ಅರಸೀಕೆರೆ ಭಗೀರಥ ನಾನೇ ಕಣ್ರಿ, ಇನ್ನೇನು ಅಭಿವೃದ್ಧಿಯಾಗಬೇಕು: ಶಿವಲಿಂಗೇಗೌಡ ತಿರುಗೇಟು

ಅರಸೀಕೆರೆ ಶಾಸಕನಾದ ಮೇಲೆ ನಾನು ಮಾಡಿರುವ ಅಭಿವೃದ್ಧಿ ಕೆಲಸಗಳನ್ನು ಇಡೀ ರಾಜ್ಯವೇ ಹೇಳುತ್ತೆ. ಆದರೆ, ಬಿಜೆಪಿಯವರಿಗೆ ಮಾಡಲು ಕೆಲಸವಿಲ್ಲದೇ ಆರೋಪ ಮಾಡುತ್ತಿದ್ದಾರೆ ಎಂದು ಶಾಸಕ ಕೆ ಎಂ ಶಿವಲಿಂಗೇಗೌಡ ವ್ಯಂಗ್ಯವಾಡಿದ್ದಾರೆ.

ಹಾಸನ: ಬರದ ನಾಡಿನ ಭಗಿರಥ ಅಂತ ಇಡೀ ರಾಜ್ಯವೇ ನನ್ನನ್ನು ಕೊಂಡಾಡುತ್ತಿರುವಾಗ, ನಮ್ಮ ಪಕ್ಷದಲ್ಲಿ ಉಸಿರುಗಟ್ಟುವ ವಾತಾವರಣ ಇದೆ ಅಂತ ಸುಳ್ಳು ಹೇಳುತ್ತಾರೆ ಎಂದು ಸಿಎಂ ರಾಜಕೀಯ ಕಾರ್ಯದರ್ಶಿ ಎನ್.ಆರ್ ಸಂತೋಷ್ ವಿರುದ್ಧ ಅರಸೀಕೆರೆ ಶಾಸಕ ಕೆ ಎಂ ಶಿವಲಿಂಗೇಗೌಡ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ನಗರದಲ್ಲಿ ಮಾತನಾಡಿದ ಅವರು, ಆಪರೇಷನ್ ಕಮಲ ಮಾಡುವುದಕ್ಕೆ ಈ ರೀತಿ ಹೇಳಿಕೆ ನೀಡೋದು ನಾಚಿಕೆಗೇಡಿನ ಸಂಗತಿ. ಅರಸೀಕೆರೆ ನಗರಸಭೆಯಲ್ಲಿ ಕೋರಂ ಸಮಸ್ಯೆ ಕಡಿಮೆ ಇದೆ ಎಂಬ ಕಾರಣಕ್ಕೆ ನಿಮ್ಮ ಬೆಂಬಲ ಬೇಕು ಅಂತ ನಮ್ಮನ್ನು ಕರೆಸಿಕೊಂಡು ನಂತರ ಪಕ್ಷಕ್ಕೆ ರಾಜೀನಾಮೆ ಕೊಡಿ ಎಂದರು. ಹಾಗಾಗಿ ಇದಕ್ಕೆ ಒಪ್ಪದೇ ನಾನು ವಾಪಸ್ ಮಾತೃಪಕ್ಷಕ್ಕೆ ಬಂದಿದ್ದೇನೆ ಅಂತ ಕ್ಷಮೆಯಾಚಿಸಿದ್ದಾರೆ.

ನಗರಸಭೆಯಲ್ಲಿ ಆಪರೇಷನ್ ಕಮಲ ಮಾಡಿದವರು ಬೇರೆ ಯಾರು ಅಲ್ಲ. ಹಿಂದೆ ಕುಮಾರಸ್ವಾಮಿ ಸರ್ಕಾರದಲ್ಲಿ ಬಾಂಬೆಗೆ ಹೋಗಿದ್ದರಲ್ಲ ಅದರಲ್ಲಿದ್ದವರೇ ಕೆಲವರು ಆಪರೇಷನ್ ಕಮಲ ಮಾಡಿದ್ದಾರೆ. ಸಭೆ ಮಾಡೋದಕ್ಕೆ ಸದಸ್ಯರುಗಳ ಅವಶ್ಯಕತೆ ಇದೆ. ಅವರ ಪಕ್ಷದಲ್ಲಿರುವುದು ಆರು ಜನ ಮಾತ್ರ. ಈಗಾಗಲೇ ಅಧ್ಯಕ್ಷ ಸ್ಥಾನದ ಮೀಸಲಾತಿ ವಿಚಾರ ನ್ಯಾಯಾಲಯದ ಮುಂದಿದೆ. ಇದರ ನಡುವೆಯೇ ಇವರು ಈ ರೀತಿಯ ಮಾಡಿರುವುದು ಪಕ್ಷ ವಿರೋಧಿ ಕಾಯ್ದೆಯಡಿ ತಪ್ಪಾಗುತ್ತೆ. ಈ ಬಗ್ಗೆ ನಾನು ಈಗಾಗಲೇ ರಾಜ್ಯಾಧ್ಯಕ್ಷರ ಗಮನಕ್ಕೂ ತಂದಿದ್ದೇನೆ ಎಂದಿದ್ದಾರೆ.