ಮಂಗಳೂರು-ಕಾಸರಗೋಡು ಬಸ್ ಸಂಚಾರ ಪುನರಾರಂಭ

ಕೋವಿಡ್​ ಹಿನ್ನೆಲೆಯಲ್ಲಿ ಸ್ಥಗಿತಗೊಂಡಿದ್ದ ಮಂಗಳೂರು-ಕಾಸರಗೋಡು ಬಸ್ ಸಂಚಾರ ಇಂದು ಆರಂಭವಾಗಿದೆ. ಸಂಚಾರದ ಮೊದಲ ದಿನವಾದ ಇಂದು ಪ್ರಯಾಣಿಕರು ಬೆರಳೆಣಿಕೆಯಲ್ಲಿ ಕಂಡುಬಂದರು.

ಮಂಗಳೂರು: ಕೋವಿಡ್ ಹಿನ್ನೆಲೆಯಲ್ಲಿ ಕಳೆದ ಎಂಟು ತಿಂಗಳಿನಿಂದ ಸ್ಥಗಿತಗೊಂಡಿದ್ದ ಮಂಗಳೂರು-ಕಾಸರಗೋಡು ಬಸ್ ಸಂಚಾರ ಇಂದಿನಿಂದ ಆರಂಭಗೊಂಡಿದೆ.

ಇಂದು ಮಂಗಳೂರಿನಿಂದ ಕಾಸರಗೋಡಿಗೆ ಲಾಲ್​ಬಾಗ್​ನ ಕೆಎಸ್ಆರ್​ಟಿಸಿ ಬಸ್ ನಿಲ್ದಾಣದಿಂದ ಹಾಗೂ ಸ್ಟೇಟ್​ಬ್ಯಾಂಕ್​ನಲ್ಲಿರುವ ಸರ್ವೀಸ್ ಬಸ್ ನಿಲ್ದಾಣದಿಂದ ಸೇರಿ ಒಟ್ಟು 120 ಬಸ್​ಗಳು ಓಡಾಟ ನಡೆಸಿವೆ. ಅದೇ ರೀತಿ ಕಾಸರಗೋಡಿನಿಂದಲೂ ಇಷ್ಟೇ ಬಸ್​ಗಳು ಸಂಚಾರ ನಡೆಸಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಲಾಕ್​ಡೌನ್ ತೆರವಿನ ಬಳಿಕ ಹಂತ ಹಂತವಾಗಿ ಬಸ್ ಸಂಚಾರಕ್ಕೆ ಅನುಮತಿ ನೀಡಿರುವುದರಿಂದ ಮಂಗಳೂರಿನಿಂದ ಹೊರಟ ಬಸ್​ಗಳು ಕಾಸರಗೋಡಿನ ಗಡಿಭಾಗ ತಲಪಾಡಿವರೆಗೆ ಸಂಚಾರ ನಡೆಸುತ್ತಿದ್ದವು. ಇಂದಿನಿಂದ ಮಂಗಳೂರಿನಿಂದ ಕಾಸರಗೋಡಿಗೆ ಹಾಗೂ ಕಾಸರಗೋಡಿನಿಂದ ಮಂಗಳೂರಿಗೆ ಬಸ್​ಗಳು ಸಂಚರಿಸಲು ಆರಂಭಗೊಂಡಿದೆ. ಇಂದು ಆರಂಭದ ದಿನವಾದ್ದರಿಂದ ಅಷ್ಟೊಂದು ಜನ ಪ್ರಯಾಣಿಕರು ಬಸ್ ನಲ್ಲಿ ಕಂಡು ಬರಲಿಲ್ಲ.‌