ಚಿಕ್ಕಬಳ್ಳಾಪುರ: ಹೈಟೆನ್ಶನ್ ವಿದ್ಯುತ್ ತಂತಿ ಸರಿಪಡಿಸಿ ಕೆಳಗೆ ಇಳಿಯುವ ವೇಳೆ ತಂತಿ ತಗುಲಿ ಲೈನ್ಮ್ಯಾನ್ ಮೃತಪಟ್ಟ ಘಟನೆ ಜಿಲ್ಲೆಯ ಗೌರಿಬಿದನೂರು ತಾಲೂಕಿನ ಗೊಟ್ಟುಕುಂಟೆ ಗ್ರಾಮದ ಬಳಿ ನಡೆದಿದೆ.
ಲೈನ್ಮ್ಯಾನ್ ನಾಗರಾಜ್ ವಲಿ (27) ಮೃತ ವ್ಯಕ್ತಿ. ಮೃತ ಲೈನ್ ಮ್ಯಾನ್ ಮಹಾರಾಷ್ಟ್ರದ ಕೊಲ್ಲಾಪುರ ನಿವಾಸಿಯಾಗಿದ್ದ, ನಾಗರಾಜ್ ವಲಿ ಕಳೆದ 2 ವರ್ಷಗಳಿಂದ ಗೌರಿಬಿದನೂರಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು.
ತಾಲೂಕಿನ ಬಾಗೇಪಲ್ಲಿ ಮಾರ್ಗದ ಗೊಟ್ಟುಕುಂಟೆ ಗ್ರಾಮದ ಬಳಿ ಹೈನ್ಶನ್ ವಿದ್ಯುತ್ ತಂತಿ ರಿಪೇರಿಯಾಗದಿರುವ ಬಗ್ಗೆ ದೂರು ಬಂದಿತ್ತು. ಈ ಹಿನ್ನೆಲೆ ತಾಲೂಕಿನ ವಿದುರಾಶ್ವತ್ಥ ಕೆಇಬಿ ಕಚೇರಿಯ ಕಿರಿಯ ಇಂಜಿನಿಯರ್ ರವಿ ಹಾಗೂ ಸಿಬ್ಬಂದಿ ಸ್ಥಳಕ್ಕೆ ಭೇಟಿ ನೀಡಿದ್ದರು. ಕಂಬವನ್ನು ಹತ್ತಿದ್ದ ನಾಗರಾಜ್ ವಲಿ ರಿಪೇರಿ ಕಾರ್ಯವನ್ನು ಮುಗಿಸಿ ಕೆಳಗೆ ಇಳಿಯುವ ವೇಳೆ ಹೈಟೆನ್ಶನ್ ವೈರ್ಗೆ ಅವರ ಬಲಗೈ ತಗುಲಿ ಮೃತಪಟ್ಟಿದ್ದಾರೆ.
ಓದಿ:ಚಿಕ್ಕಬಳ್ಳಾಪುರ: ಸರ್ಕಾರಿ ಕಚೇರಿಯಲ್ಲಿ ನೇಣಿಗೆ ಶರಣಾದ ವ್ಯಕ್ತಿ
ಸಿಬ್ಬಂದಿ ತಕ್ಷಣ ಅವರನ್ನು ಸ್ಥಳೀಯ ಆಸ್ಪತ್ರೆಗೆ ರವಾನಿಸಿದ್ದು, ಅವರು ಮೃತಪಟ್ಟಿರುವುದಾಗಿ ವೈದ್ಯರು ತಿಳಿಸಿದ್ದಾರೆ. ಸ್ಥಳಕ್ಕೆ ಸಿಪಿಐ ಶಶಿಧರ್ ಹಾಗೂ ಗ್ರಾಮಾಂತರ ಠಾಣೆಯ ಪಿಎಸ್ಐ ಮೋಹನ್ ಕುಮಾರ್ ಭೇಟಿ ನೀಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
