ಸಂಪಂಗೆರೆ ರಣಬೇಟೆಗಾರನ ಮೊದಲ ವರ್ಷದ ತಿಥಿ.. ಹೋರಿಯ ಸ್ಮರಣಾರ್ಥ ರಕ್ತದಾನ ಶಿಬಿರ ಏರ್ಪಡಿಸಿದ ಹಾವೇರಿಯ ಅಭಿಮಾನಿಗಳು

ಅನಾರೋಗ್ಯದಿಂದ ಅಸುನೀಗಿದ್ದ ಸಂಪಂಗೆರೆ ರಣಬೇಟೆಗಾರ ಹೋರಿಯ ಮೊದಲ ವರ್ಷ ತಿಥಿಯನ್ನು ಅಭಿಮಾನಿಗಳು ರಕ್ತದಾನ ಶಿಬಿರ ನಡೆಸುವ ಮೂಲಕ ಆಚರಿಸಿದರು.

ಹಾವೇರಿ: ಅದು ತಮಿಳುನಾಡಿನಲ್ಲಿ ನಡೆಯುವ ಹೋರಿ ಬೆದರಿಸುವ ಸ್ಪರ್ಧೆಗಳಲ್ಲಿ ಹೆಸರು ಮಾಡಿದ ಹೋರಿ. ಈ ಹೋರಿ ಹಲವು ಸ್ಪರ್ಧೆಗಳಲ್ಲಿ ತನ್ನದೇ ಆದ ಛಾಪು ಮೂಡಿಸಿತ್ತು. ಹೀಗಾಗಿ ಹೋರಿಗೆ ಸಂಪಂಗೆರೆ ರಣಬೇಟೆಗಾರ ಎಂದು ಹೆಸರಿಡಲಾಗಿತ್ತು. ತಮಿಳುನಾಡಿನಲ್ಲಿ ಹೆಸರವಾಸಿಯಾಗಿದ್ದ ಸಂಪಂಗೆರೆ ರಣಬೇಟೆಗಾರನನ್ನು ಹಾವೇರಿಯ ದನ ಬೆದರಿಸುವ ಸ್ಪರ್ಧೆಗೆ ಕರೆತರಲಾಗಿತ್ತು. ಹಾವೇರಿಯ ಶಿವು ಎಂಬುವವರು ತಮಿಳುನಾಡಿನ ಸಂಪಂಗೆರೆ ರಣಬೇಟೆಗಾರ ಹೋರಿಯ ಮಾಲೀಕ ಶಶಿ ಅವರ ಮನವೊಲಿಸಿ ಹಾವೇರಿಗೆ ಕರೆತಂದಿದ್ದರು.

ಅಖಾಡದಲ್ಲಿ ಧೂಳೆಬ್ಬಿಸಬೇಕಿದ್ದ ರಣಬೇಟೆಗಾರ ಅನಾರೋಗ್ಯಕ್ಕೆ ತುತ್ತಾದಿಗಿದ್ದ. ಶಿವು ಮತ್ತು ತಮಿಳುನಾಡಿನ ಶಶಿ ಹಾವೇರಿ ಜಿಲ್ಲೆ ಸೇರಿದಂತೆ ವಿವಿಧ ಪಶು ಆಸ್ಪತ್ರೆಗಳಿಗೆ ತೋರಿಸಿದರು ರಣಬೇಟೆಗಾರನನ್ನು ಬದುಕಿಸಿಕೊಳ್ಳಲು ಸಾಧ್ಯವಾಗಲಿಲ್ಲ. ಅಗಲಿದ ಹೋರಿಯ ಪಾರ್ಥಿವ ಶರೀರವನ್ನು ತಗೆದುಕೊಂಡು ಹೋಗಿ ತಮಿಳುನಾಡಿನಲ್ಲಿ ಅಂತ್ಯಕ್ರಿಯೆ ಮಾಡಲಾಗಿತ್ತು. ಈ ರಣಬೇಟೆಗಾರ ಅಗಲಿ ಇಂದಿಗೆ ಒಂದು ವರ್ಷ. ಈ ಹಿನ್ನೆಲೆಯಲ್ಲಿ ಹೋರಿಯ ಮಾಲೀಕರಾದ ಶಶಿ ಮತ್ತು ಶಿವು ಹಾವೇರಿಯಲ್ಲಿ ಮೊದಲ ವರ್ಷದ ಪುಣ್ಯತಿಥಿ ಆಚರಿಸಿದರು.

