ತಿಮ್ಮಪ್ಪನ ದರ್ಶನಕ್ಕೆ ಟಿಕೆಟ್ ಬುಕ್ ಮಾಡಿ ಕೊಡುವ ನೆಪದಲ್ಲಿ ಲಕ್ಷಾಂತರ ರೂ.ಪಂಗನಾಮ

ಟಿಕೆಟ್ ಬುಕ್ ಮಾಡಿಕೊಡುವ ನೆಪದಲ್ಲಿ ಟ್ರಾವೆಲ್ ಏಜೆನ್ಸಿಗೆ ಯುವಕನೊಬ್ಬ ಯಾಮಾರಿಸಿರುವ ಘಟನೆ ಚಿಕ್ಕಬಳ್ಳಾಪುರದಲ್ಲಿ ನಡೆದಿದೆ.

ಚಿಕ್ಕಬಳ್ಳಾಪುರ: ತಿರುಪತಿ ತಿಮ್ಮಪ್ಪನ ದರ್ಶನಕ್ಕೆ ಟಿಕೆಟ್​ ಬುಕ್​ ಮಾಡುವುದಾಗಿ ನಂಬಿಸಿ, ನಕಲಿ ಟಿಕೆಟ್ ನೀಡಿ ವಂಚಿಸಿರುವ ಆರೋಪ ಚಿಕ್ಕಬಳ್ಳಾಪುರದಲ್ಲಿ ಕೇಳಿ ಬಂದಿದೆ.

ಆಂಧ್ರಮೂಲದ ವೆಸ್ಟ್ ಗೋದಾವರಿಯ ಪಂಜಾ ರಮಣ ಪ್ರಸಾದ್ ಎಂಬಾತ ಟ್ರಾವೆಲ್ ಏಜೆನ್ಸಿ ಮಾಲೀಕಿ ಪ್ರಿಯದರ್ಶಿನಿಗೆ ವಂಚಿಸಿದ್ದಾರೆ ಎನ್ನಲಾಗಿದೆ. ಆನ್​ಲೈನ್​ನಲ್ಲಿ ಪರಿಚಯವಾದ ರಮಣಪ್ರಸಾದ್ ತಿಮ್ಮಪ್ಪನ ದರ್ಶನಕ್ಕೆ ಟಿಕೆಟ್​ ಬುಕ್ ಮಾಡಿಕೊಡುವುದಾಗಿ ತಿಳಿಸಿದ್ದಾನೆ. ಒಟ್ಟು 143 ಜನರಿಗೆ 900 ರೂಪಾಯಿಗಳಂತೆ 1,28,700 ರೂಪಾಯಿಯನ್ನು ರಮಣ ಪ್ರಸಾದ್​ಗೆ ಪ್ರಿಯದರ್ಶಿನಿ ನೀಡಿದ್ದಾರೆ ಎನ್ನಲಾಗಿದೆ. ಇನ್ನೂ ಹಲವರಿಗೆ 10 ಲಕ್ಷ ರೂಪಾಯಿ ವಂಚನೆ ಮಾಡಿರುವ ಆರೋಪವೂ ಕೇಳಿಬಂದಿದೆ.

ವಂಚನೆಗೊಳಗಾದ ಪ್ರಿಯರ್ದಶಿನಿ ಚಿಕ್ಕಬಳ್ಳಾಪುರದ ಸೈಬರ್ ಪೊಲೀಸ್ ಠಾಣೆಗೆ ದೂರು ನೀಡಿದ್ದು, ಪೊಲೀಸರು ಆರೋಪಿಗಾಗಿ ಬಲೆ ಬೀಸಿದ್ದಾರೆ.