ಗದಗ: ಇಂಧನ ಬೆಲೆ ಗಗನಕ್ಕೇರುತ್ತಿರುವ ನಡುವೆ ವಾಹನ ಸವಾರರ ಪಾಡು ಹೇಳತಿರದ್ದಾಗಿದೆ. ಆದರೆ ಈ ಇಂಧನ ಬೆಲೆ ಏರಿಕೆಗೆ ಕಡಿವಾಣಕ್ಕೆ ಗದಗದಲ್ಲಿ ಬೇವಿನ ಬೀಜದಿಂದ ಡೀಸೆಲ್ ತಯಾರಿಸಿ ಯಶಸ್ವಿಯಾಗಿದ್ದಾರೆ.
ಗದಗ ನಗರದ ನಾಗಾವಿ ಗುಡ್ಡದಲ್ಲಿರೋ ಗ್ರಾಮೀಣ ಅಭಿವೃದ್ಧಿ ಮತ್ತು ಪಂಚಾಯತ್ರಾಜ್ ವಿವಿಯಿಂದ ಹೊಸ ಪ್ರಯತ್ನವೊಂದು ಆರಂಭವಾಗಿದೆ. ಅಂತಾರಾಷ್ಟ್ರೀಯ ಜೈವಿಕ ಇಂಧನ ದಿನಾಚರಣೆ ಅಂಗವಾಗಿ ವಿವಿಯಲ್ಲಿ ಈ ಘಟಕ ಆರಂಭಿಸಲಾಗಿದೆ. ಕರ್ನಾಟಕ ರಾಜ್ಯ ಜೈವಿಕ ಇಂಧನ ಮಂಡಳಿಯ ಸಹಯೋಗದಲ್ಲಿ ಆರಂಭವಾದ ಈ ಘಟಕ ಮುಂದಿನ ದಿನಗಳಲ್ಲಿ ಆಮದು ಮೇಲಿನ ಒತ್ತಡ ಕಡಿಮೆ ಮಾಡಿ ಸ್ವಾವಲಂಬಿಯಾಗಿ ಇಂಧನ ಕೊರತೆ ನೀಗಿಸುವ ಪ್ರಯತ್ನ ಮಾಡಲಾಗ್ತಿದೆ.
1 ಲೀಟರ್ ಡೀಸೆಲ್ ತಯಾರಿಕೆಗೆ 4 ಕೆ.ಜಿ ಬೇವಿನ ಬೀಜ ಬಳಕೆ
ಮುಖ್ಯವಾಗಿ ನೈಸರ್ಗಿಕವಾಗಿ ಸಿಗುವ ಬೇವಿನ ಬೀಜದ ಜೊತೆ ಹೊಂಗೆ ಬೀಜ, ಹಿಪ್ಪೆ, ಸೀಮರೂಬ ಮತ್ತು ಜಟ್ರೋಪ (ಕಳ್ಳಿ) ಬೀಜಗಳಿಂದ ಬಯೋ ಡೀಸೆಲ್ ತಯಾರಿಸಲಾಗ್ತಿದೆ. ಒಂದು ಲೀಟರ್ ಡೀಸೆಲ್ ಉತ್ಪಾದನೆಗೆ 4 ಕೆ.ಜಿ ಬೀಜ ಬೇಕಾಗುತ್ತದೆ. ಈ ಬೀಜಗಳನ್ನು ಮಷಿನ್ಗಳಲ್ಲಿ ರುಬ್ಬಿ ಅದರಿಂದ ಬರುವ ರಸವನ್ನು ಸಂಸ್ಕರಣೆ ಮಾಡಿ ಇಂಧನವಾಗಿ ಪರಿವರ್ತನೆ ಮಾಡಲಾಗ್ತಿದೆ. ಇಲ್ಲಿ ಡೀಸೆಲ್ ಜೊತೆಗೆ ಉಳಿದ ವೇಸ್ಟೇಜ್ ಅನ್ನು ಜೈವಿಕ ಗೊಬ್ಬರವಾಗಿ, ವೇಸ್ಟೇಜ್ ನೀರನ್ನು ಪಿನಾಯಿಲ್ ಆಗಿ ಮತ್ತು ಸಾಬೂನು ತಯಾರಿಕೆಯಲ್ಲಿ ಬಳಕೆ ಮಾಡಲಾಗ್ತಿದೆ.
