'ಎರಿ ದೊರೆಯಾತಲೇ.. ದೈವ ದರ್ಬಾರ್​ ಆತಲೇ ಪರಾಕ್': ಕಾರ್ಣಿಕ ನುಡಿದ ದೇವರಗುಡ್ಡದ ಗೊರವಪ್ಪ

ಕರ್ನಾಟಕದಲ್ಲಿಯೇ ಪ್ರಸಿದ್ಧಿ ಪಡೆದಿರುವ ರಾಣೆಬೆನ್ನೂರು ತಾಲೂಕಿನ ದೇವರಗುಡ್ಡ ಕಾರ್ಣಿಕೋತ್ಸವ ನಡೆದಿದ್ದು, ಈ ಬಾರಿ 'ಎರಿ ದೊರೆಯಾತಲೇ ದೈವ ದರ್ಬಾರ್​ ಆತಲೇ ಪರಾಕ್' ಎಂದು ಕಾರ್ಣಿಕ ನುಡಿದಿದ್ದಾರೆ.

ಹಾವೇರಿ: ರಾಜ್ಯದಲ್ಲಿಯೇ ಪ್ರಸಿದ್ಧವಾದ ಹಾವೇರಿ ಜಿಲ್ಲೆ ರಾಣೆಬೆನ್ನೂರು ತಾಲೂಕಿನ ದೇವರಗುಡ್ಡ ಕಾರ್ಣಿಕೋತ್ಸವ ಗುರುವಾರ ನಡೆಯಿತು. ದೇವರಗುಡ್ಡದ ಕಾರ್ಣಿಕ ನುಡಿಯುವ ಗೊರವಪ್ಪ ನಾಗಪ್ಪ 20 ಅಡಿ ಬಿಲ್ಲನ್ನೇರಿ ಪ್ರಸ್ತುತ ವರ್ಷದ ಕಾಣಿಕ ನುಡಿದು ಮೇಲಿನಿಂದ ಧುಮುಕಿದರು. 'ಎರಿ ದೊರೆಯಾತಲೇ ದೈವ ದರ್ಬಾರ್​ ಆತಲೇ ಪರಾಕ್' ಎಂದು ಕಾರ್ಣಿಕ ನುಡಿದಿದ್ದಾರೆ.

ಬಿಲ್ಲಿನಿಂದ ಧುಮುಕಿದ ಗೊರವಪ್ಪನನ್ನ ಭಕ್ತರು ಕೆಳಗೆ ಬೀಳದಂತೆ ಹಿಡಿದರು. ಈ ಸಂದರ್ಭದಲ್ಲಿ ಬಂದಂತಹ ಭಕ್ತರು ಕಾರ್ಣಿಕ ವಿಶ್ಲೇಷಣೆ ಮಾಡಿದರು. ಕರಿಭೂಮಿ ರೈತರಿಗೆ ಉತ್ತಮ ಫಸಲು ಬರುತ್ತದೆ. ವಿಶ್ವ ಕೊರೊನಾ ಛಾಯೆಯಿಂದ ಹೊರಬರುತ್ತದೆ ಎಂದು ವಿಶ್ಲೇಷಕರು ವಿಶ್ಲೇಷಣೆ ಮಾಡಿದರು.

ಇದಕ್ಕೂ ಮೊದಲು ದೇವರಗುಡ್ಡದ ಕರಿಯಾಲದ ಸಮೀಪದಲ್ಲಿ ಹಲವು ಧಾರ್ಮಿಕ ವಿಧಿವಿಧಾನಗಳನ್ನು ನಡೆಸಲಾಯಿತು. ಈ ಕಾಣಿಕ ಕೇಳಲು ರಾಜ್ಯದ ವಿವಿಧೆಡೆಯಿಂದ ಆಗಮಿಸಿದ್ದ ಸಾವಿರಾರು ಭಕ್ತರು ಕಾರ್ಣಿಕೋತ್ಸವಕ್ಕೆ ಸಾಕ್ಷಿಯಾದರು.