ನಂಬಿಕೆ ಮೇಲೆಯೇ ನಡೆಯುತ್ತಿದೆ ಆನೆ ಸವಾರಿ.. ಕಾರ್ಯಕರ್ತರಿಗೆ ಬಿಎಸ್‌ಪಿ ಅಭ್ಯರ್ಥಿ ಗೆಲುವಿನ ವಿಶ್ವಾಸ

ರಾಷ್ಟ್ರೀಯ ಪಕ್ಷಗಳಿಂದ ಚಾಮರಾಜನಗರ ಮೀಸಲು ಕ್ಷೇತ್ರಕ್ಕೆ ಮೊದಲ ಬಾರಿ ಸ್ಪರ್ಧಿಸಿದ್ದಾಗಲೇ ವಿ. ಶ್ರೀನಿವಾಸ್ ಪ್ರಸಾದ್ ಹಾಗೂ ಆರ್. ಧ್ರುವನಾರಾಯಣ್ ವಿಜಯಿಯಾಗಿದ್ದರು. ಅದೇ ರೀತಿ ಬಿಎಸ್​ಪಿ ಅಭ್ಯರ್ಥಿಯಾಗಿರುವ ಡಾ.ಶಿವಕುಮಾರ್ ಕೂಡ ಜಯಶಾಲಿಯಾಗುತ್ತಾರೆ ಎಂಬ ನಂಬಿಕೆ ಪಕ್ಷದ ಕಾರ್ಯಕರ್ತರದ್ದಾಗಿದೆ.

ಚಾಮರಾಜನಗರ: ನೆಚ್ಚಿನ ನಾಯಕನ ಚುನಾವಣೆಯಲ್ಲಿ ಸ್ಪರ್ಧಿಸಿದಾಗ ಅಭಿಮಾನಿಗಳಲ್ಲಿ ವಿವಿಧ ನಂಬಿಕೆ ಗರಿಗೆದರುತ್ತದೆ ಎಂಬುದಕ್ಕೆ ಬಿಎಸ್​ಪಿ ಅಭಿಮಾನಿಗಳ ಈ 2 ನಂಬಿಕೆಗಳೇ ಸಾಕ್ಷಿ.

ರಾಷ್ಟ್ರೀಯ ಪಕ್ಷಗಳಿಂದ ಚಾಮರಾಜನಗರ ಮೀಸಲು ಕ್ಷೇತ್ರಕ್ಕೆ ಮೊದಲ ಬಾರಿ ಸ್ಪರ್ಧಿಸಿದ್ದಾಗಲೇ ವಿ. ಶ್ರೀನಿವಾಸ್ ಪ್ರಸಾದ್ ಹಾಗೂ ಆರ್. ಧ್ರುವನಾರಾಯಣ್ ವಿಜಯಿಯಾಗಿದ್ದರು. ಅದೇ ರೀತಿ ಬಿಎಸ್​ಪಿ ಅಭ್ಯರ್ಥಿಯಾಗಿರುವ ಡಾ.ಶಿವಕುಮಾರ್ ಕೂಡ ಜಯಶಾಲಿಯಾಗುತ್ತಾರೆ ಎಂಬ ನಂಬಿಕೆ ಪಕ್ಷದ ಕಾರ್ಯಕರ್ತರದ್ದಾಗಿದೆ.

ಪ್ರಚಾರ ವಾಹನಕ್ಕೆ ಬಳಸಿಕೊಳ್ಳುತ್ತಿರುವ ಆನೆಯು ಗೆಲುವಿನ ಮಾಲೆ ತಂದುಕೊಡಲಿದೆ ಎಂಬ ವಿಶ್ವಾಸ ಕಾರ್ಯಕರ್ತರದ್ದಾಗಿದೆ. ಈ ಹಿಂದೆ, ಕೊಳ್ಳೇಗಾಲ ನಗರಸಭೆಯಲ್ಲಿ ಆನೆ ಸ್ತಬ್ಧಚಿತ್ರವನ್ನು ಬಳಸಿಕೊಂಡ ಮೇಲೆ ಬಿಎಸ್​ಪಿ ಗೆಲುವಿನ ನಗೆ ಬೀರಿತ್ತು. ವಿಧಾನಸಭೆ ಚುನಾವಣೆಯಲ್ಲೂ ಆನೆ ಸ್ತಬ್ಧಚಿತ್ರವನ್ನು ಬಳಸಿಕೊಂಡ ನಂತರ ಮಹೇಶ್ ಶಾಸಕರಾದರು, ಈ ಬಾರಿ ಎಂಪಿ ಚುನಾವಣೆಯಲ್ಲಿ ಇದನ್ನು ಬಳಸುತ್ತಿದ್ದು ಶಿವಕುಮಾರ್ ಎಂಪಿಯಾಗುತ್ತಾರೆ ಎನ್ನುತ್ತಾರೆ ಪಕ್ಷದ ಕಾರ್ಯಕರ್ತರು.

ಈ ಕುರಿತು, ಅಭ್ಯರ್ಥಿ ಡಾ. ಶಿವಕುಮಾರ್ ಈಟಿವಿ ಭಾರತದೊಂದಿಗೆ ಮಾತನಾಡಿ, ಪ್ರಚಾರಕ್ಕೆ ಹೋದೆಡೆ ಮೊದಲ ಬಾರಿ ಸ್ಪರ್ಧಿಸಿದ್ದಾಗಲೇ ಅವರಿಬ್ಬರು ಗೆದ್ದಿದ್ದು, ಈ ಬಾರಿ ನೀವು ಗೆಲ್ಲುತ್ತೀರಿ ಎಂಬ ಮಾತುಗಳಾನ್ನಾಡಿದಾಗ ಗೆಲ್ಲುವ ಹುಮ್ಮಸ್ಸು ಹೆಚ್ಚುತ್ತಿದೆ. ಆನೆ ಸ್ತಬ್ಧಚಿತ್ರವೇ ನಮ್ಮ ಸ್ಟಾರ್ ಕ್ಯಾಂಪೇನರ್ ಎಂದು ಹೇಳಿದರು.

ಒಟ್ಟಿನಲ್ಲಿ ನಂಬಿಕೆಗಳು, ನೆಚ್ಚಿನ ನಾಯಕನ ಮೇಲಿನ ಅಭಿಮಾನ ಎಲ್ಲವೂ ಜನತಂತ್ರ ಹಬ್ಬದ ಭಾಗಗಳಾಗಿದ್ದು ಎಲ್ಲದಕ್ಕೂ ಕಾಲವೇ ಉತ್ತರಿಸಬೇಕಿದೆ.