ಮಂಗಳೂರು : ಅನಿವಾಸಿ ಭಾರತೀಯ, ಪ್ರತಿಷ್ಠಿತ ಫಾರ್ಚೂನ್ ಗ್ರೂಪ್ ಆಫ್ ಹೋಟೆಲ್ ಮಾಲೀಕ ಕುಂದಾಪುರ ಮೂಲದ ವಕ್ವಾಡಿ ಪ್ರವೀಣ್ ಕುಮಾರ್ ಅವರಿಗೆ 10 ವರ್ಷಗಳ ದುಬೈ ಗೋಲ್ಡನ್ ವೀಸಾ ಲಭ್ಯವಾಗಿದೆ. ದುಬೈನಲ್ಲಿ ಬೆರಳೆಣಿಕೆಯಷ್ಟು ಭಾರತೀಯರಿಗೆ ಮಾತ್ರ ಈ ಗೋಲ್ಡನ್ ವೀಸಾ ಲಭ್ಯವಾಗಿದೆ. ಇದು ಬಹಳ ಗೌರವ ಹಾಗೂ ಪ್ರತಿಷ್ಠೆಯ ವಿಚಾರ. ಈ ರೀತಿ ಗೋಲ್ಡನ್ ವೀಸಾ ಪಡೆದ ಕರಾವಳಿಯ ಎರಡನೆಯ ವ್ಯಕ್ತಿ ಪ್ರವೀಣ್ ಕುಮಾರ್.
ವಕ್ವಾಡಿ ಪ್ರವೀಣ್ ಶೆಟ್ಟಿಯವರು ದುಬೈನಲ್ಲಿ ಏಳು ಫಾರ್ಚೂನ್ ಗ್ರೂಪ್ ಹೋಟೆಲ್ನ ಮಾಲೀಕರಾಗಿದ್ದಾರೆ. ಇವರು ಇತ್ತೀಚೆಗೆ ದುಬೈನಲ್ಲಿ ಹೊಸದಾಗಿ 4 ಸ್ಟಾರ್ ಹೋಟೆಲ್ ಆರಂಭಿಸಿದ್ದು, ಫಾರ್ಚೂನ್ ಅಕ್ಕಿಯಮ್ ಹೋಟೆಲ್ ಎಂಬ ಹೆಸರಿನ ಇದು ಭವ್ಯವಾಗಿಯೂ, ವಿಶೇಷ ಸವಲತ್ತುಗಳನ್ನು ಹೊಂದಿರುವ ಹೋಟೆಲ್ ಆಗಿದೆ.
ಈ ಹೋಟೆಲನ್ನು ವೀಕ್ಷಿಸಲು ದುಬೈನ ಡೈರೆಕ್ಟರ್ ಜನರಲ್ ಆಫ್ ಡಿಟಿಸಿಎಂ ಹೆಲಾಲ್ ಸಯೀದ್ ಅಲ್-ಮರಿಯವರು ಬಂದಿದ್ದು, ಇದೊಂದು ಗೌರವದ ವಿಚಾರ. ಕೊರೊನಾ ಭೀತಿಯ ಕಾಲದಲ್ಲಿಯೂ ಇಂತಹ ಬೃಹತ್, ವಿಶೇಷ ಸವಲತ್ತುಗಳನ್ನು ಹೊಂದಿರುವ ಹೋಟೆಲ್ ನಿರ್ಮಾಣದ ಬಗ್ಗೆ ಹೆಲಾಲ್ ಸಯೀದ್ ಅಲ್-ಮರಿಯವರು ಸಂತೋಷ ವ್ಯಕ್ತಪಡಿಸಿದ್ದರು.
ಈ ಬಗ್ಗೆ ಹೋಟೆಲ್ನ ಮಾಲೀಕ ವಕ್ವಾಡಿ ಪ್ರವೀಣ್ ಕುಮಾರ್ ಅವರಿಗೆ ಅಭಿನಂದನೆ ಸಲ್ಲಿಸಿರುವ ಹೆಲಾಲ್ ಸಯೀದ್ ಅಲ್-ಮರಿಯವರು, 10 ನಿಮಿಷಕ್ಕೆಂದು ಬಂದವರು ಸುಮಾರು 40 ನಿಮಿಷ ಕಾಲ ಕಾಲಕಳೆದರು.
ಹೋಟೆಲ್ ವ್ಯವಸ್ಥೆಯನ್ನು ಕಂಡು ಸಂತೋಷಗೊಂಡು ಗೋಲ್ಡನ್ ವೀಸಾ ನೀಡಿರುವುದಲ್ಲದೆ ದುಬೈ ಪ್ರವಾಸೋದ್ಯಮ ಇಲಾಖೆಯಿಂದ ಯಾವ ಸಹಾಯ ಬೇಕಾದ್ರೂ ನೀಡುವ ಭರವಸೆ ನೀಡಿದರು. ಅಲ್ಲದೆ ಹೋಟೆಲ್ನ ಎಲ್ಲರಿಗೂ ಉಚಿತ ಕೊರೊನಾ ಲಸಿಕೆ ನೀಡುವ ಆಶ್ವಾಸನೆಯನ್ನ ಹೆಲಾಲ್ ಸಯೀದ್ ಅಲ್-ಮರಿಯವರು ನೀಡಿದ್ದಾರೆ.
