ನ್ಯಾಮತಿ ಪೋಲಿಸರ ದಾಳಿ: ಪರವಾನಗಿ ಇಲ್ಲದ ಎರಡು ಬಂದೂಕುಗಳು ವಶ, ಆರೋಪಿ ಬಂಧನ

ನ್ಯಾಮತಿ ಪೊಲೀಸರು ಕಾರ್ಯಾಚರಣೆ ನಡೆಸಿ ಅನಧಿಕೃತವಾಗಿ ಬಂದೂಕುಗಳನ್ನು ಇಟ್ಟುಕೊಂಡಿದ್ದ ಆರೋಪಿಯನ್ನು ಬಂಧಿಸಿದ್ದಾರೆ. ಆತನಿಂದ ಎರಡು ನಾಡ ಬಂದೂಕುಗಳನ್ನು ವಶಕ್ಕೆ ಪಡೆದಿದ್ದಾರೆ.

ದಾವಣಗೆರೆ: ಅನಧಿಕೃತವಾಗಿ ಪರವಾನಗಿ ಇಲ್ಲದೇ ಮನೆಯಲ್ಲಿ ಎರಡು ಬಂದೂಕುಗಳನ್ನು ಇಟ್ಟುಕೊಂಡಿದ್ದ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ.

ಈ ಕುರಿತು ಮಾಹಿತಿ ನೀಡಿರುವ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಹನುಮಂತರಾಯ ಅವರು, ಜಿಲ್ಲೆಯ ನ್ಯಾಮತಿ ತಾಲೂಕಿನ ಚಿನ್ನಕಟ್ಟೆ ಗ್ರಾಮದ ವೀರಸ್ವಾಮಿ ಬಂಧಿತ ಆರೋಪಿ ಎಂದು ಹೇಳಿದ್ದಾರೆ. ಈತ ಅನಾಧಿಕೃತವಾಗಿ ಎರಡು ನಾಡಬಂದೂಕುಗಳನ್ನು ಇಟ್ಟುಕೊಂಡಿದ್ದ. ಈ ಕುರಿತು ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿ ಆರೋಪಿಯನ್ನು ಬಂಧಿಸಿಸಲಾಗಿದೆ. ಇನ್ನು ದಾಳಿ ವೇಳೆ ಕೋವಿಗಳಿಗೆ ಬಳಸುತ್ತಿದ್ದ ಗನ್ ಪೌಡರ್, ಬಾಲ್ಸ್​ಗಳು, ಮೊಳೆಗಳು ದೊರೆತಿದ್ದು, ಎಲ್ಲಾ ವಸ್ತುಗಳನ್ನು ವಶಕ್ಕೆ ಪಡೆಯಲಾಗಿದೆ ಎಂದು ವಿವರಣೆ ನೀಡಿದ್ದಾರೆ.

ಪ್ರಕರಣ ಸಂಬಂಧ ಬಂಧಿತ ಆರೋಪಿ ವೀರಸ್ವಾಮಿಯ ಮಗ ಕುಮ್ರೇಶ್ ಎಂಬುವನು ತಲೆ‌ಮರೆಸಿಕೊಂಡಿದ್ದು, ಆತನ್ನು ಬಂಧಿಸಲು ಪೊಲೀಸರು ಬಲೆ‌ ಬೀಸಿದ್ದಾರೆ.