ಬೆಂಗಳೂರು/ಧಾರವಾಡ : ಶೇ.5ಕ್ಕಿಂತ ಕಡಿಮೆ ಪಾಸಿಟಿವಿಟಿ ದರ ಇರುವ ಧಾರವಾಡ ಜಿಲ್ಲೆಗೂ ಅನ್‌ಲಾಕ್-2 ಮಾರ್ಗಸೂಚಿ ಅನ್ವಯಗೊಳಿಸಿ ಸರ್ಕಾರ ಆದೇಶ ಹೊರಡಿಸಿದೆ. ನಿನ್ನೆ ಹೊರಡಿಸಿದ ಅನ್‌ಲಾಕ್-2 ಪರಿಷ್ಕೃತ ಆದೇಶದಲ್ಲಿ ಧಾರವಾಡ ಜಿಲ್ಲೆಯನ್ನು ಕೈಬಿಡಲಾಗಿತ್ತು. ಧಾರವಾಡ ಜಿಲ್ಲೆಯನ್ನು ಶೇ.5ರಷ್ಟು ಪಾಸಿಟಿವಿಟಿ ಮೇಲ್ಪಟ್ಟ ಜಿಲ್ಲೆಯನ್ನಾಗಿ (ಕೆಟಗರಿ-2 ಜಿಲ್ಲೆ) ಪರಿಗಣಿಸಲಾಗಿತ್ತು. ಆದರೆ, ಧಾರವಾಡ ಜಿಲ್ಲೆಯಲ್ಲಿ ಕೊರೊನಾ ಪಾಸಿಟಿವಿಟಿ ಪ್ರಮಾಣ ಸತತ 10 ದಿನಗಳಿಂದ ಶೇ.5ಕ್ಕಿಂತ ಕಡಿಮೆ ದಾಖಲಾಗುತ್ತಿದೆ.
ಹೀಗಿದ್ದರೂ ಗೊಂದಲದ ಹಿನ್ನೆಲೆ ಪಾಸಿಟಿವಿಟಿ ಪ್ರಮಾಣ ಶೇ.5ರಷ್ಟು ಮೇಲ್ಪಟ್ಟ ಜಿಲ್ಲೆಗಳ ಕೆಟಗರಿ-2 ಪಟ್ಟಿಯಲ್ಲಿ ಸೇರ್ಪಡೆಗೊಳಿಸಲಾಗಿತ್ತು. ಈ ಹಿನ್ನೆಲೆ ಧಾರವಾಡ ಜಿಲ್ಲೆಗೆ ಅನ್‌ಲಾಕ್-2 ಸಡಿಲಿಕೆಯಿಂದ ವಂಚಿತವಾಗಿತ್ತು. ಜಿಲ್ಲಾಡಳಿತದಿಂದ ಧಾರವಾಡ ಜಿಲ್ಲೆಯ ಸರಾಸರಿ ಪಡೆದು ಪರಿಶೀಲಿಸಿದಾಗ 4.5% ಕ್ಕಿಂತ ಕಡಿಮೆ ಇರುವುದು ಖಚಿತವಾಗಿದೆ.
ಈ ಹಿನ್ನೆಲೆ ಸಚಿವ ಜಗದೀಶ್ ಶೆಟ್ಟರ್ ಇಂದು ಬೆಳಗ್ಗೆ ಸಿಎಂ ಯಡಿಯೂರಪ್ಪ ಹಾಗೂ ಆರೋಗ್ಯ ಸಚಿವ ಡಾ.ಕೆ.ಸುಧಾಕರ್ ಅವರಿಗೆ ಮಾಹಿತಿ ನೀಡಿದರು. ಧಾರವಾಡ ಜಿಲ್ಲೆಯನ್ನೂ ಸಹ ಅನ್‌ಲಾಕ್ ಮಾಡುವಂತೆ ಕೋರಿದ್ದರು.
ಇದೀಗ ಸರ್ಕಾರ ಶೇ.5ಕ್ಕಿಂತ ಪಾಸಿಟಿವಿಟಿ ಪ್ರಮಾಣ ಕಡಿಮೆ ಇರುವ ಧಾರವಾಡ ಜಿಲ್ಲೆಯನ್ನೂ ಕೆಟಗರಿ-1 ಜಿಲ್ಲೆಗಳ ಪಟ್ಟಿಗೆ ಸೇರ್ಪಡೆಗೊಳಿಸಿ ಆದೇಶ ಹೊರಡಿಸಿದೆ. ಆ ಮೂಲಕ ನಾಳೆಯಿಂದ ಧಾರವಾಡ ಜಿಲ್ಲೆಗೂ ಅನ್‌ಲಾಕ್-2 ಮಾರ್ಗಸೂಚಿಯನ್ವಯ ಇನ್ನಷ್ಟು ಸಡಿಲಿಕೆ ಅನ್ವಯವಾಗಲಿದೆ.
ಇದನ್ನೂ ಓದಿ:ಸಚಿನ್ ತೆಂಡೂಲ್ಕರ್ಗೆ 21ನೇ ಶತಮಾನದ ಶ್ರೇಷ್ಠ ಟೆಸ್ಟ್ ಬ್ಯಾಟ್ಸ್ಮನ್ ಗೌರವ
