ಹಾವೇರಿಯಲ್ಲಿ ಎರಡು ಕಾರುಗಳ ನಡುವೆ ಮುಖಾಮುಖಿ ಡಿಕ್ಕಿ; ನಾಲ್ವರು ಸಾವು

ರಾಣೆಬೆನ್ನೂರು ನಗರದ ಹೊರವಲಯದಲ್ಲಿರುವ ಪೂನಾ-ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ ನಾಲ್ಕರಲ್ಲಿ ಭೀಕರ ಅಪಘಾತ ಸಂಭವಿಸಿದೆ.

ಹಾವೇರಿ: ಎರಡು ಕಾರುಗಳ ನಡುವೆ ಮುಖಾಮುಖಿ ಡಿಕ್ಕಿಯಾಗಿ ಸ್ಥಳದಲ್ಲೇ ನಾಲ್ವರು ಮೃತಪಟ್ಟ ಘಟನೆ ಹಾವೇರಿ ಜಿಲ್ಲೆಯ ರಾಣೆಬೆನ್ನೂರು ನಗರದ ಹೊರ ವಲಯದಲ್ಲಿ ನಡೆದಿದೆ. ಗುಜರಾತ್ ಮತ್ತು ಕೇರಳ‌ ಮೂಲದ ಕಾರುಗಳ ನಡುವೆ ರಾಣೆಬೆನ್ನೂರು ನಗರದ ಹೊರವಲಯದಲ್ಲಿರುವ ಪೂನಾ-ಬೆಂಗಳೂರು ರಾಷ್ಟ್ರೀಯ ಹೆದ್ದಾರಿ ನಾಲ್ಕರಲ್ಲಿ ಅಪಘಾತ ಘಟಿಸಿದೆ.

ಗುಜರಾತ್​ ಮೂಲದ ದಿನೇಶ್​ ಬಾಯ್ (38), ಲತೀಶ್​ ಬಾಯ್ (37) ಸುರೇಶ್​ ಬಾಯ್ (39) ಮತ್ತು ಕೇರಳ ಮೂಲದ ಸಾಹಲ್ (37) ಮೃತರು. ಘಟನೆಯಲ್ಲಿ ಗಾಯಾಗೊಂಡ ಕೇರಳ ಮೂಲದ ದಾನೇಶ್​ ಮತ್ತು ಜೈನಾಬಿ ಹಾಗೂ ಗುಜರಾತ್​ ಮೂಲದ ಅಶ್ವಿನ್ ಎಂಬುವವರನ್ನು ರಾಣೆಬೆನ್ನೂರು ತಾಲೂಕು ಸರ್ಕಾರಿ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ.

ದಾವಣಗೆರೆ ಕಡೆಯಿಂದ ಹುಬ್ಬಳ್ಳಿ ಕಡೆಗೆ ಅತ್ಯಂತ ವೇಗವಾಗಿ ಹೊರಟಿದ್ದ ಗುಜರಾತ್​ ಮೂಲದ ಕಾರಿನ ಟೈರ್ ಬರ್ಸ್ಟ್ ಆಗಿದೆ. ಪರಿಣಾಮವಾಗಿ ಕಾರು ರಸ್ತೆ ನಡುವಿನ ಡಿವೈಡರ್​ಗೆ ಡಿಕ್ಕಿ ಹೊಡೆದು ಎದುರಾಗಿ ವಾಹನಗಳು ಬರುತ್ತಿದ್ದ ರಸ್ತೆಗೆ ಉರುಳಿದೆ. ಅದೇ ಸಮಯಕ್ಕೆ ಸರಿಯಾಗಿ ಹುಬ್ಬಳ್ಳಿ ಕಡೆಯಿಂದ
ದಾವಣಗೆರೆ ಕಡೆಗೆ ಹೊರಟಿದ್ದ ಕೇರಳ ಮೂಲದ ಕಾರು ಬಂದಿದೆ. ಗುಜರಾತ್​ ಮೂಲದ ಕಾರು ಪಲ್ಟಿ ಹೊಡೆದು ಕೇರಳ ಮೂಲದ ಕಾರಿನ ಮೇಲೆ ಬಿದ್ದಿದೆ.

ಎರಡು ಕಾರುಗಳ‌ ನಡುವಿನ ಅಪಘಾತದ ಸುದ್ದಿ ತಿಳಿಯುತ್ತಿದ್ದಂತೆ ಎಸ್​ಪಿ ಹನುಮಂತರಾಯ, ಹೆಚ್ಚುವರಿ ಎಸ್​ಪಿ ವಿಜಯಕುಮಾರ, ಸಿಪಿಐ ಮುತ್ತಪ್ಪ ಗೌಡಪ್ಪ ಗೌಡರ ಹಾಗೂ ಸಂಚಾರಿ ಠಾಣೆ ಪೊಲೀಸರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ಪಂಪ್ ಸೆಟ್ ಕದಿಯಲು ಹೋದವರು ಶವವಾಗಿ ಪತ್ತೆ: ಆರೋಪಿಗಳಿಗೆ ಶೋಧ