ಅರಕಲಗೂಡು: ಅಸಂಘಟಿತ ಕಾರ್ಮಿಕರು ಹಾಗೂ ಕಟ್ಟಡ ಕಾರ್ಮಿಕರಿಗೆ ಸರ್ಕಾರದಿಂದ ನೀಡಿದ್ದ ಆಹಾರದ ಕಿಟ್ ವಿತರಣೆ ವೇಳೆ ನೂಕುನುಗ್ಗಲು ಉಂಟಾಗಿದ್ದರಿಂದ ಆಹಾರದ ಕಿಟ್ಗಳನ್ನು ವಿತರಿಸಲು ಅಧಿಕಾರಿಗಳು ಹರಸಾಹಸಪಟ್ಟ ಘಟನೆ ನಡೆಯಿತು.
ಪಟ್ಟಣದ ಶಿಕ್ಷಕರ ಭವನದಲ್ಲಿ ಶುಕ್ರವಾರ ಕಾರ್ಮಿಕ ಇಲಾಖೆ ಆಯೋಜಿಸಿದ್ದ ಆಹಾರದ ಕಿಟ್ ವಿತರಣೆ ಕಾರ್ಯಕ್ರಮದಲ್ಲಿ ತಾಲೂಕಿನ ಮೂರು ಸಾವಿರ ಕಟ್ಟಡ ಕಾರ್ಮಿಕರು ಹಾಗೂ ಎರಡು ಸಾವಿರ ಅಸಂಘಟಿತ ಕಾರ್ಮಿಕರಿಗೆ ಆಹಾರದ ಕಿಟ್ ವಿತರಣೆ ಮಾಡುವ ಸಲುವಾಗಿ ಮೊದಲೇ ಕೂಪನ್ಗಳನ್ನು ನೀಡಲಾಗಿತ್ತು.
ಕಾರ್ಯಕ್ರಮದಲ್ಲಿ ಸಾಂಕೇತಿಕವಾಗಿ ಕೇವಲ 8 ಜನರಿಗೆ ವಿತರಣೆ ಮಾಡಿ ಉಳಿದವರಿಗೆ ಅಧಿಕಾರಿಗಳು ಶಿಕ್ಷಕರ ಭವನದ ಹೊರಗೆ ವಿತರಿಸಲು ಸಿದ್ಧತೆ ಮಾಡಿಕೊಂಡಿದ್ದರು. ಆದರೆ, ವೇದಿಕೆಯಲ್ಲಿ ವಿತರಣೆಗೆ ಶಾಸಕ ಎ.ಟಿ.ರಾಮಸ್ವಾಮಿ ಅವರು ಕಿಟ್ ವಿತರಿಸಲು ಆರಂಭಿಸುತ್ತಿದ್ದಂತೆಯೇ ವೇದಿಕೆಯ ಮುಂದಿದ್ದವರು ವೇದಿಕೆಯನ್ನೇರಿದರು. ಇದನ್ನು ಕಂಡ ಇತರರೂ ವೇದಿಕೆಯತ್ತ ನುಗ್ಗಿದಾಗ ನೂಕು ನುಗ್ಗಲು ಉಂಟಾಯಿತು.
ಈ ವೇಳೆ, ಶಾಸಕರು ಎಲ್ಲರಿಗೂ ಕಿಟ್ಗಳನ್ನು ವಿತರಿಸಲಾಗುವುದು. ಒಬ್ಬೊಬ್ಬರೇ ಪಡೆಯಿರಿ ಎಂದು ಹೇಳಿದರೂ ಅದನ್ನು ಕೇಳಿಸಿಕೊಳ್ಳುವ ತಾಳ್ಮೆ ಯಾರಲ್ಲೂ ಇರಲಿಲ್ಲ. ಫಲಾನುಭವಿಗಳನ್ನು ನಿಯಂತ್ರಿಸಿ, ಕಿಟ್ ವಿತರಣೆ ಮಾಡುವಷ್ಟರಲ್ಲಿ ಅಧಿಕಾರಿಗಳು ಹೈರಾಣಾಗಿದ್ದರು.
ಜಾಗೃತಿ ಮರೆತ ಜನ:
ಆಹಾರದ ಕಿಟ್ ವಿತರಣೆ ಕಾರ್ಯಕ್ರಮದಲ್ಲಿ ಕೊರೋನಾದ ಯಾವ ಜಾಗೃತಿಯೂ ಇರಲಿಲ್ಲ. ನೂರಾರು ಜನ ಕಿಕ್ಕಿರಿದು ತುಂಬಿದ್ದ ಶಿಕ್ಷಕರ ಭವನದಲ್ಲಿ ಜನರು ಒಬ್ಬರ ಮೇಲೊಬ್ಬರು ಎಂಬಂತೆ ತುಂಬಿಕೊಂಡಿದ್ದರು. ಮಾಸ್ಕ್ ಧರಿಸದೇ, ಸಾಮಾಜಿಕ ಅಂತರ ಕಾಯ್ದುಕೊಳ್ಳದ ಜನರ ಜೊತೆಗೆ ಇಲ್ಲಿನ ಅಧಿಕಾರಿಗಳೂ ಯಾವುದೇ ಮುಂಜಾಗೃತಾ ಕ್ರಮಗಳನ್ನು ಕೈಗೊಂಡಿರಲಿಲ್ಲ ಎಂಬುದು ಗೋಚರವಾಗುತ್ತಿತ್ತು.
