ಧಾರವಾಡ: ಮಣಿಪುರ ಸಂಘರ್ಷವನ್ನು ಮುಂದಿಟ್ಟುಕೊಂಡು ಯಾರೋ ಕಿಡಿಗೇಡಿಗಳು ತಮ್ಮ ಇಮೇಲ್ ಹ್ಯಾಕ್ ಮಾಡಿ ಪರಿಚಯಸ್ಥರಿಗೆ ಹಣದ ಬೇಡಿಕೆ ಇಡುತ್ತಿರುವುದಾಗಿ ನಟ ಹಾಗೂ ಪರಿಸರವಾದಿ ಸುರೇಶ್ ಹೆಬ್ಳೀಕರ್ ದೂರಿದ್ದಾರೆ. ಜೊತೆಗೆ ಈ ರೀತಿಯ ಇಮೇಲ್ ನನ್ನ ಹೆಸರಿನಲ್ಲಿ ನಿಮಗೂ ಬಂದಲ್ಲಿ, ದಯವಿಟ್ಟು ಯಾರೂ ಹಣ ಕಳುಹಿಸಬೇಡಿ ಎಂದು ಮನವಿ ಮಾಡಿದ್ದಾರೆ. 'ಇಕೋ ವಾಚ್' ಎಂಬ ಕಂಪನಿಯನ್ನು ಹೆಬ್ಳೀಕರ್ ನಡೆಸುತ್ತಿದ್ದು, ವಿದೇಶದಲ್ಲಿರುವ ತಮ್ಮ ಅನೇಕ ಸ್ನೇಹಿತರಿಗೆ ಇಮೇಲ್ ರವಾನಿಸಿ ಹಣಕ್ಕೆ ಬೇಡಿಕೆ ಇಡಲಾಗುತ್ತಿದೆ ಎಂದು ಆರೋಪಿಸಿದ್ದಾರೆ.
ಈ ಬಗ್ಗೆ ಮಾಧ್ಯಮದೊಂದಿಗೆ ಮಾತನಾಡಿದ ಅವರು, "ನನ್ನ ಸ್ನೇಹಿತರೊಬ್ಬರು ಮೆಸೇಜ್ ಮಾಡಿ ನೀನು ಹಣ ಬೇಕೆಂದು ಇಮೇಲ್ ಮಾಡಿದ್ದೀಯಾ ಅಂತ ಕೇಳಿದ್ರು. ನಾನು ಇಲ್ಲ ಅಂತ ಹೇಳಿದೆ. ಒಂದು ಇಮೇಲ್ನಲ್ಲಿ ನಿನ್ನ ಜೊತೆ ಏನೋ ಮಾತನಾಡಬೇಕು ಅಂತಿತ್ತು. ಇನ್ನೊಂದು ಇಮೇಲ್ನಲ್ಲಿ, ಮಣಿಪುರದ ಸಂಘರ್ಷ ವಿಚಾರವಾಗಿ ಸರ್ಕಾರ ಯಾವುದೇ ರೀತಿಯಾಗಿ ಸ್ಪಂದಿಸುತ್ತಿಲ್ಲ. ಹಾಗಾಗಿ ಅಲ್ಲಿನ ಜನರಿಗೆ ಪರಿಹಾರವನ್ನು ನೀಡಬೇಕೆಂದಿರುವೆ. ಅದಕ್ಕೆ ನಿಮ್ಮಿಂದ ಸಾಧ್ಯವಾದಷ್ಟು ಹಣ ಕೊಡಿ ಎಂದೆಲ್ಲಾ ಹ್ಯಾಕರ್ಸ್ ಕಥೆ ಕಟ್ಟಿ ನನ್ನ ಹೆಸರಿನಲ್ಲಿ ಸಂದೇಶ ರವಾನಿಸಿದ್ದರು" ಎಂದ ಹೆಬ್ಳೀಕರ್ ಈ ರೀತಿಯಾಗಿ ನನ್ನ ಸ್ನೇಹಿತರಿಗೆ, ಸಂಬಂಧಿಕರಿಗೆ ನನ್ನ ಹೆಸರಿನಲ್ಲಿ ಇಮೇಲ್ ರವಾನೆಯಾಗಿದೆ ಎಂದು ತಿಳಿಸಿದರು.
