ದಾವಣಗೆರೆ: ಭತ್ತ ಕೊಯ್ಯವ ಯಂತ್ರಗಳಿಗೆ ಜಿಲ್ಲಾಡಳಿತ ಬೆಲೆ ನಿಗದಿ ಪಡಿಸಿದ್ದು, ನಿಗದಿ ಪಡಿಸಿದ ದರಕ್ಕಿಂತ ಹೆಚ್ಚು ಹಣ ರೈತರಿಂದ ಪಡೆದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ದಾವಣಗೆರೆ ಜಿಲ್ಲಾಧಿಕಾರಿ ಮಹಾಂತೇಶ್ ಬೀಳಗಿ ಹೇಳಿದ್ದಾರೆ.
ಜಿಲ್ಲಾಧಿಕಾರಿ ಕಚೇರಿ ಆವರಣದಲ್ಲಿ ಮಾತನಾಡಿದ ಅವರು, ಟೈರ್ ಹೊಂದಿರುವ ಭತ್ತ ಕೊಯ್ಯುವ ಯಂತ್ರಕ್ಕೆ 1,800 ದರ ನಿಗದಿ ಪಡಿಸಿದರೆ, ಇನ್ನು ಚೈನ್ ಚಕ್ರ ಇರುವ ಯಂತ್ರಕ್ಕೆ 2,250 ರೂಪಾಯಿಯನ್ನು ಜಿಲ್ಲಾಡಳಿತ ನಿಗದಿ ಪಡಿಸಿದ್ದು, ಈ ದರಕ್ಕಿಂತ ಹೆಚ್ಚು ಹಣವನ್ನು ಯಂತ್ರದ ಮಾಲೀಕರು ರೈತರಿಂದ ಪಡೆದರೆ ಅವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳುವುದಾಗಿ ಡಿಸಿ ಎಚ್ಚರಿಕೆ ನೀಡಿದ್ದಾರೆ.
ಈ ಬಗ್ಗೆ ರೈತರು ದೂರು ಸಲ್ಲಿಸಿದರೆ ಮ್ಯಾನೇಜ್ಮೆಂಟ್ ಕಾಯ್ದೆಯಡಿ ಕ್ರಮ ಜರುಗಿಸುವ ಮೂಲಕ ಯಂತ್ರವನ್ನು ಸೀಜ್ ಮಾಡುವುದಾಗಿ ತಿಳಿಸಿದ್ದಾರೆ. ಅಲ್ಲದೇ ಖುದ್ದಾಗಿ ನಾನೇ ಸ್ಥಳಕ್ಕೆ ತೆರಳಿ ಪರಿಶೀಲನೆ ನಡೆಸಿ ಕ್ರಮಕ್ಕೆ ಮುಂದಾಗುತ್ತೇನೆ, ಅನ್ಯಾಯ ಆಗುತ್ತಿದ್ದರೆ ರೈತರು ನಮಗೆ ಮಾಹಿತಿ ನೀಡಬೇಕು. ನಾವು ರೈತರ ಜೊತೆಗೆ ಇರುತ್ತೇವೆ ಎಂದರು.
