ಎತ್ತಿನ ಗಾಡಿಯಲ್ಲಿ ವಿದ್ಯಾರ್ಥಿಗಳಿಗೆ ಬಿಸಿಯೂಟದ ಅಕ್ಕಿ-ಗೋಧಿ ವಿತರಿಸಿದ ಶಿಕ್ಷಕ

ಲಾಕ್​ಡೌನ್​ ಸಮಯದಲ್ಲೂ ಶಿಕ್ಷಕರೊಬ್ಬರು ಎತ್ತಿನ ಗಾಡಿ ಮೂಲಕ ವಿದ್ಯಾರ್ಥಿಗಳಿಗೆ ಬಿಸಿಯೂಟದ ಅಕ್ಕಿ-ಗೋಧಿ ವಿತರಿಸಿ ಮಾದರಿಯಾಗಿದ್ದಾರೆ.

ಚಾಮರಾಜನಗರ: ಕೊರೊನಾ ಲಾಕ್​ಡೌನ್​ ಹಿನ್ನೆಲೆ ಬಿಸಿಯೂಟದ ಬದಲಿಗೆ ಅಕ್ಕಿ-ಗೋಧಿ ವಿತರಿಸಲು ಶಾಲಾ ಮುಖ್ಯಶಿಕ್ಷಕ ಎತ್ತಿನಗಾಡಿ ಮೊರೆ ಹೋಗಿದ್ದಾರೆ.

ಗುಂಡ್ಲುಪೇಟೆ ತಾಲೂಕಿನ ಕಾಡಂಚಿನ ಗ್ರಾಮ ಹೊಂಗಳ್ಳಿಯ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ 111 ವಿದ್ಯಾರ್ಥಿಗಳು ವ್ಯಾಸಂಗ ಮಾಡುತ್ತಿದ್ದಾರೆ. 49 ದಿನದ ಅವಧಿಯ ಅಕ್ಕಿ, ಗೋಧಿಯನ್ನು ವಾಹನ ಸಂಚಾರಕ್ಕೆ ಅವಕಾಶವಿಲ್ಲದ ಕಾರಣದಿಂದ ಎತ್ತಿನಗಾಡಿ ಮೂಲಕ ಮನೆ-ಮನೆಗೆ ತೆರಳಿ ವಿತರಿಸುವ ಜೊತೆಗೆ ಮುಖ್ಯಶಿಕ್ಷಕ ಮಹಾದೇವಸ್ವಾಮಿ ಕೊರೊನಾ ಜಾಗೃತಿ ಮೂಡಿಸಿದ್ದಾರೆ.

ಪ್ಲಾಸ್ಟಿಕ್ ಕವರ್​ಗಳಲ್ಲಿ ಧಾನ್ಯ ವಿತರಿಸಲಾಗಿದ್ದು, ಅದನ್ನು ಪುನರ್ಬಳಕೆ ಮಾಡಿಕೊಳ್ಳಲಾಗುವುದು ಎಂದು ಶಿಕ್ಷಕ ಮಹಾದೇವಸ್ವಾಮಿ ತಿಳಿಸಿದ್ದಾರೆ. ಬೆಳಗ್ಗೆ 7-9 ರ ಅವಧಿಯಲ್ಲಿ ಧಾನ್ಯಗಳನ್ನು ವಿತರಿಸುವ ಮೂಲಕ ಶಾಲಾ ಮುಖ್ಯಶಿಕ್ಷಕ ಗಮನಸೆಳೆದಿದ್ದು, ಇವರ ಕಾರ್ಯಕ್ಕೆ ಎಸ್​ಡಿಎಂಸಿ ಸದಸ್ಯರು ಸಾಥ್ ಕೊಟ್ಟಿದ್ದಾರೆ.