ಮಂಗಳೂರು: ಚುನಾವಣೆ ಸಂದರ್ಭದಲ್ಲಿ ಸ್ವಿಸ್ ಬ್ಯಾಂಕಿನಲ್ಲಿರುವ ಕಪ್ಪು ಹಣ ತರುವೆನೆಂದು ಭರವಸೆ ನೀಡಿದ ಬಿಜೆಪಿ ಅಧಿಕಾರಕ್ಕೆ ಬಂದ ಬಳಿಕ ಆರ್.ಬಿ.ಐನ ಮೀಸಲು ನಿಧಿಯನ್ನು ತೆಗೆಯುತ್ತಿದೆ ಎಂದು ಮಾಜಿ ಸಚಿವ ಯು ಟಿ ಖಾದರ್ ಲೇವಡಿ ಮಾಡಿದ್ದಾರೆ.
ದ.ಕ ಜಿಲ್ಲಾ ಕಾಂಗ್ರೆಸ್ ಕಚೇರಿಯಲ್ಲಿ ಮಾತನಾಡಿ, ದೇಶದ ಆರ್ಥಿಕ ಸ್ಥಿತಿ ಬಗ್ಗೆ ಜನರು ಆತಂಕಿತರಾಗಿದ್ದಾರೆ. ದುಷ್ಪರಿಣಾಮ ಅನುಭವಿಸುತ್ತಿದ್ದರೂ ಮೌನವಾಗಿ ಕೂತಿದ್ದಾರೆ. ಕೇಂದ್ರ ಸರ್ಕಾರ ರಿಸರ್ವ್ ಬ್ಯಾಂಕ್ನ ಮೀಸಲು ನಿಧಿಯನ್ನು ಯಾಕೆ ಬಳಕೆ ಮಾಡುತ್ತಿದೆ ಎಂಬುದರ ಬಗ್ಗೆ ಮಾಹಿತಿ ನೀಡಲಿ. ಜಿಎಸ್ ಟಿ ಯಿಂದ ತೆರಿಗೆ ಜಾಸ್ತಿ ಬರಲಿಲ್ಲವೆ, ನೋಟ್ ಬ್ಯಾನ್ ನಿಂದ ಕಪ್ಪು ಹಣ, ಭಯೋತ್ಪಾದನೆ ಕಡಿಮೆಯಾಯಿತೆ ಎಂದು ತಿಳಿಸಬೇಕು ಎಂದು ಆಗ್ರಹಿಸಿದರು.
ಬೀಟ್ ಪೊಲೀಸ್ ಬಗ್ಗೆ ತನಿಖೆಯಾಗಲಿ:
ಉಡುಪಿ ಕರಾವಳಿ ಕಾವಲು ಪಡೆಯ ನೋಟಿಸ್ ಬೋರ್ಡ್ನಲ್ಲಿ ಜನರಿಗೆ ಆತಂಕ ಮೂಡಿಸುವಂತೆ ಭಯೋತ್ಪಾದಕ ಬಂದಿರುವ ಬಗ್ಗೆ ನೋಟಿಸ್ ಅಂಟಿಸಿದ ಬೀಟ್ ಪೊಲೀಸ್ ಬಗ್ಗೆ ತನಿಖೆಯಾಗಬೇಕು. ಈ ರೀತಿಯ ನೋಟಿಸ್ ನ ಬಗ್ಗೆ ಉಡುಪಿ ಜಿಲ್ಲಾ ವರಿಷ್ಠಾಧಿಕಾರಿಗಳಿಗೆ ಮಾಹಿತಿ ಇಲ್ಲ. ಒಂದು ವೇಳೆ ಭಯೋತ್ಪಾದಕ ಆಗಮನದ ಬಗ್ಗೆ ಎಚ್ಚರಿಕೆ ನೀಡುವುದಿದ್ದರೆ ಕರಾವಳಿಯ ಇತರ ಭಾಗಗಳಲ್ಲಿ ಯಾಕೆ ಎಚ್ಚರಿಕೆ ನೀಡಲಾಗಿಲ್ಲ. ಪೊಲೀಸ್ ಅಧಿಕಾರಿಗಳ ಗಮನಕ್ಕೆ ತಾರದೆ ಬೀಟ್ ಪೊಲೀಸ್ ಅಂಟಿಸಿದ ನೋಟಿಸ್ ಪೊಲೀಸ್ ಠಾಣೆಯಲ್ಲಿ ಟೈಪ್ ಮಾಡಿದ್ದೋ ಅಥವಾ ಹೊರಗೆಯೊ ಎಂಬ ಬಗ್ಗೆ ಮಾಹಿತಿ ಹೊರಬರಬೇಕು. ಭಯೋತ್ಪಾದನೆ ಬಗ್ಗೆ ಎಲ್ಲರೂ ಜಾಗೃತಿ ಇರಬೇಕು. ಅದಕ್ಕಾಗಿ ಈ ಬಗ್ಗೆ ಸ್ಪಷ್ಟ ಮಾಹಿತಿ ಬೇಕು. ಬೀಟ್ ಪೊಲೀಸ್ ಬಗ್ಗೆ ತನಿಖೆ ಆಗಬೇಕು ಎಂದು ಒತ್ತಾಯಿಸಿದರು.
ನೆರೆ ಸಂತ್ರಸ್ತರ ಅಹವಾಲು ಕೇಳಲು ಪ್ರಧಾನಮಂತ್ರಿ ಬರಬೇಕಿತ್ತು. ಸಂತ್ರಸ್ತ ಮಕ್ಕಳೊಂದಿಗೆ ಅಹವಾಲು ಕೇಳಬೇಕಾದ ಅವರು ಭೂತಾನ್ ದೇಶದ ಮಕ್ಕಳೊಂದಿಗೆ ಕಾಲ ಕಳೆಯುತ್ತಾರೆ. ನೆರೆ ಸಂತ್ರಸ್ತರ ಅಹವಾಲು ಕೇಳಲು ದಕ್ಷಿಣ ಕನ್ನಡ ಜಿಲ್ಲೆಗೆ ಕೇಂದ್ರ ತಂಡ ಬಾರದೆ ಇರುವುದು ಜಿಲ್ಲೆಯ ಬಿಜೆಪಿ 7 ಶಾಸಕರ ಮತ್ತು ಸಂಸದರ ವೈಫಲ್ಯವಾಗಿದೆ . ನಮ್ಮ ಜಿಲ್ಲೆಯ ಸಂಸದರು ರಾಜ್ಯ ಬಿಜೆಪಿ ಅಧ್ಯಕ್ಷರಾಗಿದ್ದು, ಅವರು ಒಂದು ಪೋನ್ ಮಾಡಿ ಕೇಂದ್ರ ಅಧ್ಯಯನ ತಂಡ ತರಿಸಬಹುದಿತ್ತು . ಆದರೆ ಅವರು ಅದನ್ನು ಮಾಡಿಲ್ಲ ಎಂದು ಆಪಾದಿಸಿದರು.