1 ಲೀಟರ್ ಡೀಸೆಲ್ ಉತ್ಪಾದನೆಗೆ 120 ರೂ. ಖರ್ಚು
ಬೀಜ ಸಂಸ್ಕರಿಸಿ ಅಗತ್ಯಕ್ಕೆ ತಕ್ಕಂತೆ ಕೆಲ ಮಿಥೆನಾಲ್ ಸೇರಿದಂತೆ ರಾಸಾಯನಿಕ ವಸ್ತುಗಳನ್ನು ಮಿಶ್ರಣ ಮಾಡುತ್ತಾರೆ. ಈ ವೇಳೆ ಬಯೋ ಡೀಸೆಲ್ ಮತ್ತು ಗ್ಲಿಸರಿನ್ ದ್ರಾವಣ ಬೇರ್ಪಡಿಸುತ್ತಾರೆ. ಇದರಿಂದ ಬೇರ್ಪಡಿಸಿದ ಡೀಸೆಲ್ ಅನ್ನು ವಾಟರ್ ವಾಶ್ ಮಾಡಲಾಗುತ್ತದೆ. ಕೊನೆಯದಾಗಿ ಶುದ್ಧ ಜೈವಿಕ ಇಂಧನ ಲಭಿಸುತ್ತದೆ.
ಒಂದು ಲೀಟರ್ ಡೀಸೆಲ್ ಉತ್ಪಾದಿಸಲು ಅಂದಾಜು 120 ರೂ. ಖರ್ಚಾಗುತ್ತದೆ. ಆದರೆ ಈ ಖರ್ಚು ಉತ್ಪಾದನೆಯಲ್ಲಿ ಬಂದ ವೇಸ್ಟೇಜ್ಗಳಿಂದಲೇ ಲಾಭ ಪಡೆಯಬಹುದು. ಹಿಂಡಿ ಗೊಬ್ಬರ, ಪಿನಾಯಿಲ್, ಸಾಬೂನುಗಳಿಗೆ ಉಪಯೋಗಿಸಲಾಗುತ್ತದೆ. ಕೊನೆಯದಾಗಿ ಶೂನ್ಯ ಬೆಲೆಯಲ್ಲಿ ಡೀಸೆಲ್ ಉತ್ಪಾದನೆ ಮಾಡಿದಂತಾಗುತ್ತದೆ.
ಈ ಡೀಸೆಲ್ ತಯಾರಿಕೆ ಇನ್ನೂ ಆರಂಭಿಕ ಹಂತದಲ್ಲಿದ್ದು ಪ್ರಾಯೋಗಿಕವಾಗಿ ಕಡಿಮೆ ಪ್ರಮಾಣದಲ್ಲಿ ಉತ್ಪಾದನೆ ಮಾಡಲಾಗುತ್ತಿದೆ. ಜೊತೆಗೆ ಇದರ ಮೂಲ ಉದ್ದೇಶ ಗ್ರಾಮೀಣ ಭಾಗದಲ್ಲಿ ಉದ್ಯೋಗ ಸೃಷ್ಟಿಸಲು ಮತ್ತು ರೈತರಿಗೆ ಆದಾಯ ತಂದು ಕೊಡುವ ನಿಟ್ಟಿನಲ್ಲಿ ಈ ಘಟಕ ಸ್ಥಾಪಿಸಲಾಗಿದೆ. ಸದ್ಯ ಇದು 50 ಲೀಟರ್ನಷ್ಟು ಉತ್ಪಾದನಾ ಸಾಮರ್ಥ್ಯದ ಘಟಕವಾಗಿದ್ದು, ಮುಂದಿನ ದಿನದಲ್ಲಿ ಅಗತ್ಯಕ್ಕೆ ತಕ್ಕಂತೆ ಹೆಚ್ಚು ಉತ್ಪಾದನೆಗೆ ಅನುಕೂಲಕರ ವಾತಾವರಣ ನಿರ್ಮಾಣ ಮಾಡುವ ನಿಟ್ಟಿನಲ್ಲಿ ಪ್ರಯತ್ನ ಮಾಡಲಾಗ್ತಿದೆ.
