ಪುತ್ತೂರು: ಕೇವಲ ವಾರ್ಡ್ ಮಟ್ಟದಲ್ಲಿ ಕಾರ್ಯಪಡೆ ಮೀಟಿಂಗ್ ನಡೆಸಿದರೆ ಸಾಲದು. ಈ ಮೀಟಿಂಗ್‌ಗಳು ಕೇವಲ ಕೆಲಸದ ಪ್ರಗತಿ ಪರಿಶೀಲನೆ ಮಾಡಲು ಮಾತ್ರ ಸಹಕಾರಿ. ಕಾರ್ಯಪಡೆಯ ಸದಸ್ಯರು ಸಂಘ ಸಂಸ್ಥೆಗಳ ನೆರವು ಪಡೆದುಕೊಂಡು ಪ್ರತಿ ಮನೆಯನ್ನೂ ಭೇಟಿ ಮಾಡಿ ಅಧ್ಯಯನ ಮಾಡಬೇಕು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಸೂಚನೆ ನೀಡಿದರು.
ಗುರುವಾರ ಪುತ್ತೂರು ನಗರಸಭೆ ಸಭಾಂಗಣದಲ್ಲಿ ನಡೆದ ನಗರಸಭಾ ವ್ಯಾಪ್ತಿಯ ಕೋವಿಡ್ ನಿಯಂತ್ರಣ ಕಾರ್ಯಾಚರಣೆಯ ಪ್ರಗತಿ ಪರಿಶೀಲನಾ ಸಭೆಯಲ್ಲಿ ಅವರು ಮಾತನಾಡಿದರು. ನಗರಸಭೆಯ 31 ವಾರ್ಡ್ಗಳಲ್ಲಿ ಎಲ್ಲ ಕಡೆ ಕಾರ್ಯಪಡೆ ಮೀಟಿಂಗ್ ನಡೆಸಲಾಗುತ್ತಿದೆ ಎಂದು ಪೌರಾಯುಕ್ತರಾದ ರೂಪಾ ಶೆಟ್ಟಿ ಮಾಹಿತಿ ನೀಡಿದಾಗ ಪ್ರತಿಕ್ರಿಯಿಸಿದ ಸಚಿವರು, ಮೀಟಿಂಗ್ ನಡೆಸುವುದು ಉತ್ತಮ. ಆದರೆ, ಕೇವಲ ಮೀಟಿಂಗ್‌ಗೆ ಸೀಮಿತವಾದರೆ ಏನೂ ಪ್ರಯೋಜನವಿಲ್ಲ. ಟೀಂ ವರ್ಕ್ ಮಾಡಬೇಕು. ಹೇಗೆ ಚುನಾವಣೆ ಸಂದರ್ಭ ಪ್ರತೀ ಮನೆಗೂ ಭೇಟಿ ನೀಡಲಾಗುತ್ತದೆಯೋ, ಅದೇ ರೀತಿ ಈ ಬಾರಿ ನಗರಸಭಾ ವ್ಯಾಪ್ತಿಯ ಎಲ್ಲ ಮನೆಗಳಿಗೂ ತಂಡ ಭೇಟಿ ನೀಡಿ, ಮನೆ ಮುಂದೆ ನಿಂತು ಅಲ್ಲಿ ಸ್ಥಿತಿಗತಿ ಅಧ್ಯಯನ ಮಾಡಬೇಕು ಎಂದರು.
ಸೋಂಕಿತರು, ಪ್ರಾಥಮಿಕ ಸಂಪರ್ಕಿತರು, ಕ್ವಾರಂಟೈನ್ ನಿಯಮ ಪಾಲನೆ ಇತ್ಯಾದಿಗಳ ಅಧ್ಯಯನ ಮಾಡಿ ಕ್ರಮ ಕೈಗೊಳ್ಳಬೇಕು. ಪಾಸಿಟಿವ್ ಬಂದ ನಂತರ ನೋಡಿಕೊಳ್ಳೋಣ ಎಂಬ ಧೋರಣೆ ಬೇಡ ಅಥವಾ ಇದು ಕೇವಲ ಆರೋಗ್ಯ ಇಲಾಖೆಯ ಕಾರ್ಯಕ್ರಮ ಎಂಬ ನಿರ್ಲಕ್ಷವೂ ಬೇಡ. ಇದು ಇಡೀ ಸರ್ಕಾರದ ಅಭಿಯಾನ. ಕೊರೊನಾ ನಿರ್ಮೂಲನೆ ಮಾಡಿ ಬಿಡುತ್ತೇವೆ ಎಂಬ ಆತುರ ಬೇಕಾಗಿಲ್ಲ. ಆದರೆ, ನಿಯಂತ್ರಣವಂತೂ ಮಾಡಲೇಬೇಕು ಎಂದು ಸೂಚಿಸಿದರು.
