ಹುಬ್ಬಳ್ಳಿ : ವಾಣಿಜ್ಯ ನಗರಿ, ಛೋಟಾ ಮುಂಬೈ, ಗಂಡು ಮೆಟ್ಟಿದ ನಾಡು ಅಂತೆಲ್ಲಾ ಕರೆಸಿಕೊಳ್ಳುವ ನಗರ ಇದೀಗ 'ಡಸ್ಟ್ ಸಿಟಿ' ಎಂದು ಕರೆಸಿಕೊಳ್ಳುವುದಕ್ಕೆ ಸಿದ್ಧವಾಗಿದೆ. ಹಲವು ವರ್ಷಗಳಿಂದ ನೆನಗುದಿಗೆ ಬಿದ್ದ ಕಾಮಗಾರಿಗಳು, ರಸ್ತೆ ಅಗಲೀಕರಣದಿಂದ ಇಂದು ಸ್ಮಾರ್ಟ್ ಸಿಟಿಗೆ ಡಸ್ಟ್ ಸಿಟಿ ಅನ್ನೋ ಕುಖ್ಯಾತಿ ಬಂದೊದಗಿದೆ. ರಾಜ್ಯದಲ್ಲಿ ಅತೀ ವೇಗವಾಗಿ ಬೆಳೆಯುತ್ತಿರುವ ಹುಬ್ಬಳ್ಳಿ ಇದೀಗ ಅತಿ ಹೆಚ್ಚು ವಾಯುಮಾಲಿನ್ಯ ಹೊಂದಿದ ರಾಜ್ಯದ ಮೊದಲ ನಗರ ಅನ್ನೋ ಹಣೆಪಟ್ಟಿ ಹೊತ್ತಿದೆ.
ಹುಬ್ಬಳ್ಳಿ ಇದೀಗ ಸ್ವಿಜರ್ಲೆಂಡ್ ಮೂಲದ ಐಕ್ಯೂ ಏರ್ ನಡೆಸಿರುವ ಸಮೀಕ್ಷೆಯಲ್ಲಿ 29.7 ಸರಾಸರಿಯಲ್ಲಿ ಕಲುಷಿತ ವಾತಾವರಣ ದೃಢವಾಗಿದೆ. ಈ ಮೂಲಕ ರಾಜ್ಯದ ನಂಬರ್ ಒನ್ ಸ್ಥಾನಕ್ಕೆ ಹುಬ್ಬಳ್ಳಿನಗರ ಸೇರಿದೆ. ಐಕ್ಯೂ ಏರ್ ನಡೆಸಿರುವ ಸಮೀಕ್ಷೆಯಲ್ಲಿ ಬಹಿರಂಗವಾದ ಅಂಕಿ ಅಂಶಗಳಲ್ಲಿ..
- ಹುಬ್ಬಳ್ಳಿ-29.7
- ಯಾದಗಿರಿ-29.2
- ಬೆಂಗಳೂರು- 29
- ಬೆಳಗಾವಿ-28.1
- ಚಿಕ್ಕಬಳ್ಳಾಪುರ- 26.1
ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ, ವಾಹನ ದಟ್ಟನೆಗಳಿಂದಲೇ ಕೂಡಿರುವ ಮತ್ತು ಹೆಚ್ಚು ಕಾರ್ಖಾನೆ ಹೊಂದಿರುವ ರಾಜಧಾನಿ ಬೆಂಗಳೂರು 3ನೇ ಸ್ಥಾನದಲ್ಲಿದ್ದು, ಹುಬ್ಬಳ್ಳಿ ಮಾತ್ರ ವಾಹನ ದಟ್ಟಣೆ ಹೊರತುಪಡಿಸಿ ಯಾವುದೇ ಕೈಗಾರಿಕಾ ಬೃಹತ್ ಕಾರ್ಖಾನೆಗಳಿಲ್ಲದಿದ್ದರೂ, ಸಹ ಮೊದಲ ಸ್ಥಾನಕ್ಕೇೆರಿದೆ.
ನಿರಂತರವಾಗಿ ಸ್ಮಾರ್ಟ್ ಸಿಟಿ ಕಾಮಗಾರಿ ಸೇರಿದಂತೆ, ರಸ್ತೆ ಅಗಲೀಕರಣ, ಅರ್ಧಕ್ಕೆ ನಿಂತಿರುವ ಹಲವು ಕಾಮಗಾರಿ ಕೆಲಸವೇ ಈ ರೀತಿಯ ಹೊಸ ಬಿರುದು ಬರುವುದಕ್ಕೆ ಕಾರಣವಾಗಿದೆ ಅನ್ನೋದು ಸ್ಥಳೀಯರ ಆರೋಪವಾಗಿದೆ. ಸಿಟಿಯನ್ನ ಮತ್ತಷ್ಟು ಉತ್ತುಂಗಕ್ಕೆ ತೆಗೆದುಕೊಂಡು ಹೋಗ್ತೀವಿ, ನಗರವನ್ನ ಸ್ಮಾರ್ಟ್ ಸಿಟಿ ಮಾಡ್ತೀವಿ ಅಂತಾ ಹೇಳುತ್ತಿದ್ದ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳು ಎಚ್ಚೆತ್ತುಕೊಳ್ಳಬೇಕಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ಜಿಲ್ಲಾಧಿಕಾರಿ ನಿತೇಶ್ ಪಾಟೀಲ್, ಅಭಿವೃದ್ದಿ ಕಾರ್ಯಗಳನ್ನು ನಡೆಸುವಾಗ ಇಂತಹ ಸಮಸ್ಯೆಗಳು ಎದುರಾಗುವುದು ಸಹಜ. ಮುಂದಿನ ದಿನಗಳಲ್ಲಿ ಕಾಮಗಾರಿ ವೇಗವಾಗಿ ಪೂರ್ಣಗೊಳಿಸಲು ಸೂಚಿಸಲಾಗುವುದು ಎಂದಿದ್ದಾರೆ. ಸದ್ಯ ಸಾಕಷ್ಟು ಕಾಮಗಾರಿಗಳ ವಿಳಂಬವೇ ಡಸ್ಟ್ ಸಿಟಿಗೆ ಕಾರಣ ಎಂಬ ಆಘಾತಕಾರಿ ಮಾಹಿತಿ ಲಭ್ಯವಾಗಿದೆ.
ಸಂಬಂಧ ಪಟ್ಟವರು ಈ ಬಗ್ಗೆ ಎಚ್ಚೆತ್ತುಕೊಳ್ಳಬೇಕಿದೆ. ಸ್ಮಾರ್ಟ್ ಸಿಟಿ ಮಾಡುವ ಜನಪ್ರತಿನಿಧಿಗಳ ಡಸ್ಟ್ ಸಿಟಿಯನ್ನು ಕ್ಲಿನ್ ಸಿಟಿ ಮಾಡಬೇಕು ಎಂಬುದು ಸಾರ್ವಜನಿಕರ ಒತ್ತಾಯವಾಗಿದೆ.
ಇದನ್ನೂ ಓದಿ: ಒಬ್ಬ ವಿದ್ಯಾರ್ಥಿಯ ಪರೀಕ್ಷೆಗಾಗಿ 10ಕ್ಕೂ ಹೆಚ್ಚು ಸಿಬ್ಬಂದಿ ಕಾದು ಕುಳಿತಿದ್ದು ಕೊನೆಗೂ ವ್ಯರ್ಥ!
