ಹಾಸನ: ಇದು ಎರಡು ಬಂದರುಗಳನ್ನು ಸಂಪರ್ಕಿಸುವ ರಸ್ತೆ. ರಸ್ತೆ ನಿರ್ಮಾಣದ ಕಾಮಗಾರಿ ಪ್ರಾರಂಭವಾಗಿ ದಶಕ ಕಳೆಯುತ್ತಾ ಬರುತ್ತಿದ್ದರು, ಪೂರ್ಣವಾಗುವ ಲಕ್ಷಣಗಳೇ ಕಾಣುತ್ತಿಲ್ಲ. ರಸ್ತೆಯಲ್ಲಿ ಹೊರಟರೆ ಮೈಮೂಳೆ ಮುರಿದುಕೊಂಡು ಆಸ್ಪತ್ರೆಗೆ ಸೇರಬೇಕು ಇಲ್ಲ ಪ್ರಾಣವನ್ನೇ ಬಿಟ್ಟು ಮಸಣ ಸೇರಬೇಕು ಎಂಬಂತಾಗಿದೆ.
ಒಂದೆಡೆ ರಸ್ತೆ ತುಂಬಾ ಬಿದ್ದಿರುವ ಗುಂಡಿಗಳು. ಎಲ್ಲಿ ಗುಂಡಿಗೆ ಬಿದ್ದು ಬಿಡುತ್ತೇವೆಯೋ ಎಂದು ದೊಡ್ಡ ದೊಡ್ಡ ವಾಹನಗಳ ನಡುವೆ ಸಾಗುತ್ತಿರುವ ದ್ವಿಚಕ್ರ ವಾಹನ ಸವಾರರು. ಹದಗೆಟ್ಟ ರಸ್ತೆಯಲ್ಲಿ ಸಾಗಿ ಕೆಟ್ಟು ನಿಂತಿರುವ ವಾಹನಗಳು. ವಾಹನಗಳ ಸಂಚಾರದಿಂದ ಧೂಳಿನ ನಡುವೆಯೂ ಸಂಚರಿಸುತ್ತಿರುವ ಪಾದಚಾರಿಗಳು.. ಇವೆಲ್ಲಾ ದೃಶ್ಯಾವಳಿಗಳು ಕಂಡು ಬಂದದ್ದು ರಾಷ್ಟ್ರೀಯ ಹೆದ್ದಾರಿ 75ರ ಹಾಸನ - ಸಕಲೇಶಪುರ ರಸ್ತೆಯಲ್ಲಿ. ಹೌದು ಇದು ರಾಜ್ಯ ರಸ್ತೆ ಅಲ್ಲ. ಬದಲಿಗೆ ಎರಡು ಬಂದರುಗಳನ್ನು ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ.
5 ವರ್ಷವಾದರೂ ಮುಗಿದಿಲ್ಲ ಕಾಮಗಾರಿ:
ಬೆಂಗಳೂರು ನಡುವಿನ ರಾಷ್ಟ್ರೀಯ ಹೆದ್ದಾರಿ 75ರ ಹಾಸನ - ಸಕಲೇಶಪುರ ರಸ್ತೆಯನ್ನು ಚತುಷ್ಪಥ ರಸ್ತೆಯನ್ನಾಗಿ ಮಾಡಬೇಕು ಎಂದು ಲೋಕೋಪಯೋಗಿ ಸಚಿವ ಹೆಚ್.ಸಿ.ಮಹದೇವಪ್ಪ ಯೋಜನೆ ರೂಪಿಸಿದ್ರು. ಆದರೆ, ರಾಷ್ಟ್ರೀಯ ಹೆದ್ದಾರಿ ಎಂಬ ಹಣೆಪಟ್ಟಿ ಕಟ್ಟಿಕೊಂಡಿರುವ ಈ ಹೆದ್ದಾರಿ 75ರ ಸ್ಥಿತಿ ಕಂಡರೆ ರಸ್ತೆಯೋ, ಹೊಂಡವೋ ಎಂಬ ಅನುಮಾನ ಕಾಡಿದೆ. ಜತೆಗೆ ಸ್ವಲ್ಪ ಎಚ್ಚರ ತಪ್ಪಿದರೂ, ಸಾವಿಗೆ ರಹದಾರಿ ನಿಶ್ಚಿತ.
ಹಾಸನದಿಂದ ಬಿಸಿ ರಸ್ತೆ (ಬಂಟ್ವಾಳ)ವರೆಗೆ ಚತುಷ್ಪಥ ರಸ್ತೆ ಕಾಮಗಾರಿಗೆ ಕೇಂದ್ರ ಸರ್ಕಾರ 600 ಕೋಟಿ ರೂ. ವೆಚ್ಚದ ಕಾಮಗಾರಿಗೆ 2017ರಲ್ಲಿ ಟೆಂಡರ್ ಕರೆದಿತ್ತು. ಬಳಿಕ ಐಸೋಲೆಕ್ಸ್ ಕಂಪನಿಗೆ ಗುತ್ತಿಗೆ ನೀಡಿ 2019ರ ಮಾ.31ಕ್ಕೆ ಕಾಮಗಾರಿ ಪೂರ್ಣಗೊಳಿಸಿ ಹೆದ್ದಾರಿ ಪ್ರಾಧಿಕಾರಕ್ಕೆ ಬಿಟ್ಟು ಕೊಡುವ ಷರತ್ತು ವಿಧಿಸಲಾಗಿತ್ತು.
