ಉದ್ಧಾರ ಮಾಡದ ಉದ್ದು, ಬಗರಿ ಮೂಳೆ ಮುರಿದ ತೊಗರಿ.. ಅನ್ನದಾತರಿಗೆ ಸೋಲುಣಿಸಿದ ಸೋಯಾಬಿನ್​

ಬೀದರ್ ಜಿಲ್ಲೆಯ ಔರಾದ್ ತಾಲೂಕಿನ ದಾಬಕಾ, ಹಂಗರಗಾ, ಮುರ್ಕಿ, ಎಕಂಬಾ ಸೇರಿದಂತೆ ಬಹುತೇಕ ಕಡೆಯಲ್ಲಿ ಕಳೆದ ಒಂದು ವಾರದಿಂದ ಎಡೆಬಿಡದೆ ಸುರಿಯುತ್ತಿರುವ ಧಾರಾಕಾರ ಮಳೆಯಿಂದಾಗಿ ಫಲವತ್ತಾಗಿ ಬೆಳೆದ  ಸೋಯಾಬಿನ್  ನೀರುಪಾಲಾಗಿದೆ.

ಬೀದರ್: ಸಕಾಲಕ್ಕೆ ಮಳೆಯಾಗದೆ ಮುಂಗಾರು ಹಂಗಾಮಿನ ಉದ್ದು, ಹೆಸರು, ಜೋಳ ನಾಶವಾಗಿ ಕಂಗ್ಗೆಟ್ಟು ಹೋದ ರೈತರ ಪಾಲಿನ ಆಶಾಕಿರಣವಾಗಿದ್ದ ಸೋಯಾಬಿನ್ ಬೆಳೆ ಈಗ ಸತತ ಮಳೆಯಿಂದಾಗಿ ನೀರುಪಾಲಾಗಿ ಅನ್ನದಾತ ಅಕ್ಷರಶಃ ಕಂಗಾಲಾಗಿದ್ದಾನೆ.

ಜಿಲ್ಲೆಯ ಔರಾದ್ ತಾಲೂಕಿನ ದಾಬಕಾ, ಹಂಗರಗಾ, ಮುರ್ಕಿ, ಎಕಂಬಾ ಸೇರಿದಂತೆ ಬಹುತೇಕ ಕಡೆಯಲ್ಲಿ ಕಳೆದ ಒಂದು ವಾರದಿಂದ ಎಡೆಬಿಡದೆ ಸುರಿಯುತ್ತಿರುವ ಧಾರಾಕಾರ ಮಳೆಯಿಂದಾಗಿ ಫಲವತ್ತಾಗಿ ಬೆಳೆದ ಸೋಯಾಬಿನ್ ನೀರುಪಾಲಾಗಿದೆ. ಕೈಗೆ ಬಂದ ತುತ್ತು ಬಾಯಿಗೆ ಬರದಂತಾಗಿದ್ದು, ಅನ್ನದಾತ ಕಂಗಾಲಾಗಿದ್ದಾನೆ. ಗದ್ದೆಯಲ್ಲಿ ನೀರು ತುಂಬಿಕೊಂಡಿರುವ ಸೋಯಾಬಿನ್​ ಬೆಳೆಯನ್ನು ಹೆಂಗಾದ್ರು ಮಾಡಿ ತೆಗಿಯಬೇಕು ಅಂದ್ರು ಆಗದೆ ರೈತ ಕೈಚೆಲ್ಲಿ ಕುಂತಿದ್ದಾನೆ.

ಈ ಬಾರಿ ಮುಂಗಾರು ಹಂಗಾಮಿನ ವೇಳೆಯಲ್ಲಿ ಸಕಾಲಕ್ಕೆ ಮಳೆಯಾಗದೆ ವಾಣಿಜ್ಯ ಬೆಳೆಗಳಾದ ಉದ್ದು, ಹೆಸರು ಹಾಗೆ ಜೋಳ, ತೊಗರಿ ನಾಶವಾಗಿದೆ. ಕಡಿಮೆ ಮಳೆಯಾದ್ರು ಬೆಳೆದಿದ್ದ ಸೋಯಾಬಿನ್ ಇನ್ನೆನು ಕಟಾವು ಮಾಡಿ ರಾಶಿ ಮಾಡಬೇಕು ಅನ್ನುವಷ್ಟರಲ್ಲಿ ಮಳೆಯ ಅವಾಂತರಕ್ಕೆ ನೀರುಪಾಲಾಗಿದೆ. ಹೀಗಾಗಿ ಸರ್ಕಾರ ಪ್ರತಿ ಹೇಕ್ಟರ್ ಗೆ 20 ಸಾವಿರದಂತೆ ಪರಿಹಾರ ನೀಡಬೇಕು ಎಂದು ಹಂಗರಗಾ ಗ್ರಾಮದ ರೈತ ಮುಖಂಡ ಸಂದೀಪ್ ಪಾಟೀಲ್ ಆಗ್ರಹಿಸಿದ್ದಾರೆ.