ನಗರ ಪ್ರದೇಶದಿಂದ ಹಳ್ಳಿಗಳಿಗೆ ಕೊರೊನಾ ವಿಸ್ತರಣೆಯಾಗದಂತೆ ತಡೆಯಬೇಕು. ನಗರಸಭೆ ವ್ಯಾಪ್ತಿಯಲ್ಲಿರುವ ಈಗಿನ ಸಕ್ರೀಯ ಪ್ರಕರಣಗಳು ಇನ್ನಷ್ಟು ಹೆಚ್ಚಾಗದಂತೆ ಕ್ರಮ ಕೈಗೊಳ್ಳಬೇಕು. ಜನರಿಗೆ ನೋವಾಗುತ್ತದೆ ಎಂದು ಸುಮ್ಮನಿರಬೇಡಿ. ಈಗ ಕಠೋರ ಕ್ರಮ ಕೈಗೊಳ್ಳದಿದ್ದರೆ ಮನೆ ಮನೆಗಳೂ ಕೊರೊನಾ ಸೋಂಕಿಂದ ತುಂಬಿ ತುಳುಕಬಹುದು ಎಂದು ಎಚ್ಚರಿಸಿದರು.
ಶೌಚಾಲಯ ಸಮಸ್ಯೆ: ಬಹುತೇಕ ಮನೆಗಳಲ್ಲಿ ಒಂದೇ ಶೌಚಾಲಯವಿದೆ. ಸೋಂಕಿತರಿಗೆ ಪ್ರತ್ಯೇಕ ಶೌಚಾಲಯವಿಲ್ಲ. ಎಲ್ಲರೂ ಒಟ್ಟಿಗಿದ್ದರೆ ಎಲ್ಲರನ್ನೂ ಶಿಫ್ಟ್ ಮಾಡುವ ಸವಾಲು ಎದುರಾಗುತ್ತದೆ ಎಂದು ಪೌರಾಯುಕ್ತರು ಹೇಳಿದರು. ಒಂದು ಮನೆಯ ಎಲ್ಲರಿಗೂ ಪಾಸಿಟಿವ್ ಬಂದರೆ ಶಿಫ್ಟ್ ಮಾಡುವ ಅಗತ್ಯವಿಲ್ಲ. ಎಲ್ಲರೂ ಜತೆಗಿರಲಿ. ಇಡೀ ಮನೆ ಕಂಟೇನ್ಮೆಂಟ್ ವಲಯ ಮಾಡಿ ಬಿಡಿ. ಸೀರಿಯಸ್ ಕೇಸ್ ಇದ್ದರೆ ಮಾತ್ರ ಶಿಫ್ಟ್ ಮಾಡಿ ಎಂದು ಸಚಿವರು ಸೂಚಿಸಿದರು.
ಬಲ್ನಾಡಿನಲ್ಲಿರುವ ಮೊರಾರ್ಜಿ ದೇಸಾಯಿ ವಸತಿ ಶಾಲೆಯ ಕೋವಿಡ್ ಕೇರ್ ಸೆಂಟರ್‌ನಲ್ಲಿ 100 ಬೆಡ್ ಇದೆ. ವೈದ್ಯರಿದ್ದಾರೆ. ಕಾಲಹರಣಕ್ಕೆ ಟಿವಿ ಇದೆ. ಉತ್ತಮ ಆಹಾರವಿದೆ. ಸೋಂಕಿತರಿಗೆ ಪ್ರತ್ಯೇಕತೆ ಬೇಕಿದ್ದರೆ ಅಲ್ಲಿಗೆ ಶಿಫ್ಟ್ ಮಾಡಬಹುದು. ಅಲ್ಲೀಗ 10 ಮಂದಿಯಷ್ಟೇ ಇದ್ದಾರೆ ಎಂದು ಶಾಸಕರು ನುಡಿದರು.
ಓದಿ: ಮರೆಯಾದ ಕರ್ನಾಟಕದ ಮೊದಲ ಮಹಿಳಾ ಶಿಲ್ಪಿ : ಅರವಿಂದ ಲಿಂಬಾವಳಿ ಸಂತಾಪ