ಆರ್ಥಿಕ ಸಂಕಷ್ಟದಿಂದ ಬದಲಾದ ಗುತ್ತಿಗೆದಾರ:
ಕಾಮಗಾರಿ ಗುತ್ತಿಗೆ ಪಡೆದ ಕಂಪನಿ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ ಹಿನ್ನೆಲೆ ಅದನ್ನು ಕಪ್ಪು ಪಟ್ಟಿಗೆ ಸೇರಿಸಿ 2019ರಲ್ಲಿ ಗುತ್ತಿಗೆಯನ್ನು ರಾಜ್ಕಮಲ್ ಎಂಬ ಸಂಸ್ಥೆಗೆ ವಹಿಸಿತ್ತು. ಈ ಸಂಸ್ಥೆಯೂ ಕಿ.ಮೀ ಲೆಕ್ಕದ ಬದಲು ಮೀಟರ್ ಲೆಕ್ಕದಲ್ಲಿ ಕಾಮಗಾರಿ ನಿರ್ವಹಿಸುತ್ತಿರುವ ಪರಿಣಾಮ ಶೇ.20ರಷ್ಟು ಕಾಮಗಾರಿಯೂ ಪೂರ್ಣಗೊಂಡಿಲ್ಲ. ಅಷ್ಟೇ ಅಲ್ಲ, ಕಾಮಗಾರಿಗೆ ಒಂದಿಷ್ಟು ಬೃಹತ್ ವಾಹನ ಸಂಚರಿಸಿದ ಪರಿಣಾಮ ಇದ್ದ ಡಾಂಬರು ರಸ್ತೆಯೂ ಗುಂಡಿ ಬಿದ್ದು, ಮಳೆಯಲ್ಲಿ ನೀರು ತುಂಬಿ ಹೊಂಡಗಳಾಗಿ ಪರಿವರ್ತನೆಯಾಗಿವೆ.
ಆಮೆ ಗತಿಯಲ್ಲಿ ಸಾಗುತ್ತಿದೆ ಕಾಮಗಾರಿ. ಹೆಚ್ಚುತ್ತಿದೆ ಯೋಜನಾ ವೆಚ್ಚ:
ಹಾಸನ - ಸಕಲೇಶಪುರ ಮಾರ್ಗದ 45 ಕಿಮೀ ಪ್ರಯಾಣ ಅರ್ಧ ಅಥವಾ ಮುಕ್ಕಾಲು ಗಂಟೆಯಿದೆ. ಸದ್ಯ ಒಂದೂವರೆ ಗಂಟೆ ತೆಗೆದುಕೊಳ್ಳುತ್ತಿದೆ ಎನ್ನುತ್ತಾರೆ ಪ್ರಯಾಣಿಕರು. ರಸ್ತೆ ಅವ್ಯವಸ್ಥೆ ಕಂಡು ಸಾರ್ವಜನಿಕರು ಸರ್ಕಾರ ಹಾಗೂ ಜನಪ್ರತಿನಿಧಿಗಳ ವಿರುದ್ದ ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. 2 ವರ್ಷಗಳಲ್ಲಿ ಪೂರ್ಣಗೊಳ್ಳಬೇಕಿದ್ದ ಕಾಮಗಾರಿ 3 ವರ್ಷ ಕಳೆದರೂ ಮುಗಿಯುತ್ತಿಲ್ಲ. ಇನ್ನೂ ಶೇ.80ರಷ್ಟು ಕಾಮಗಾರಿ ಬಾಕಿ ಇರುವ ಕಾರಣ ಯೋಜನಾ ವೆಚ್ಚವೂ ಹೆಚ್ಚುತ್ತಲೇ ಇದೆ. ಒಂದು ಕಡೆ ಮಳೆಯಿಂದ ಕಾಮಗಾರಿಗೆ ಅಡ್ಡಿ ಉಂಟಾಗಿದೆ ಎನ್ನಲಾಗ್ತಿದೆ.
ಈ ರಸ್ತೆಯಲ್ಲಿ ಆರೋಗ್ಯವಂತ ಜನರು ಓಡಾಡುವುದೇ ಕಷ್ಟ. ಇನ್ನು ರೋಗಿಗಳನ್ನು ಕರೆದೊಯ್ದರೆ ಆಸ್ಪತ್ರೆ ತಲುಪುವುದು ಅನುಮಾನವೇ. ಗರ್ಭಿಣಿಯರಿಗೆ ದಾರಿ ಮಧ್ಯೆ ಹೆರಿಗೆ ಆದರೂ ಆಶ್ಚರ್ಯ ಪಡುವಂತಿಲ್ಲ. ಶೀಘ್ರವೇ ಚತುಷ್ಪಥ ರಸ್ತೆ ಕಾಮಗಾರಿ ಪೂರ್ಣಗೊಳಿಸಿ, ಇಲ್ಲವೇ ರಸ್ತೆ ಗುಂಡಿ ಮಚ್ಚಿ ಎಂಬುದು ಹಾಸನ, ಆಲೂರು, ಸಕಲೇಶಪುರ ತಾಲೂಕಿನ ಹೋರಾಟಗಾರರ ಆಗ್ರಹವಾಗಿದೆ.
