿತು.
ಆರೋಗ್ಯ ತಪಾಸಣೆ ನಂತರ ಮಾತನಾಡಿದ ನರ್ಸ್, ನವೀನ್ ಕುಟುಂಬದ ಮೂವರ ಆರೋಗ್ಯ ತಪಾಸಣೆ ಮಾಡಲಾಗಿದೆ. ಮೂವರ ಆರೋಗ್ಯ ನಾರ್ಮಲ್ ಆಗಿದೆ. ಸಾವಿನ ಸುದ್ದಿಯಿಂದ ಯಾರಿಗಾದ್ರೂ ಆಘಾತ ಆಗೋದು ಸಾಮಾನ್ಯ. ನನಗೂ ಸಹ ನವೀನ್ ಸಾವಿನಿಂದ ಆಘಾತವಾಯಿತು ಎಂದು ಬೇಸರ ವ್ಯಕ್ತಪಡಿಸಿದರು.
ಇದನ್ನೂ ಓದಿ: ಉಕ್ರೇನ್ನಲ್ಲಿ ಮೃತಪಟ್ಟ ನವೀನ್.. ಅಂತಿಮ ವಿಧಿವಿಧಾನಕ್ಕೆ ಸಕಲ ಸಿದ್ಧತೆ: ಆದರೆ ಮೃತದೇಹ ಬರೋದ್ಯಾವಾಗ?
ನಾನೂ ಕೂಡ ಎರಡ್ಮೂರು ಬಾರಿ ನವೀನ್ನನ್ನು ಭೇಟಿ ಆಗಿದ್ದೆ. ಲಾಕ್ಡೌನ್ ಸಮಯದಲ್ಲಿ ನವೀನ್ ಬಂದಿದ್ದ. ನಾನು ನಿವೃತ್ತಿ ನಂತರ ನಿನ್ನ ಆಸ್ಪತ್ರೆಗೆ ಬಂದು ನರ್ಸ್ ಆಗಿ ಕೆಲಸ ಮಾಡುತ್ತೇನೆ, ನೇಮಕ ಮಾಡಿಕೊಳ್ತೀಯಾ ಅಂತ ಜೋಕ್ ಮಾಡಿದ್ದೆ. ನಾನು ಡ್ಯೂಟಿಯಲ್ಲಿದ್ದಾಗ ತಂದೆ-ಮಗ ನವೀನ್ ಜೊತೆ ಮಾತನಾಡಿದ್ರು. ಅವನನ್ನು ಯಾಕೆ ಕರೆಸಿಲ್ಲ ಅಂತಾ ಅವರ ತಂದೆ ಬಳಿ ಕೇಳಿದ್ದೆ. ಯುದ್ಧ ನಡೆಯೋ ಸ್ಥಳದಿಂದ ನವೀನ್ ದೂರ ಇದ್ದಾನಮ್ಮ, ಸೇಫ್ ಆಗಿದ್ದಾನೆ ಅಂತಾ ಅವರ ತಂದೆ ಹೇಳಿದ್ದರು. ಅದೇ ದಿನ ಮಧ್ಯಾಹ್ನವೇ ಸಾವಿನ ಸುದ್ದಿ ಬಂತು. ಸಾವಿನ ಸುದ್ದಿ ಕೇಳಿ ನನಗೂ ದುಃಖವಾಯಿತು ಎಂದು ಕಣ್ಣೀರಿಟ್ಟರು.
