ನಾಡು ಶಾಂತಿ, ಸಮೃದ್ಧಿಯ ನೆಲೆಬೀಡಾಗಲಿ.. ಬಿಷಪ್ ಲಾರನ್ಸ್ ಮುಕ್ಕುಯಿ ಕ್ರಿಸ್ಮಸ್ ಸಂದೇಶ

ಇಡೀ ಪ್ರಪಂಚವು ಕೊರೊನಾ ಬಾಧೆಯಿಂದ ತತ್ತರಿಸಿದೆ. ಈ ಮಾರಿಯಿಂದ ಚೇತರಿಸಿಕೊಳ್ಳಲು ಪ್ರಭುಕ್ರಿಸ್ತರ ಆರ್ಶೀವಾದಕ್ಕಾಗಿ ನಾವು ಪಾರ್ಥಿಸೋಣ. ಕೊರೊನಾ ಬಾಧೆಯ ಮೂಲಕ ದೇವರು ನಮಗೆ ನೀಡುತ್ತಿರುವ ತಾಳ್ಮೆಯ, ಸಹಬಾಳ್ವೆಯ ಮತ್ತು ಸಾಮರಸ್ಯದ ಸಂದೇಶ ಸ್ವೀಕರಿಸೋಣ..

ಬೆಳ್ತಂಗಡಿ (ದಕ್ಷಿಣ ಕನ್ನಡ): ಬೆಳ್ತಂಗಡಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ವಂದನೀಯ ಬಿಷಪ್ ಲಾರನ್ಸ್ ಮುಕ್ಕುಯಿ ಅವರು ಕ್ರಿಸ್​ಮಸ್ ಸಂದೇಶ ಸಾರಿದ್ದಾರೆ.

ನಾಡಿನ ಸಮಸ್ತ ಜನರಿಗೂ ಕ್ರಿಸ್ತ ಜಯಂತಿಯ ಶುಭಾಶಯಗಳನ್ನು ಕೋರುತ್ತೇನೆ. ಪಾಪಾಂಧಕಾರದಲ್ಲಿ ಮುಳುಗಿದ್ದ ಮಾನವ ಕುಲಕ್ಕೆ ರಕ್ಷಣೆಯನ್ನೀಯಲು ದೇವರ ಪುತ್ರರಾದ ಯೇಸು ಕ್ರಿಸ್ತರು ಜನಿಸಿದರು. ಇದು ಸರ್ವ ಮನುಷ್ಯರಿಗೂ ಸಂತೋಷವನ್ನು ಕೊಡುವ ಸುದ್ದಿಯಾಗಿದೆ.

ಈ ಸುದ್ದಿಯು ನಮಗೆ ಸಿಹಿಯಾಗಬೇಕಿದ್ದರೆ ಯೇಸುಕ್ರಿಸ್ತರನ್ನು ಸ್ವೀಕರಿಸಿ ಅವರು ತೋರಿಸಿಕೊಟ್ಟ ಪರಿಶುದ್ಧತೆಯ ಮತ್ತು ಪರಪ್ರೀತಿಯ ಮಾರ್ಗದಲ್ಲಿ ಸಂಚರಿಸಬೇಕು. ದ್ವೇಷ, ಕಲಹವನ್ನು ತ್ಯಜಿಸಿ, ಪ್ರೀತಿಯ ಮತ್ತು ಶಾಂತಿಯ ದಾರಿಯಲ್ಲಿ ಸಾಗಬೇಕು.

ಇಡೀ ಪ್ರಪಂಚವು ಕೊರೊನಾ ಬಾಧೆಯಿಂದ ತತ್ತರಿಸಿದೆ. ಈ ಮಾರಿಯಿಂದ ಚೇತರಿಸಿಕೊಳ್ಳಲು ಪ್ರಭುಕ್ರಿಸ್ತರ ಆರ್ಶೀವಾದಕ್ಕಾಗಿ ನಾವು ಪಾರ್ಥಿಸೋಣ. ಕೊರೊನಾ ಬಾಧೆಯ ಮೂಲಕ ದೇವರು ನಮಗೆ ನೀಡುತ್ತಿರುವ ತಾಳ್ಮೆಯ, ಸಹಬಾಳ್ವೆಯ ಮತ್ತು ಸಾಮರಸ್ಯದ ಸಂದೇಶ ಸ್ವೀಕರಿಸೋಣ.

ಕ್ರಿಸ್​ಮಸ್ ಆಚರಣೆಯ ಸಂದರ್ಭದಲ್ಲಿ ನಾಡಿನ ಸಮಸ್ತರಿಗೂ ಪ್ರಭುಕ್ರಿಸ್ತರ ಆರ್ಶೀವಾದವನ್ನು ಪ್ರಾರ್ಥಿಸುತ್ತೇನೆ ಎಂದರು. ನಮ್ಮ ನಾಡು ಶಾಂತಿಯ ಮತ್ತು ಸಮೃದ್ಧಿಯ ನೆಲೆಬೀಡಾಗಲಿ ಎಂದು ಹಾರೈಸುತ್ತೇನೆ. 2021ರ ಹೊಸ ವರ್ಷದ ಶುಭವನ್ನು ಸರ್ವರಿಗೂ ಕೋರುತ್ತೇನೆ ಎಂದಿದ್ದಾರೆ.