ಇದನ್ನೂ ಓದಿ: ನಕಲಿ ಖಾತೆ ತೆರೆದು ಅಕ್ರಮ ಹಣ ವ್ಯವಹಾರ ನಡೆಸಿದ ಹ್ಯಾಕರ್: ರಿಯಾದ್ನಲ್ಲಿ ಕಡಬದ ಯುವಕ ಜೈಲುಪಾಲು
"ನಿಮಗೆ ಏನಾದರೂ ಈ ರೀತಿಯಾಗಿ ನನ್ನ ಹೆಸರಿನಿಂದ ಅಥವಾ ಇಕೋ ವಾಚ್ ಹೆಸರಿನಿಂದ ಇಮೇಲ್ ಬಂದಲ್ಲಿ, ಅದಕ್ಕೆ ದಯವಿಟ್ಟು ಪ್ರತಿಕ್ರಿಯೆ ನೀಡಬೇಡಿ. ಅದು ಫೇಕ್. ನಾನು ಯಾರಲ್ಲೂ ಅನುದಾನ ಕೇಳಿಲ್ಲ. ಆ ರೀತಿಯ ಕೆಲಸನೂ ಮಾಡಲ್ಲ. ಮಣಿಪುರಕ್ಕೆ ಹೋಗಿ ಹಣ ಕೊಡೋದು ಅದೆಲ್ಲಾ ನನ್ನ ಕೈಯಿಂದ ಮಾಡುವುದಕ್ಕೆ ಸಾಧ್ಯವಿಲ್ಲ. ಆದ್ದರಿಂದ ಈ ರೀತಿಯ ಇಮೇಲ್ ಏನಾದರೂ ನಿಮಗೆ ಬಂದಲ್ಲಿ ಅದಕ್ಕೆ ರೆಸ್ಪಾಂಡ್ ಮಾಡಬೇಡಿ. ನಾನು ಈ ಬಗ್ಗೆ ದೂರು ದಾಖಲಿಸುತ್ತೇನೆ. ಯಾರೂ ಹಣ ಹಾಕಲು ಹೋಗಬೇಡಿ" ಎಂದು ಮನವಿ ಮಾಡಿದರು.
ಈ ಹಿಂದೆ ಬಾಲಿವುಡ್ ನಟ ಗೋವಿಂದ್ ಅವರ ಎಕ್ಸ್ (ಹಿಂದಿನ ಟ್ವಿಟರ್) ಹ್ಯಾಕ್ ಮಾಡಿ, ಅದರಲ್ಲಿ ಹರಿಯಾಣ ಹಿಂಸಾಚಾರ ಪ್ರಕರಣದ ಬಗ್ಗೆ ಅಸಮಧಾನ ವ್ಯಕ್ತಪಡಿಸಲಾಗಿತ್ತು. ಶಾಂತಿ ಮತ್ತು ಏಕತೆಯನ್ನು ಪ್ರತಿಪಾದಿಸಿದ್ದರು. ಇದು ಮಿಶ್ರ ಪ್ರತಿಕ್ರಿಯೆ ಸ್ವೀಕರಿಸಿದ ಬೆನ್ನಲ್ಲೇ ಟ್ವಿಟರ್ ಖಾತೆಯನ್ನು ನಿಷ್ಕ್ರಿಯಗೊಳಿಸಲಾಗಿತ್ತು. ಈ ಟ್ವೀಟ್ ಗೋವಿಂದ ಹೆಸರಲ್ಲಿ ಬಂದಿತ್ತು. ಆದರೆ ಇದಕ್ಕೆ ಸ್ಪಷ್ಟನೆ ನೀಡಿದ್ದ ನಟ, ''ನಾನು ಆ ಟ್ವೀಟ್ ಮಾಡಿಲ್ಲ, ನನ್ನ ತಂಡದವರೂ ಕೂಡ ಮಾಡಿಲ್ಲ. ಎಕ್ಸ್ ಅಕೌಂಟ್ ಬಳಸದೇ ಬಹಳ ಸಮಯವಾಗಿದೆ. ನನ್ನ ಎಕ್ಸ್ ಅಕೌಂಟ್ ಹ್ಯಾಕ್ ಆಗಿದೆ. ಯಾರೂ ಕೂಡ ನನ್ನನ್ನು ಗುರಿಯಾಗಿಸಬೇಡಿ. ನಾನು ಈ ಪ್ರಕರಣದ ಬಗ್ಗೆ ಸಮಗ್ರ ತನಿಖೆ ನಡೆಸಲು ಸೈಬರ್ ಕ್ರೈಮ್ ಇಲಾಖೆಗೆ ಕೋರುತ್ತೇನೆ'' ಎಂದು ತಿಳಿಸಿದ್ದರು.
ಇದನ್ನೂ ಓದಿ: ಇ-ಪ್ರೊಕ್ಯೂರ್‌ಮೆಂಟ್ ವೆಬ್‌ಸೈಟ್ ಹ್ಯಾಕ್ ಪ್ರಕರಣ: ಪಂಜಾಬ್ ಮೂಲದ ಆರೋಪಿ ಬೆಂಗಳೂರಿನಲ್ಲಿ ಸೆರೆ
