ಹಾಸನದಲ್ಲೂ ವ್ಯಾಕ್ಸಿನೇಷನ್ ಶುರು; ಮೊದಲ ಲಸಿಕೆ ವೈದ್ಯರಿಗೆ

ದೇಶಾದ್ಯಂತ ಕೊರೊನಾ ಲಸಿಕೆ ನೀಡುವ ಕಾರ್ಯಕ್ರಮ ಪ್ರಾರಂಭವಾಗಿದೆ. ಇಂದು ಮೊದಲ ಹಂತದ ಲಸಿಕಾ ಕಾರ್ಯಕ್ರಮದಲ್ಲಿ ಚನ್ನರಾಯಪಟ್ಟಣದ ಸರ್ಕಾರಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುವ ನೂರು ಜನ ಕೊರೊನಾ ವಾರಿಯರ್ಸ್​ಗೆ ಮೊದಲ ಹಂತದಲ್ಲಿ ಲಸಿಕೆ ನೀಡಲಾಯಿತು.

ಚನ್ನರಾಯಪಟ್ಟಣ (ಹಾಸನ): ದೇಶಾದ್ಯಂತ ಕೊರೊನಾ ಲಸಿಕಾಕರಣ ಕಾರ್ಯ ಪ್ರಾರಂಭವಾಗಿದೆ. ಇಂದು ಚನ್ನರಾಯಪಟ್ಟಣದ ಸರ್ಕಾರಿ ಆಸ್ಪತ್ರೆಯಲ್ಲಿ ಕೆಲಸ ಮಾಡುವ ನೂರು ಜನ ಕೊರೊನಾ ವಾರಿಯರ್ಸ್​ಗೆ ಮೊದಲ ಹಂತದಲ್ಲಿ ಲಸಿಕೆ ನೀಡಲಾಯಿತು.

ಶ್ರವಣಬೆಳಗೊಳ ವಿಧಾನಸಭಾ ಕ್ಷೇತ್ರದ ಶಾಸಕ ಸಿ.ಎನ್. ಬಾಲಕೃಷ್ಣ ಕಾರ್ಯಕ್ರಮ ಉದ್ಘಾಟಿಸಿದರು. ಮೊದಲ ಲಸಿಕೆಯನ್ನು ವೈದ್ಯ ಮಹೇಶ್ ಅವರಿಗೆ ನೀಡುವ ಮೂಲಕ ಚಾಲನೆ ದೊರಕಿತು. ಆ ಬಳಿಕ ಇನ್ನೂ ಅನೇಕ ಕೊರೊನಾ ವಾರಿಯರ್ಸ್​ಗೆ ಲಸಿಕೆ ನೀಡಲಾಯಿತು. ವೈದ್ಯರ ಸೂಚನೆ ಮೇರೆಗೆ ಲಸಿಕೆ ಪಡೆದುಕೊಂಡವರ ಮೇಲೆ ಅರ್ಧ ಗಂಟೆ ಕಾಲ ನಿಗಾ ವಹಿಸಲಾಯಿತು.

ಇಂದು ವ್ಯಾಕ್ಸಿನ್​ ​ ಪಡೆದ ವ್ಯಕ್ತಿಗಳು ಇನ್ನು 4 ವಾರದಲ್ಲಿ ಮತ್ತೆ ಅದೇ ಕಂಪನಿಯ ಇನ್ನೊಂದು ಡೋಸ್ ಪಡೆಯಬೇಕು ಎಂದು ವೈದ್ಯರು ಮಾಹಿತಿ ನೀಡಿದರು.

"ಇಂದು ಜಿಲ್ಲೆಯಲ್ಲಿ ಒಟ್ಟು ಹತ್ತು ಸ್ಥಳಗಳನ್ನು ಗುರುತಿಸಿ 7 ತಾಲೂಕುಗಳಲ್ಲಿ ಲಸಿಕೆ ನೀಡುತ್ತಿದ್ದಾರೆ. ಹಾಗಾಗಿ ಇಂದು ನಾನು ಮೊದಲು ವ್ಯಾಕ್ಸಿನ್ ಪಡೆದುಕೊಂಡಿದ್ದೇನೆ. ನಂತರ ನಮ್ಮ ಎಲ್ಲ ಸಿಬ್ಬಂದಿಗಳೂ ವ್ಯಾಕ್ಸಿನ್​ ತೆಗೆದುಕೊಳ್ಳುತ್ತಾರೆ." ಎಂದು ಡಾಕ್ಟರ್ ಮಹೇಶ್ ತಿಳಿಸಿದರು.

ವ್ಯಾಕ್ಸಿನೇಷನ್​ ಉದ್ಘಾಟಿಸಿ ಮಾತನಾಡಿದ ಸಿ.ಎನ್. ಬಾಲಕೃಷ್ಣ, ಜಿಲ್ಲೆಯಲ್ಲಿ ಯಾರಿಗೂ ಯಾವುದೇ ಭಯ ಬೇಡ. ವ್ಯಾಕ್ಸಿನ್ ಪಡೆಯುವುದರಿಂದ ಪಯಾವುದೇ ತೊಂದರೆಯಾಗುವುದಿಲ್ಲ. ಸರ್ಕಾರದ ಆದೇಶ ಬಂದ ಮೇಲೆ ನಾವೂ ತೆಗೆದುಕೊಳ್ಳುತ್ತೇವೆ ಎಂದರು.