ಶಿವಾಜಿನಗರದಲ್ಲಿರುವ ಶಿವು ಅವರ ಮನೆ ಮುಂದೆ ರಣಬೇಟೆಗಾರನ ಆಳೆತ್ತರದ ಭಾವಚಿತ್ರ ಹಾಕಿ ಪೂಜೆ ಸಲ್ಲಿಸಲಾಯಿತು. ಹಾವೇರಿ ಜಿಲ್ಲೆ ಶಿಗ್ಗಾಂವಿ ತಾಲೂಕಿನ ಗಂಜಿಗಟ್ಟಿ ಚರಮೂರ್ತಿಗಳ ನೇತೃತ್ವದಲ್ಲಿ ಪೂಜೆ ನೆರವೇರಿತು. ಶಿವಾಜಿನಗರದ ಮಹಿಳೆಯರು ಶಿವು ಸಂಬಂಧಿಕರು ಪುಣ್ಯತಿಥಿಯಲ್ಲಿ ಪಾಲ್ಗೊಂಡು ಅಗಲಿದ ರಣಬೇಟೆಗಾರನಿಗೆ ನಮನ ಸಲ್ಲಿಸಿದರು. ಇದೇ ವೇಳೆ ತಮಿಳುನಾಡಿನಿಂದ ಹೋರಿ ಅಭಿಮಾನಿಗಳು ಆಗಮಿಸಿದ್ದರು.

ರಣಬೇಟೆಗಾರನ ಮೊದಲ ವರ್ಷದ ಪುಣ್ಯತಿಥಿ ಅಂಗವಾಗಿ ಅಭಿಮಾನಿಗಳು ಇಂದು ರಕ್ತದಾನ ಶಿಬಿರ ಏರ್ಪಡಿಸಿದ್ದರು. 16ಕ್ಕೂ ಹೆಚ್ಚು ಜನ ರಕ್ತದಾನ ಮಾಡಿದರು. ಪುಣ್ಯತಿಥಿಯಲ್ಲಿ ಭಾಗವಹಿಸಿದ್ದ 25ಕ್ಕೂ ಅಧಿಕ ವಿಶೇಷಚೇತನ ಮಕ್ಕಳು ರಣಬೇಟೆಗಾರನಿಗೆ ಪೂಜೆ ಸಲ್ಲಿಸಿದರು.

ಈ ಕುರಿತು ಶಿವು ಮಾತನಾಡಿ, ಸಂಪಂಗೆರೆ ರಣಬೇಟೆಗಾರ ನಮಗೆ ದೊರೆತಿದ್ದೆ ದೊಡ್ಡ ಅದೃಷ್ಟ. ಅವನು ಹಾವೇರಿ ಜಿಲ್ಲೆ ಸೇರಿದಂತೆ ಸುತ್ತಮುತ್ತಲ ಜಿಲ್ಲೆಗಳ ಸ್ಪರ್ಧೆಗಳಲ್ಲಿ ಭಾಗವಹಿಸಬೇಕಾಗಿತ್ತು. ಆದರೆ ದುರ್ದೈವದಿಂದ ಅನಾರೋಗ್ಯಕ್ಕೀಡಾಗಿ ಸಾವನ್ನಪ್ಪಿದ. ಅವನು ಸ್ಪರ್ಧಿಸದಿದ್ದರು ಸಹ ಹಾವೇರಿ ಸುತ್ತಮುತ್ತ ಸಾವಿರಾರು ಅಭಿಮಾನಿಗಳನ್ನು ಹೊಂದಿದ್ದ. ಆತನ ಸಾವು ಇನ್ನಿಲ್ಲದ ನೋವು ತಂದಿದೆ ಎಂದು ದುಃಖ ವ್ಯಕ್ತಪಡಿಸಿದರು.

ಹೋರಿಯ ಅಭಿಮಾನಿ ಮಣಿ ಮಾತನಾಡಿ, ಸಂಪಂಗೆರೆ ರಣಬೇಟೆಗಾರನನ್ನು ನನ್ನ ಟೆಂಪೋದಲ್ಲಿ ಇಲ್ಲಿಗೆ ತಂದು ಬಿಟ್ಟುಹೋಗಿದ್ದೆ. ನಂತರ ಅನಾರೋಗ್ಯದಿಂದ ಅಸುನೀಗಿತು ಎಂದು ತಿಳಿಯಿತು. ಹೋರಿಯ ಅಂತ್ಯಕ್ರಿಯೆಯನ್ನು ಸಂಪಂಗೆರೆಯಲ್ಲಿ ಮಾಡಲಾಯಿತು. ಅಲ್ಲಿ ಕಾರ್ಯಕ್ರಮವನ್ನು ನಡೆಸಿದ್ದೆವು, ಇಂದು ಮೊದಲ ವರ್ಷದ ತಿಥಿಗೆ ನಮ್ಮನ್ನು ಮತ್ತು ಅನಾಥಾಶ್ರಮ ಮಕ್ಕಳ ಕರೆಸಿ ಆಚರಿಸುತ್ತಿದ್ದಾರೆ. ಜೊತೆ ರಕ್ತದಾನ ಶಿಬಿರವನ್ನು ಹಮ್ಮಿಕೊಂಡಿದ್ದಾರೆ ಎಂದು ತಿಳಿಸಿದರು.

ಇದನ್ನೂ ಓದಿ:'ಯಜಮಾನ' ಹೋರಿ ಹುಟ್ಟುಹಬ್ಬ ಆಚರಿಸಿದ ಹಾವೇರಿ ರೈತ; ಅಭಿಮಾನಿಗಳಿಂದ ರಕ್ತದಾನ ಶಿಬಿರ!