ಸಣ್ಣ ವ್ಯಾಪಾರಿಗಳ ಜೀವ ಹಿಂಡಿದ ಕೊರೊನಾ: ಹಸಿವಿನಿಂದ ಸಾಯುವ ಭೀತಿ

ಕೂದಲು, ಪಿನ್ನಿನಂತಹ ಸಣ್ಣ ವಸ್ತುಗಳನ್ನು ಮಾರಾಟ ಮಾಡಿ, ಜೀವನ ಸಾಗಿಸುತ್ತಿದ್ದ ಅಲೆಮಾರಿಗಳು ಆಹಾರದ ಕೊರತೆ ಎದುರಿಸುತ್ತಿದ್ದಾರೆ. ಸರ್ಕಾರ ಶೀಘ್ರವೇ ಉದ್ಯೋಗ ಹಾಗೂ ಊಟದ ವ್ಯವಸ್ಥೆ ಕಲ್ಪಿಸಬೇಕು ಎಂದು ಹಾವೇರಿ ಜಿಲ್ಲೆ ಹಾನಗಲ್​ ತಾಲೂಕಿನ ನರೇಗಲ್​ ಗ್ರಾಮದ ಅಲೆಮಾರಿಗಳು ಆಗ್ರಹಿಸುತ್ತಿದ್ದಾರೆ.

ಹಾನಗಲ್: ಲಾಕ್​ಡೌನ್​ ದೊಡ್ಡ ಉದ್ಯಮಗಳ ಬೆನ್ನು ಮುರಿದರೆ, ಸಣ್ಣ ಉದ್ಯಮಗಳ ಕುತ್ತಿಗೆಯನ್ನು ಹಿಸುಕಿದೆ. ದಿನಗೂಲಿ, ವ್ಯಾಪಾರ ನಂಬಿ ಬದುಕು ಕಟ್ಟಿಕೊಂಡವರನ್ನು ಹಸಿವಿನ ಕೂಪಕ್ಕೆ ತಳ್ಳಿದೆ.

ಜಿಲ್ಲೆಯ ಹಾನಗಲ್ ತಾಲೂಕಿನ ನರೇಗಲ್ ಗ್ರಾಮದಲ್ಲಿ 50ಕ್ಕೂ ಹೆಚ್ಚು ಅಲೆಮಾರಿ ಜನಾಂಗದ (ದುರಮುರಗಿ) ಕುಟುಂಬಗಳು ವಾಸವಾಗಿವೆ. ಇವರ ಮೂಲ ಕಸಬು ಕೂದಲು, ಪಿನ್ನಿನಂತಹ ಸಾಮಾನುಗಳನ್ನ ಮಾರಾಟ ಮಾಡುವುದಾಗಿದೆ.

ಲಾಕ್​ಡೌನ್ ಪರಿಣಾಮ ಮನೆಯಲ್ಲಿ ಇರಬೇಕಿದೆ. ಹೊರಗಡೆ ಬಂದರೆ ಪೊಲೀಸರು ಲಾಠಿ ಬೀಸುತ್ತಾರೆ. ಹಸಿವಿನಿಂದ ಮಕ್ಕಳು ಅಳುತ್ತಿವೆ. ಒಂದು ಹೊತ್ತಿನ ಊಟವನ್ನೂ ನೀಡಲಾಗುತ್ತಿಲ್ಲ. ಸರ್ಕಾರ ನೀಡಿದ ಅಕ್ಕಿ, ಬೇಳೆ ಖಾಲಿಯಾಗಿದೆ. ಹಸಿವಿನಿಂದಲೇ ಮಕ್ಕಳು ಅನಾರೋಗ್ಯ ತುತ್ತಾಗುತ್ತವೆ ಎಂದು ಇಲ್ಲಿನ ನಿವಾಸಿ ಕಸ್ತೂರಿ ಎಂಬುವವರು ತಮ್ಮ ನೋವು ಹೇಳಿದರು.

ಕೆಲವರು ರೇಷನ್ ಕಾರ್ಡ್​ಗಳನ್ನ ಹೊಂದಿದ್ದಾರೆ. ಉಳಿದವರು ಭಿಕ್ಷೆ ಬೇಡಿ ತಿನ್ನಬೇಕಿದೆ. ಅದಕ್ಕೂ ಹೊರಗಡೆ ಹೋಗಲು ಆಗುತ್ತಿಲ್ಲ ಎಂದು ಮಹಿಳೆಯೊಬ್ಬರು ಬೇಸರ ವ್ಯಕ್ತಪಡಿಸಿದರು.

ಲಾಕ್​ಡೌನ್ ಹೀಗೆ ಮುಂದುವರೆದರೆ ನಾವೆಲ್ಲ ಹಸಿವಿನಿಂದಲೇ ಪ್ರಾಣ ಬಿಡಬೇಕಾಗುತ್ತದೆ. ಕೂಡಲೇ ಸರ್ಕಾರ ದಿನಸಿ ಜೊತೆಗೆ ಉದ್ಯೋಗಕ್ಕೆ ದಾರಿ ಮಾಡಿಕೊಡುವಂತೆ ಆಗ್ರಹಿಸಿದರು.