ಚಾಮರಾಜನಗರ : ಜೂನ್ 8ರಿಂದ ದೇಗುಲ, ಮಾಲ್‌ ಒಳಗೊಂಡಂತೆ ಸಫಾರಿ, ಜಂಗಲ್ ಲಾಡ್ಜ್ ಕೂಡ ತೆರೆಯಬಹುದೆಂದು ರಾಜ್ಯ ಸರ್ಕಾರ ಆದೇಶ ಹೊರಡಿಸಿದೆ. ಜತೆಗೆ ಹಲವು ನಿಬಂಧನೆಗಳನ್ನು ಹೇರಿದೆ.
ಈ ಕುರಿತು ಬಂಡೀಪುರ ಸಿಎಫ್ಒ ಬಾಲಚಂದ್ರ ಈಟಿವಿ ಭಾರತದೊಂದಿಗೆ ಮಾತನಾಡಿ, ಈವರೆಗೂ ಸಫಾರಿ ಆರಂಭಕ್ಕೆ ಸರ್ಕಾರದಿಂದ ಯಾವುದೇ ಆದೇಶ ಬಂದಿಲ್ಲ. ಒಂದು ವೇಳೆ ಸಫಾರಿ ಆರಂಭಿಸಬೇಕೆಂದರೆ ಆಸನಗಳ ಸಂಖ್ಯೆ ಶೇ. 50ರಷ್ಟು ಕಡಿತವಾಗಲಿದೆ ಎಂದರು. ಜೊತೆಗೆ 10 ವರ್ಷದೊಳಗಿನ ಮಕ್ಕಳಿಗೆ ಹಾಗೂ 50 ವರ್ಷ ಮೇಲ್ಪಟ್ಟ ನಾಗರಿಕರು ಸಫಾರಿ ನಡೆಸಲು ನಿರ್ಬಂಧ ವಿಧಿಸಲಿದ್ದು, ಪ್ರತಿಯೊಬ್ಬರೂ ಮಾಸ್ಕ್ ಹಾಕಿಕೊಳ್ಳಬೇಕಿದೆ.
ಸ್ಯಾನಿಟೈಸರ್ ಹಾಗೂ ಥರ್ಮಲ್ ಸ್ಕ್ರೀನಿಂಗ್ ಮಾಡಲಿದ್ದು ಒಬ್ಬರಿಂದ ಒಬ್ಬರಿಗೆ ಸಾಮಾಜಿಕ ಅಂತರ ಕಾಯ್ದುಕೊಳ್ಳಲು ಕ್ರಮಕೈಗೊಳ್ಳಲಾಗುತ್ತದೆ. ಬರುವ ಪ್ರವಾಸಿಗಳಲ್ಲಿ ಮಕ್ಕಳು ಹಾಗೂ ಹಿರಿಯ ನಾಗರಿಕರಿಗೆ ಕಟ್ಟುನಿಟ್ಟಿನ ನಿರ್ಬಂಧ ಇರಲಿದೆ ಎಂದರು.
70 ದಿನಗಳ ಬಳಿಕ ಬಂಡೀಪುರದ ಸುತ್ತಮುತ್ತಲಿನ ಲಾಡ್ಜ್ಗಳು, ಹೋಟೆಲ್ಗಳು ಚಟುವಟಿಕೆ ಆರಂಭಿಸಲು ತುದಿಗಾಲಲ್ಲಿ ನಿಂತಿದ್ದು ಇನ್ನು ಅಂತಾರಾಜ್ಯ ಸಂಚಾರ ಆರಂಭವಾಗದಿರುವುದರಿಂದ ಅಷ್ಟೇನೂ ವ್ಯಾಪಾರ-ವ್ಯವಹಾರ ಆಗದಿರುವ ಆತಂಕವೂ ಇದೆ.
