ಚಾಮರಾಜನಗರ: ನಗರದಲ್ಲಿ ಇಬ್ಬರನ್ನು ಬಲಿ ಪಡೆದ ಹುಲಿಯೇನೋ ಸೆರೆಯಾಯ್ತು. ಆದರೆ, ಇದಕ್ಕೆ ಕಾರಣ ಮಾಳಿಗಮ್ಮನಂತೆ.
ನರಭಕ್ಷಕ ವ್ಯಾಘ್ರನ ಸೆರೆಗೆ ಸಪ್ತದೇವತೆಗಳಲ್ಲಿ ಒಂದಾದ ಮಾಳಿಗಮ್ಮ ಕಾರಣ ಎಂಬುದು ಗುಂಡ್ಲುಪೇಟೆ ತಾಲೂಕಿನ ಚೌಡಹಳ್ಳಿ ಗ್ರಾಮಸ್ಥರ ನಂಬಿಕೆ. ಸಣ್ಣ ಮನಸ್ತಾಪದಿಂದ ಕಳೆದ 4 ವರ್ಷಗಳಿಂದ ಮಾಳಿಗಮ್ಮ ದೇವರ ಜಾತ್ರೆ ಮಾಡದಿದ್ದಕ್ಕೆ ಹುಲಿ ದಾಳಿಗಳಾಗುತ್ತಿವೆ ಎಂದು ಗ್ರಾಮಸ್ಥರು ನಂಬಿದ್ದಾರೆ.
ಗುಂಡ್ಲುಪೇಟೆ ತಾಲೂಕಿನ ಹಸಗೂಲಿ ಮಾರಮ್ಮ, ಹುಲಿಯಮ್ಮ, ಕಾಳಮ್ಮ, ಗುರುಜಮ್ಮ, ಮಂಗಳದ ಮಾರಮ್ಮ, ಕೆಬ್ಬೇಪುರದ ಮಾರಮ್ಮ ಮತ್ತು ಮಾಳಿಗಮ್ಮ ಸಹೋದರಿಯರಾಗಿದ್ದು, ಮಾಳಿಗಮ್ಮನ ಜಾತ್ರೆ ಬಿಟ್ಟು ಉಳಿದೆಲ್ಲಾ ಜಾತ್ರೆಗಳನ್ನು ಮಾಡಲಾಗುತ್ತಿತ್ತು. ಈ ಕಾರಣಕ್ಕಾಗಿ ಮುನಿಸಿಕೊಂಡ ಮಾಳಿಗಮ್ಮ ಈ ರೀತಿ ಹುಲಿ ದಾಳಿಗೆ ಕಾರಣವಾಗಿದ್ದಾಳೆ ಎಂದು ಗ್ರಾಮಸ್ಥರು ಹೇಳುತ್ತಿದ್ದಾರೆ.
ಸಿಎಫ್ಒ ಭಾಗಿ:
ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ಸಿಎಫ್ಒ ಬಾಲಚಂದ್ರ, ಈಟಿವಿ ಭಾರತಕ್ಕೆ ದೂರವಾಣಿ ಮೂಲಕ ಮಾತನಾಡಿ, ನಾನು ಕೂಡ ಅವರ ಪೂಜೆಯಲ್ಲಿ ಓರ್ವ ಗ್ರಾಮಸ್ಥನಾಗಿ ಭಾಗಿಯಾಗುತ್ತೇನೆ, ಅವರ ನಂಬಿಕೆ ಗೌರವಿಸುತ್ತೇನೆ ಎಂದು ಪ್ರತಿಕ್ರಿಯಿಸಿದ್ದಾರೆ.
