ಹಾವೇರಿ: ಕಾಲಿಟ್ಟ ಕಡೆಯಲ್ಲಾ ಜಯದ ಘೋಷಣೆ, ಶಿಳ್ಳೆ ಕೇಕೆಯ ಮಾರ್ಧನಿ.. ಸ್ಪರ್ಧೆಯಲ್ಲಿ ಜಯಭೇರಿಯಾಗಿ ಮಾಲೀಕನ ಮುಡಿಗೆ ಮೆಡಲ್ ಅರ್ಪಿಸುವುದೇ ಇದರ ಗುರಿ.. ತನ್ನನ್ನು ಹಿಡಿಯಲು ಎದುರು ಬಂದವರ ಪಾಲಿಗೆ ಸಿಂಹಸ್ವಪ್ನ.
ಹೌದು, ನಾವ್ ಇಷ್ಟೆಲ್ಲ ಹೇಳ್ತಿರೋದು ಹಾವೇರಿ ಡಾನ್ ಎಂದೇ ಖ್ಯಾತಿ ಪಡೆದಿದ್ದ ಜನತೆಯ ಅಚ್ಚುಮೆಚ್ಚಿನ ಹೋರಿ ಬಗ್ಗೆ.., ಜನರ ಮೆಚ್ಚುಗೆಯ ಈ ಡಾನ್ ಇನ್ನು ನೆನಪು ಮಾತ್ರ.. ಈ ಮಾತನ್ನು ಕೇಳಿದ ಅಭಿಮಾನಿಗಳಲ್ಲಿ ಮಡುಗಟ್ಟುತ್ತೆ ಶೋಕ.
ಮಂಗಳವಾರ ಡಾನ್ ಹೆಸರಿನ ಹೋರಿ ಸಾವನ್ನಪ್ಪಿದ್ದು, ಅಭಿಮಾನಿಗಳು ಶೋಕಸಾಗರದಲ್ಲಿ ಮುಳುಗಿದ್ದಾರೆ. ರಾಜ್ಯ ಸೇರಿದಂತೆ ತಮಿಳುನಾಡಿನಲ್ಲಿಯೂ ಡಾನ್ ತನ್ನದೇ ಆದ ಸಹಸ್ರಾರು ಸಂಖ್ಯೆಯ ಅಭಿಮಾನಿಗಳನ್ನು ಹೊಂದಿತ್ತು ಎಂಬುದು ಇದರ ತಾಕತ್ತಿಗೆ ಸಾಕ್ಷಿಯಾಗಿತ್ತು.
ಸ್ಪರ್ಧೆಯಲ್ಲಿ ಗೆದ್ದ ಬಹುಮಾನಗಳ ಸಂಖ್ಯೆ 200ಕ್ಕೂ ಹೆಚ್ಚು:
ವಯೋಸಹಜ ಕಾಯಿಲೆಯಿಂದ ಬಳಲುತ್ತಿದ್ದ ಡಾನ್ 19ನೇ ವಯಸ್ಸಿನಲ್ಲಿ ಅಸುನೀಗಿದೆ. ಇದು ರಾಜ್ಯ ಸೇರಿದಂತೆ ತಮಿಳುನಾಡಿನಲ್ಲಿಯೂ ಜನರ ಪ್ರೇಮ ಗಳಿಸಿತ್ತು. ಡಾನ್ ನಮ್ಮ ಹೆಸರನ್ನ ಎರಡು ರಾಜ್ಯಗಳಲ್ಲಿ ಜನಪ್ರಿಯಗೊಳಿಸಿತ್ತು. ಅದು 25 ಬೈಕ್, 50 ತೊಲೆ ಬಂಗಾರ, ಫ್ರಿಡ್ಜ್, ಅಲ್ಮೇರಾ ಸೇರಿದಂತೆ ಸುಮಾರು 200ಕ್ಕೂ ಹೆಚ್ಚು ಬಹುಮಾನಗಳನ್ನು ಸ್ಪರ್ಧೆಯಲ್ಲಿ ಗೆದ್ದಿತ್ತು ಎನ್ನುತ್ತಾರೆ ಹೋರಿ ಮಾಲೀಕ..
ಇದನ್ನೂ ಓದಿ: ರಾಜ್ಯದಲ್ಲಿ 14 ಸಾವಿರಕ್ಕೂ ಹೆಚ್ಚು ಕೋವಿಡ್ ಕೇಸ್ ಪತ್ತೆ: ಶೇ.10 ದಾಟಿತು ಪಾಸಿಟಿವಿಟಿ ರೇಟ್, ಬೆಂಗಳೂರಿಗೆ ಆಘಾತ!
ಇಂದು ಮೃತಪಟ್ಟ ಡಾನ್ನ ಪಾರ್ಥಿವ ಶರೀರವನ್ನು ಹಾವೇರಿಯ ಕುಳೇನೂರು ಗ್ರಾಮದಿಂದ ಮಾಲೀಕರ ಗೃಹಕ್ಕೆ ಟ್ರ್ಯಾಕ್ಟ್‌ರ್ ಮೂಲಕ ಮೆರವಣಿಗೆ ನಡೆಸಲಾಯಿತು. ನಂತರ ಕಲ್ಲುಮಂಟಪ ರಸ್ತೆಯಲ್ಲಿ ಹಾವೇರಿ ಡಾನ್ನ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಗಿತ್ತು. ಜಿಲ್ಲೆಯ ಅಭಿಮಾನಿಗಳು ಸೇರಿದಂತೆ ತಮಿಳುನಾಡಿನ ಅಭಿಮಾನಿಗಳು ಸಹ ಡಾನ್ ಅಂತಿಮ ದರ್ಶನ ಪಡೆದರು.
ತೆಂಗಿನ ಕಾಯಿ ಒಡೆದು ಪೂಜೆ ಸಲ್ಲಿಕೆ:
ಸೋಲಿಲ್ಲದ ಸರದಾರ ಎಂದೇ ಪ್ರಸಿದ್ಧಿ ಪಡೆದಿದ್ದ ಡಾನ್ ಪಾರ್ಥಿವ ಶರೀರದ ಮುಂದೆ ಅಭಿಮಾನಿಗಳು ತೆಂಗಿನ ಕಾಯಿ ಒಡೆದು ಪೂಜೆ ಸಲ್ಲಿಸಿದ್ದು, ವಿಶೇಷವಾಗಿತ್ತು. ನಂತರ ಗುಡ್ಡದ ಮತ್ತಳ್ಳಿಯಲ್ಲಿನ ಜಮೀನಿನಲ್ಲಿ ಅಂತ್ಯಕ್ರಿಯೆ ನೆರವೇರಿಸಲಾಯಿತು. ಆದ್ರೆ ಬಹುಮಾನಗಳ ಸರದಾರ ಡಾನ್ ಯಾವಾಗಲೂ ಅಭಿಮಾನಿಗಳ ಮನದಲ್ಲಿ ಶಾಶ್ವತವಾಗಿರುತ್ತಾನೆ ಎಂಬುದಂತೂ ಸತ್ಯ.
